IITOODA 18 - Bibliyeeda Ghaydit

Gadiyoojiga ashoohoodiga ea fuga Lawi

¹ Ghwalamda NG'UTAMIIDA ak gwayeesha Haruni, “Ang'iing'i ea diibigaagu ea gealga ghweanigaagu ea ang'iing'i gajasareana munyinda heeda ghaydit; ang'iing'i ea diibigaagu ea dooshteang'wa gajasareana munyinda ashoohoocheanduumeedeang'wa.

² Ea orjooga giyeang'wa, ea eemeeda Lawi, ea eemeeda ghweanda jiilneey, eani adeanana gwaneekiit, ak geekuuyaneegwa, ak gagadiyeeseey; nea ang'iing'i ea orjoagaagu gajandana madeeda maheemajeanda muuwuunooda.

³ Ak gaygafuriischi aba diigheandaang'u, ea furooda maheemajeanda sean; ak ea adagwaneekiisa dabita mida heeda ghaydit, ghana heeda wagiida, gajiidu gameewa, saawa ea agooga.

⁴ Ak gajeekuuyi saawa ea ang'iing'i, ak gwasin gadiyeeda furooda maheemajeanda siroondooscheesa, aba gadiyoojiga sean bea maheemajeanda; ak ea adagwaneekiiseegwa rabascheanda.

⁵ Nea agooga gajasina gadiyeeda furooda heeda ghaydit, ea furooda heeda wagiida, ak ea manda nyarasta gicha aba badahuuka fuga Israeli.

⁶ Ak aniini, ging'ulayi neageandi orjooga giyeang'wa bea Lawi aba jeeda fuga Israeli; aba heedeang'wa agooga gidamiy gil siitaw NG'UTAMIIDA, nung' gwasin gadiyeeda maheemajeanda siroondooscheesa.

⁷ Nea ang'iing'i ea orjoagaagu gajang'ula ashoohoocheanduumeedeang'wa, aba badayda giliwas gil bea heeda wagiida, ea aba badayda haleanjeeda mida jeeda hang'da beashooda, ak gajasina gadiyeeda. Geagoonyeegwa ashoohoocheanduumeeda ghoah gadiyeeda miy sigooneegwa; nea rabascheanda jea gwaneekiit gajeabwar ghami.”

Haleanjeeda siitawi ashoohoodiga

⁸ Ng'ata gwayeesha NG'UTAMIIDA Haruni, “Ng'ula, neagoonyeey haghweeda haleanjeedeanyu bea ghadooweeda sigatkat eekeal humng'eeda, aba gideaba, haleanjeeni sean bea fuga Israeliin siikghaydiit; ak ea neagoonyeey ang'iing'i ea diibigaagu haleanjeeni aba gideaba agooga simwaareagwa aba nagheeda, ak ghoah gitoobiiwseegwa damanda manda muudeanooda.

⁹ Haleanjeeni gayghoah gaagu aba jeedeaba haleanjeedida ghaydidi muuchiin, adeaghwarda aba beasta; giliwas haleanjeeda nyaawa bea ghadooweeda, ea giliwas haleanjeeda nyaawa bea ghadooweeda was booga, ea giliwas haleanjeeda nyaawa sighadoawanda aba badayda riing'eeda, ea giliwas haleanjeeda nyaawa sighadoawanda siyeanean aba badayda giidiinyeanda, gayghaghaydiit muuchi aba badaydaang'u ang'iing'i ea heeda diibigaagu.

¹⁰ Ak gajaga haleanjeeni aba heeda ghaydit muuchi, gayghwaak giliwas ng'eedeeda haleanjeeni; ea ghaydit aba heedeang'wa.

¹¹ Ak gili ea daang'u; was haleanjeedida bea ghadooweeda sigatkat eekeal humng'eeda siitaw saawaan, aba gideaba haleanjeeda sean bea ghadooweeda siiyuuk bea fuga Israeli; suh neagoonyeey ang'iing'i ea orjoagaagu ea haweagaagu, nih gwadoobiiwseegwa damanda manda muudeanooda; giliwas sih aba jeedeaba gheang'u doabiiwaat gayghwaak haleanjeeni.

¹² Haleanjeeda sean miyaasiin riisheadi, ea haleanjeeda sean miyaasiin was difaayi ea dea booga, was haghweega madeeda aba jeeda haleanjeeda jea ghoadaw NG'UTAMIIDA gaydagooneegwa.

¹³ Haghweega madeeda hees bea geediga sean mida jeeda ng'eanyiida nyaawa, eadu heeda NG'UTAMIIDA, gayghoah geagwa; giliwas sih doabiiwaat aba jeedeaba gheang'u gayghwaak.

¹⁴ Gea giliwas gil siikghaydiit aba jeeda Israeli gayghoah daang'u.

¹⁵ Giliwas duweacheeda, bea haleanjeeda sean jea ghoadaw NG'UTAMIIDA, dea siida ghana dea deeda, dea buuneeda ghana dea dugwa, gayghoah daang'u, amadu duweacheeda siida, gajatina, ea duweachajeega dugwa mii miyaasiin gajatina.

