IITOODA 20 - Bibliyeeda Ghaydit

Ng'asheega bun aba Gadeshi

¹ Muchu gaweay fuga sean bwatgeat bea Israeli, ea gaweay dareapcheeda Sini, aba sheeda madeeda, ak gooduuw buuneeda aba Gadeshi; ak gameewsa Miriyamu hoowa, ak geebung'sa.

² Nea hiji ea manda beega aba fuga bwatgeat; ak ghabwatgeat sean ak gwanyareeksa Musa ea Haruni.

³ Ak gwasheang'nyi buuneeda sea Musa, ak gabalool nea gwayi, “Gwachi ghang'wana geemeewayi damanda ghayi meewa fuga ghaheanya aba madeeda NG'UTAMIIDA!

⁴ Anda gooyeadu fuga bwatgeat bea NG'UTAMIIDA ea ghwahidu dareapcheeni eemeewiisiina hiji, aseasa ea dugwaasa?

⁵ Ak ghwasaan inyas gooruunaneasa ng'eanyiida Misri ea ayeaneasa hiji muyiin? Hiji mii ng'eanyiida booga, ghana shaboogheecheanda, ghana sabiibu ghana goomamaanga. Ak eara beega leeyda ea mandana.”

⁶ Ng'ata ghabeawa Musa ea Haruni madeeda fuga bwatgeat ak ghwahita ghuuta maheemajeanda siroondooscheesa, ak ghoabeada nea ghwabwada jeesinga ng'eanyi. Hean ghwahidu giigheambiita NG'UTAMIIDA heanyaawa,

⁷ ak ghwalamda NG'UTAMIIDA ak gwayeesha Musa,

⁸ “Geani bileangida ak gibwadigeat eemeeda, ang'iing'i ea orjeeda geamadu was Haruni, ak giyeeshi lagheaneeda aba madeeda gheanyanga nyaawa gideaba aruuni beega; ak gajaruuni beega aba jeeda lagheaneeda aba badahuuka nyaawa; ak gajadawa fuga bwatgeat beega jea ghwali ea dugwa nyaawa.”

⁹ Ng'ata gageanu Musa bileangida aba madeeda NG'UTAMIIDA gawuurji gidasirukusiinda niny.

¹⁰ Hean ghabwada geat Musa ea Haruni buuneeda bwatgeat sean aba madeeda lagheaneeda, ak gwayeesha saawa, “Asi, ghamneawa oaleaydiit, fuga sadeadi; gajeeruuneegwa beega aba badaydeaba lagheaneani?”

¹¹ Ng'ata gagatkat Musa geatindaanyi ak ghwalas lagheaneedida aba bileangidaanyi nibiyeenya; ak gwardu beega saang'a, ak ghwali eemeeda ea dugwa nyaawa.

¹² Ghwalamda NG'UTAMIIDA ak gwayeesha Musa ea Haruni, “Asi iinukwa moondeawani masaweega aba heedeanyu aniini, ak ea moosinnean mureeda aba madeeda gheanyanga fuga Israeli, asi aba ng'asheanji, mwajayaada eemeeni bwatgeadiin jeedeaba ng'eanyiita aadawji saawaan.”

¹³ Beesu bea Meribahiin, was heeda aniiksiina fuga Israeli NG'UTAMIIDA gil, ak ghoahiimu geaw gideaba ea ghaydit aba jeenyaawa.

Sugoocheanda Edomu ghaheawa ghang'ata fuga Israeli

¹⁴ Muchu goojeakta Musa buuneeda aba Gadeshi ea ghwahita heeda sugoocheanda Edomu, “Asi gwayi orjeeda geamadu was Israeli, Ang'iing'i ginali sawanaduutka ghayi sinyaschi;

¹⁵ gidaghayi beada ghweanigaasa gaweay Misri, ak geepiidi ea gageawiit, ak gwasimaneasa fuga Misri ng'asheega munyas muuchi, sea ghweanigaasa;

¹⁶ amadu nea geeyeawusi NG'UTAMIIDA, ghwayiiy ghuusigaasa, ak goojeagu malayka, ak gooruuneasa eerinana Misri; ak ghamneawa geendi Gadeshi, was mujiineeda mida murdeeda ng'eanyiideang'wa.

¹⁷ Asi ghamneawa nung' eang'ata aba jeeda ng'eanyiidaang'u; majeeska jeesinga madameega, ghana jeesinga madameega sabiibu, ak ea majealeaha beega healadeeda; gajeesiga naweeda haw bea sugoocheanda, ak ea majeeyamsiina geat geatinda dugwa ghana geatinda ghaadaam, bwak ea ealaja bugusta ng'eanyiideang'wa.”

¹⁸ Hean gwayeesha Edomu niny, “Ang'iing'i mwayng'ata aba jeeda ng'eanyiideanyu, adiidu gearidu headaang'u ea ng'uta ak geeng'uchi.”

¹⁹ Ghwalamda fuga Israeli ak gwayeesha niny, “Aseasa gajeescheang'daawana naweeda haw; ama sileayi beagaagu aniini ea dugweasu, abeeda gaydawalu; nung' dang'ata aniini aba geeshanga, manda gilinuut.”

²⁰ Ghwalamda ak gwayeesha, “Manda mwayng'ata.” Ak gwardu Edomu nea gagasa gang'uchi sea saawa nea goodeana fuga saang'a aba uurda haw.

²¹ Ak ghaheawa fuga Edomu ghwanung' ghang'ata fuga Israeli aba jeeda ng'eanyiidaanyi; ak ghwayam geaw Israeli ak gwanung'usa heeda niny.

Miyeeda Haruni

²² Ng'ata ghabeawa Gadeshi; fuga Israeli, ea fuga bwatgeat sean, ea ghwahita giijeeda Hori.

²³ Hean goobalool NG'UTAMIIDA Musa ea Haruni aba giijeeda Hori, neekeewa moonghooda ng'eanyiida Edomu, ak gwayeesha,

²⁴ “Haruni gayghami; maygawa jeeda ng'eanyiida aadawji fuga Israeli, aba gideaba noaheawi diigheandeanyu aba ghuuta beega Meriba.

²⁵ Geanda Haruni sea orjeedaanyi was Eliyasari, ak giyeadu uhuuda giijeeda Hori;

²⁶ Ng'awa hang'weaka Haruni, ak giishuubi hang'weaksu orjeedaanyi was Eliyasari; ak abeeda gayghami Haruni aba hoowa.”

²⁷ Ak gwasin Musa ng'asheanda rukusa NG'UTAMIIDA; ak gaweay uhuuda giijeeda Hori aba madeeda gheanyanga buuneesean.

²⁸ Hean ghafwakta Musa hang'weaka Haruni, ak gooshuup hang'weaksu orjeedaanyi was Eliyasari; ak gameewsa Haruni uhuuda giijeeda; ng'ata ghwararang'aana Musa ea Eliyasari giijeeda.

²⁹ Hean nea ghwadaah eemeesean gideaba nimi Haruni, gooyeawda gheesean bea Israeli aba badayda Haruni askwearjooji diktam ea damanamughuush.