IITOODA 2 - Bibliyeeda Ghaydit

Gisijipta dooshinga aba jeeda museasooda

¹ Ng'ata ghwalamda NG'UTAMIIDA ak gwayeesha Musa ea Haruni,

² “Fuga Israeli gaygaba siisi miinaada aba guumda beendeerajeanda, was giirooraneeda gealga ghweaniga nyaawa, ak gaygooduuw nea gwadeaschi maheemajeanda siroondooscheesa ak gayghamway nea gwaneaweesa meadajeega sean.

³ Nea fiisu jea ghamway meatkweeda ghayeawaan, nea gwaduukusa meatkweeda arearuuna aseeta, gajea fuga mida hing'eadayda beendeerajeanda Yudahi nea siida haweewa saawa gajea Nashoni orjeeda Aminadaabu,

⁴ sea lugoadaanyi, sea fuga siyiitiisa gheanyaawa, buuneeda ea sagalamnyooji laadam ea damanang'wan ea bughalaji lah.

⁵ Nea fuga jea ghamway giischeewdaanyi fuga eemeeda Isakari; was siida haweewa fuga Isakari gajea Natanaeli orjeeda Suari;

⁶ ea lugoadaanyi, sea fuga siyiitiisa gheanyaawa, buuneeda ea sagalamnyooji haradam ea damanang'wan ea bughalaji ang'wan;

⁷ ea eemeeda Sabuloni; siida haw aba jeeda orjooga Sabuloni gajea Eliyabu orjeeda Heloni;

⁸ ea lugoadaanyi, ea fuga siyiitiisa gheanyaawa, buuneeda ea sagalamnyooji haradam ea damanispwa ea bughalaji ang'wan.

⁹ Buuneesean siyiida aba maheemajeanda Yuda buuneeda ea sagalamnyooji bughala ea seedam ea lah ea bughalaji ang'wan. Suh fuga jea goosheeda gaweay.

¹⁰ “Meatkweeda duukusa wiilooda ng'eanyiida biyeara gaygwanda fuga jea gwanda hing'eadayda beendeerajeanda mughuusheanda fuga Rubeni ea lugoadaanyi; nea siida haw aba jeeda orjooga Rubeni gayghoah Elisuri orjeeda Shedeuri.

¹¹ Ea lugoadaanyi, ea fuga siyiitiisa gheanyaawa, buuneeda ea sagalamnyooji haradam ea lah ea bughalaji muut.

¹² Nea fuga jea ghamway giischeewdaanyi ea fuga eemeeda Simeoni; nea siida haw aba orjooga Simeoni gajea Shelumieli was orjeeda Suri-shadayi;

¹³ ea lugoadaanyi, ea fuga siyiitiisa gheanyaawa, buuneeda ea sagalamnyooji haradam ea damashageash ea bughalaji samwagu;

¹⁴ ak eemeeda Gadi; siida haw aba orjooga Gadi ea Eliyasafu orjeeda Deueli;

¹⁵ ea lugoadaanyi, ea fuga siyiitiisa gheanyaawa, buuneeda ea sagalamnyooji haradam ea muut ea bughalaji lah ea haradam ea damanamughuush.

¹⁶ Buuneesean siyiida aba museasooda Rubeni ea sagalamnyooji bughala ea haradam ea damwanagi ea bughalaji ang'wan ea haradam ea damanamughuush. Suh fugeaba iyeenya jea gabassa.

¹⁷ “Abeeda gaygabalak maheemajeanda siroondooscheesa, sea museasooda fuga Lawi mida bugusta maheemajeega sean; aba gisijipta maheemajeega, nih gichea gabalakta giliwas sih aba heeda mida nea ghamiinda beendeerajeanda nyaawa.

¹⁸ “Meatkweeda biyeara gaygwanda beendeerajeanda ea maheemajeanda Efraimu ea lugoadaanyi; nea siida haw aba orjooga Efraimu ea Elishama orjeeda Amihudi,

¹⁹ ea lugoadaanyi, sea fuga siyiitiisa gheanyaawa buuneeda ea sagalamnyooji haradam ea bughalaji muut.

²⁰ Nea murdeadaanyi gaygwanda eemeeda Manase; siida nyaawa haw aba orjooga Manase ea Gamalieli orjeeda Bedasuri;

²¹ ea lugoadaanyi, sea fuga siyiitiisa gheanyaawa, buuneeda ea sagalamnyooji diktam ea damaniyeenya ea bughalaji iyeenya;

²² Gabassa eemeeda Benjamini, nea siida haw bea eemeeda Benjamini ea Abidani orjeeda Gideoni,

²³ ea lugoadaanyi, sea fuga siyiitiisa gheanyaawa, buuneeda ea sagalamnyooji diktam ea damanamuut ea bughalaji ang'wan

²⁴ buuneeda siyiida aba maheemajeanda Efraimu buuneeda ea sagalamnyooji bughala sis ea fih bughala. Ak ea fuga jea gamaseaw bea samwagu.

²⁵ “Meatkweeda duukusa wiilooda ng'eanyiida ghayeawa gaygwanda beendeerajeanda maheemajeanda Dani ea lugweega nyaawa; nea siida haw aba orjooga Dani ea Ahieseri orjeeda Amishadayi.

²⁶ Ea lugoadaanyi, sea fuga siyiitiisa gheanyaawa, buuneeda ea sagalamnyooji laadam ea iyeenya ea bughalaji ispwa.

²⁷ Nea fuga jea ghamway murdeadaanyi ea eemeeda Asheri, ak siida haw aba orjooga Asheri ea Bagieli orjeeda Okrani;

²⁸ ea lugoadaanyi, sea fuga siyiitiisa gheanyaawa, buuneeda ea sagalamnyooji haradam ea agi ea bughalaji muut;

²⁹ ak ghabwat eemeeda Naftali; nea siida haw aba orjooga Naftali ea Ahira orjeeda Enani;

³⁰ ea lugoadaanyi, sea fuga siyiitiisa gheanyaawa, buuneeda ea sagalamnyooji haradam ea damasamwagu ea bughalaji ang'wan.

³¹ Buuneesean siyiitiisa maheemajeanda Dani buuneeda ea sagalamnyooji bughala ea haradam ea ispwa ea bughalaji lah. Suh fuga jea gaweay aba huuydeanda nea gamaseaw beendeerajeanda nyaawa.”

³² Suh fuga siyiida was fuga Israeli aba gidabeada gealga ghweaniga nyaawa; fuga sean siyiida aba maheemajeanda ea lugweega nyaawa, buuneeda ea sagalamnyooji bughalaji lah ea samwagu ea bughalaji muut ea haradam ea damanamughuush.

³³ Ak ea meeyiita fuga Lawi was fuga Israeli; gawuurji gidarukusa NG'UTAMIIDA Musa.

³⁴ Nih gisin fuga Israeli; gawuurji ng'asheega sean rukusa NG'UTAMIIDA Musa, ak ea gidajipta geat aba heeda maheemajeega nyaawa, ak ea gidabalakta, giliwas sih sea fuga gheanyaawa, ea gealga ghweaniga nyaawa.