IITOODA 21 - Bibliyeeda Ghaydit

Joorda fuga Ganaani

¹ Nea siida Ganaani, was sugoocheanda Aradi, abiita ng'eanyiida Negebu ghwayiiy gideaba Israeli gwasku naweeda Atarimu, hean gang'uchi sea Israeli, ak ghwaat buuneeda mwaatkwa soomjeandumeeda.

² Ghwarat Israeli gida aba heeda NG'UTAMIIDA nea gwayi, “Inyas giyiini fiisu geatingeasu aba huumwa abeeda gaydanyarjeaweada muuchi mujiinajeega nyaawa.”

³ Ak ghwayiiy NG'UTAMIIDA ghuuta Israeli, ak ghwayiin fuga Ganaani geatinga nyaawa; ak ghwalas uhuudeaba fugiga ea mujiinajeega nyaawa; ak geeguura gheawungeaba ng'eanyiita Horma.

Ichibooda sisna lagheanga oomng'i

⁴ Hean ghabeawa giijeeda Hori nea gwasik naweeda Basooda Shaamu; ak abeeda gwaneaweesa ng'eanyiida Edomu, ak gabur iheenga buuneeda aba naweedida.

⁵ Ak gooniiksa buuneeda ASEETA, ea Musa, nea gwayeesha, “Ghwasaan inyas gooyeaneasa eang'amwana ng'eanyiida Misri, ak geeshealsi dareapcheeda? Aba gideaba manda hamita, ak ea manda beega, ak ea niheawa jeesingaasa hamidi muyiin.”

⁶ Ng'ata goojeagu NG'UTAMIIDA ichipkeega ng'weani bugusta buuneeda, ak ghwaak buuneeda, ak gameewa fuga saang'a.

⁷ Ak gaweay buuneeda heeda Musa, ak gwayeesha, “Sisinyi riing'eeda aba gideaba geeniiksi ASEETA ea ang'iing'i; musiischoaweasa aba heeda NG'UTAMIIDA, gageandeawaneasa ichipkeesu.” Hean gamusiischeesa Musa buuneeda.

⁸ Ghwalamda NG'UTAMIIDA ak gwayeesha Musa, “Sina ichibooda ak giyiini uhuuda geeta, ak abeeda siida wassean sighanya, iyang'weersa ichiboodida, gayghaghu.”

⁹ Hean gwasin Musa ichibooda oomu ak ghwayiin uhuuda geeta, ak iissa siida iighanya ichibooda, iyang'weersa ichiboodida oomuun ghahaap.

Ghang'eada giijeeda Hori ea ghwahita moangoachiyda fuga Moabu

¹⁰ Muchu gabalak fuga Israeli ak gawus aba Oboti.

¹¹ Ak ghabeawa Oboti, ak gooduuw aba Iye-abarimu, gal geat sea dareapcheeda Moabu, duukusa heeda arearuuna aseeta.

¹² Ghang'eada hoowa ak gaweay, ak gooduuwsa moangoachiyda Seredi.

¹³ Ghang'eada hoowa ak gaweay, ak gooduuwsa meatkweeda niirja bea Arnoni, mida dareapcheeda, gulgeat sea moonghooda fuga Amori; aba gideaba Arnoni moonghooda Moabu gil, mida dageascheeda Moabu ea dea fuga Amori.

¹⁴ Ak gawuurji gidaghayi sirukuteayda aba jeeda Gitaabooda Ng'ucheadinga bea NG'UTAMIIDA, “Wahebu mida Sufa, sea moangoachihajeega Arnoni,

¹⁵ ea baduutkeaba moangoachihajeega weay ea ghwahita hoorgeeda Ari, ak goombiileesa moonghooda Moabu.”

¹⁶ Ak ghang'eada hoowa ak gaweay Beri; was healadeeda ghayi eesha NG'UTAMIIDA Musa, “Bwadana geat buuneeda ak gaydaadaw beega.”

¹⁷ Ak gwasarman Israeli duumi: “Nung' gwardu beega, Ea healadeeda! Asarmasiina!

