IITOODA 17 - Bibliyeeda Ghaydit

Bileangida Haruni

¹ Ng'ata goobalool NG'UTAMIIDA Musa ak gwayeesha,

² “Baloola sea fuga Israeli, ak ginung' gaba siisi goonyi bileangida, bileanginagi aba giliwas gheeda, aba hichpa siisi haw aba giduurji gealga ghweaniga nyaawa, bayiiga ea damaniyeenya. Ak gaba siisi ing'oorsi gheawungaaschi badayda bileangidaanyi.

³ Ak bileangida Lawi gayng'oorsiina gheawunga Haruni; aba gideaba gaygaba siisi haw mideawa bileanginagi aba giliwas eamwa.

⁴ Ak gajiina jeeda maheemajeanda siroondooscheesa aba madeeda mushoodiga, aba heeda siroonyeesi aniini ea ang'iing'i.

⁵ Ak abeeda bileangida siida aaloachi gayghafiirfiir; ak gaydareekusa giiniikghta fuga Israeli, aniikgh aba badahuukeagwa.”

⁶ Hean goobalool Musa fuga Israeli; ak ghoadaw niny fuga nyaawa hees sean bayiiga, giliwas bileangi aba siyagi haw aba gidabeada gealga ghweaniga nyaawa, bayi damaniyeenya; nea bileangida Haruni gwanda jeeda bayiiga nyaawa.

⁷ Ng'ata ghwayiin Musa bayiiga madeeda NG'UTAMIIDA aba jeeda maheemajeanda muuwuunooda.

⁸ Iimuchu gawa Musa jeeda maheemajeanda muuwuunooda; ak ging'ulayi, bileangida Haruni bea gheeh Lawi nifiirfiir, niiruudu seenga, ak gooruudu deakghweeda; ak gwalagu haghweega hees was rabeakgha.

⁹ Hean gooruuta Musa bayiigiga seaniin aba madeeda NG'UTAMIIDA ak ghwayiin madeeda fuga sean bea Israeli; ak gang'ula, ak gaba siisi geanda bileangidaanyi.

¹⁰ Ng'ata gwayeesha NG'UTAMIIDA Musa, “Adealda bileangida Haruni aba madeeda muushoodiga, ak geetiiw ghoah gwadeagooda aba badahuukeaba fiisu munyasiin ak abeeda giduulu giiniikghta nyaawa aniikseaniin, ak ea mameewa.”

¹¹ Ng'ata gwasin Musa ng'asheanji; gawuurji gidarukusiinda NG'UTAMIIDA, ak gwasin.

¹² Ak gabalool fuga Israeli sea Musa, ak gwayeesha, “Ng'ula, aseasa gajeemeewa, gajeeshealana, gajeeshealana eesa sean.

¹³ Giliwas sih neekiit, neekiisa maheemajeanda NG'UTAMIIDA, gayghami; gajeeshealana eesa sean?”