¹⁶ Ak gea jea eetin aba jeedeaba diyeang'su (ghang'eada dea bea sheanagi gajatina), ak gajiita mooneadaanyi, gajea shekeelaji muudi bea lapiya, iisigala shekeeleeda heeda ghaydit aba lapiyaji diktam.

¹⁷ Nea duweacheeda deeda, ghana duweacheeda gisilleanda, ghana duweacheeda mbooyda suh majatina, aba gideaba suh ea ghaydidi; gajahiisiina foojeanda nyaawa heeda wagiida, ak gighwardi nagheega nyaawa ghoah haleanjeeda ghadooweeda sighwarda, ak ghoah shearooda ng'andit aba heeda NG'UTAMIIDA;

¹⁸ Ak banyeega nyaawa gayghoah gaagu ang'iing'i, gawuurji giyoodida sigatkadiin, gawuurji jeata geeshta geatinda dugwa, gayghoah daang'u.

¹⁹ Haleanjeeda ghadooweeda sean siitiing'da eekeal humng'eeda bea haleanjeeda ghaydidi, daada fuga Israeli heeda NG'UTAMIIDA, neagoonyeey ang'iing'i ea orjoagaagu ea haweagaagu, nih gwadoobiiwseegwa damanda manda muudeanooda; nih neajeeda balang'da gil mwoamu eegeanda damanda manda muudeanooda aba madeeda NG'UTAMIIDA aba badaydaang'u, ea jeataang'u ang'iing'i.”

²⁰ Ng'ata gwayeesha NG'UTAMIIDA Haruni, “Ang'iing'i mandaneey hearaniischooda aba jeeda ng'eanyiida nyaawa, ak ea maygwanda gidaang'u wassean aba jeenyaawa; aniini geawooschi siida jea ghusa aba jeeda fuga Israeli.

Haleanjeeda siitawi fuga Lawi

²¹ “Ak fuga Lawi, ghaadawji haleanjeeda sean bea gilatamanamughuush aba jeeda Israeli ghoah gea jea gwahearan, gayghoah gichea eataw aba gadiyeeda sin aba maheemajeanda siroondooscheesa.

²² Ak gidang'eada ghamneawa ea adagwaneekiisa fuga Israeli maheemajeanda siroondooscheesa, gajiidu ghwanyas riing'eeda, ak gameewa eara saawa.

²³ Ak fuga Lawi gaygwasin gadiyeeda maheemajeanda siroondooscheesa, ak gayghwasar munyasnacheeka nyaawa; nih gayghoah diigheanda damanda manda muudeanooda aba jeacheengeagwa sean, nea aba jeeda fuga Israeli ea maygwandeawa hearaniischooda.

²⁴ Aba gideaba haleanjeedeaba damanamughuush bea fuga Israeli, adayda ghoah haleanjeeda ghadooweeda siitiing'da eekeal humng'eeda bea NG'UTAMIIDA, naadawji fuga Lawi ghoah gea jea gwahearan; ak ea nearukusi gideaba aba jeeda fuga Israeli manda gida wassean jea gwahearan.”

Haleanjeeda adayiida fuga Lawi

²⁵ Ng'ata goobalool NG'UTAMIIDA Musa ak gwayeesha,

²⁶ “Asi biikta abaloola fuga Lawi ak giyeeshi, ‘Damanda Iyoanyaschi haleanjeedeaba damanamughuush aba heeda fuga Israeli, eagoonyeegwa agooga leabu heanyaawa ghoah haleanjeeda jea ahearana, abeeda iyooyeadu haleanjeeda ghadooweeda sigatkat eekeal humng'eeda heeda NG'UTAMIIDA aba jeedeaba haleanjeeni, gajoatayda gideaba damanamughuush aba haleanjeeni oataydiin.

²⁷ Ak haleanjeedeang'wa bea ghadooweeda jea eegatkat eekeal humng'eeda gajeeyiitiisa heedeang'wa ghoah booga madeeda heas ghana gawuurji gidanyiita gidang'eala sabiibu.

²⁸ Asi eara agooga gajayeani haleanjeeda ghadooweeda sigatkat eekeal humng'eeda eataw NG'UTAMIIDA aba jeeda haleanjeedeang'wa sean oataydi, oanyasi geatinga fuga Israeli; ak gajoatawa ashoohoocheanda was Haruni haleanjeeni bea ghadooweeda sigatkat eekeal humng'eeda bea NG'UTAMIIDEAN.

²⁹ Nea aba jeeda haleanjeeda sean sigooneegwa ghoataydi haleanjeeda miyaasiin muuchi.’

³⁰ ‘Nea iyoataydi heeda miyaasiin muuchi, abeeda gea abit googeandi gawuurji gidageaniideayda siida bwar ng'eanyi gidabit iing'ata giidaydeayda haleanjeadaanyi bea ghadooweeda.

³¹ Ak gajayaaga ang'iing'i ea fugeaba gheang'u aba heeda oondi sean aba gideaba nih gidageatindeang'wa aba gadiyeeda oosinyi aba maheemajeanda siroondooscheesa.

³² Ak agooga gajageanda riing'eeda aba badaydaanyi, iinoatawji NG'UTAMIIDA haleanjeeda miyaasiin muuchi ak ea adoabwari ririnnyeanda haleanjeedida ghaydidi bea fuga Israeliin, gajiidu goomeewayi.’”