¹⁸ Healadeeda ghurghur fuga hees, was dea ng'alda fuga hees bea buuneeda, aba bileangida gheambalmeeda, ea bayiiga nyaawa.” Ak ghabeawa dareapcheeda ea ghwahita Matana,

¹⁹ iing'eada Matana gaweay Nahalieli; ng'eada Nahalieli gaweay Bamoti;

²⁰ ng'eada Bamoti gaweay moangoachiyda bageaji sea ng'eanyiida Moabu, was uhuuda giijeeda Bisga, ng'utiida ng'eanyi dareapcheeda.

Joorda sugoocheanda siguura Sihoni ea sugoocheanda siguura Ogu

²¹ Ng'ata goojeakta Israeli buuneeda gaweay heeda Sihoni was sugoocheanda Amori, ak gwayeesha,

²² “Nung' dang'ata aba jeeda ng'eanyiidaang'u; ak ea majeesachsiina ghaat madameega, ghana eeweaya jeesinga madameega sabiibu; ak ea majealeaha beega healatka; gajeesiga naweeda haw bea sugoocheanda, bwak ea eeriteawana ng'eanyiidaang'u.”

²³ Hean ghaheawa Sihoni gideaba gayghang'ata Israeli aba jeeda ng'eanyiidaanyi; ak ghabwada geat Sihoni fugaaschi sean, ak gaweay gang'uchi sea Israeli aba dareapcheeda, ak gawa ea ghwahita Yahasa; ak gang'uchi sea Israeli.

²⁴ Ng'ata ghabwar Israeli niny aba ng'uta, ak ghoang'waay ng'eanyiidaanyi ak goombal ghang'eada ghealooda Arnoni ea ghwahita Yaboki, ea ghwahita ng'eanyiida fuga Amoni; aba gideaba moonghooda fuga Amoni geefur muuchi.

²⁵ Hean gageanda Israeli mujiinajeesu seaniin, ak goobiida Israeli mujiinajeega sean bea Amori, mida Heshboni, sea mujiinajeagaaschi sean.

²⁶ Aba gideaba Heshboni mujiineeda haw bea Sihoni gil was sugoocheanda Amori, ghayi ng'uchi sea sugoocheanda madeeda bea Moabu, ak ghoareat ng'eanyiidaanyi sean mida geatingaaschi, ea ghwahita ghealooda Arnoni.

²⁷ Ak ghoah gida iissa gwasarmana buuneeda, “Apkaani Heshboni, ak abeeda geadeas, anung'waada mujiineeda Sihoni eadeas gamajeegiit.

²⁸ Aba gideaba beasta ghabeawa Heshboni, ng'ushapta beasta gwaleabu mujiineeda Sihoni. Ak ghwaak Ariheeda Moabu, ak ghwaak heayeeniga diyeada bea Arnoni.

²⁹ Shageada Moabu! Sila uhuudeang'wa fuga bada Gemoshi! Noanung' ghoah orjoogeagwa fuga mang'aw, nea ghoah haweagaaschi soomjooga, aba heeda Sihoni was sugoocheanda Amori.

³⁰ Ak ghamneawa jeacheenga nyaawa ea silas uhuuda ghang'eada Heshboni ea ghwahita Diboni, ghang'eada Nashimu ea ghwahita Nofa neekeewa Medeba.”

³¹ Hean goobiida fuga Israeli jeeda ng'eanyiida Amori.

³² Ng'ata goojeakta Musa buuneeda gaweay gagwalsa ghaang' ng'eanyiida Yaseri, ak ghoang'waay mujiinajeagaaschi, ak ghahoan fuga Amori nyasa hoowa.

³³ Hean ghwayam geat ak ghwascheang'daawa naweeda Bashani; ak ghang'eat Ogu was sugoocheanda Bashani gang'uchi saawa aba hoowa bea Edreyi, niny sea fugaaschi sean.

³⁴ Ghwalamda NG'UTAMIIDA ak gwayeesha Musa, “Adiiwali niny; aba gideaba naayiinyi geatingaagu, sea buuneadaanyi sean, ea ng'eanyiidaanyi; ak gaysimana gidaghayi isimi Sihoni was sugoocheanda Amori, abiita Heshboni.”

³⁵ Ak ghabwar, ea orjoagaaschi, ea buuneadaanyi sean, ak ea meabuusiina eara sih; ak goombal ng'eanyiidaanyi.