IITOODA 16 - Bibliyeeda Ghaydit

Heeheeweega Gora ea Datani sea Abiramu

¹ Hean gageanu buuneeda Gora, was orjeeda Ishari, was orjeeda Gohati, was orjeeda Lawi, sea Datani ea Abiramu, was orjooga Eliyabu, ea Oni, orjeeda Beleti, was orjooga Rubeni;

² fiisu seaniin abeeda niing'waay geat sea fiisu hees bughalaji iyeenya ea haradam ea damanamughuush bea Israeli, ahaaghwa fuga bwatgeat, was gea siloat aba jeeda fuga girgweageeda haw, was fuga nalaat, ak ghaheawa ng'asheega Musa;

³ ng'ata ghabwat geat nea ghaheawa ng'asheega Musa ea Haruni ak gwayeesha, “Agooga noosheagiichi aba gideaba fuga bwatgeat sean ea ghaydidi, giliwas sih aba jeenyaawa, gwanda NG'UTAMIIDA jeenyaawa; abeeda ghwasaan inyas giidiing'u geaw aba fuga bwatgeat bea NG'UTAMIIDA?”

⁴ Hean nea ghwayiiy Musa ng'asheesu, ghoabeada nea ghwabada jih ng'eanyi;

⁵ ng'ata goobalool Gora sea fugaaschi sean bwatgeat, ak gwayeesha, “Sakteayda gayghoahiimu NG'UTAMIIDA fugaaschi geabeang'a, ak ea ng'eaha siida ghaydit, ak ea ng'eaha siida jea ghwanung' gawa headaanyi; aba gideaba, siida jea ghwaloat niny dea jea gawa heeda.

⁶ Asina ng'asheanji; ageani haleanjeeda sigwariideawa hideeda, Gora sea fugaaschi sean bwatgeat;

⁷ ayiina beasta, ak numuji ghoayiinyi hideeda badayda aba madeeda NG'UTAMIIDA; ak abeeda siida jea ghwaloat NG'UTAMIIDA, gayghoah siida ghaydit; agooga noosheagiichi, fuga Lawi!”

⁸ Ghwalamda Musa ak gwayeesha Gora, “Asi oaleaydiit, orjooga Lawi;

⁹ Neada iyoong'ulayi agooga ng'asheanji ea mwanang'i aba heedeang'wa, gideaba ASEETA Israeli ghwasajeagwa aba jeeda fuga bwatgeat bea Israeli, ak abeeda ghwaadeagwa headaanyi; ak goosinyi gadiyeeda aba gheeda NG'UTAMIIDA, ak ghoamiinaadi aba madeeda girgweageeda ak googadiyeesi;

¹⁰ ea gideaba niyeaneey gooneekiinyi, sea orjooga giyeang'wa sean was orjooga Lawi sea ang'iing'i? Ama agooga googasayi eara ashoohoocheanduumeeda?

¹¹ Asi iisunu ang'iing'i sea fugaagu sean bwatgeat noabwachi geat nea magasa NG'UTAMIIDA; ama Haruni, niny gooniiksi aba naaha?”

¹² Ng'ata goojeakta Musa buuneeda gaguursa Datani sea Abiramu, orjooga Eliyabu; ak gwayi saawa, “Aseasa majeapkaana.

¹³ Ng'asheanji ea mwanang'i gideaba giiruunaneasa ng'eanyiida nyiit eanooga ea maleeda, ak gibwarjeasa aba dareapcheeda, ak eara aba ng'asheesu giidiing'u geaw ang'iing'i ea heeni muuchi aba heedeanya?

¹⁴ Ak ea miyeaneasa ng'eanyiida nyiit eanooga ea maleeda, ak ea mii gooneasa madameega jea eehearana, ea madameega sabiibu; neada gigasayi ng'uda gheanyangeaba fiisu?”

¹⁵ Hean ghwanyareas Musa muuchi, ak gwayeesha NG'UTAMIIDA, “Adumwasi haleanjeeda nyaawa bea ghadooweeda; aniini miidageandeawa saawa eara digeanagi, ak ea mii dasawan eara siyagi aba jeenyaawa.”

¹⁶ Ng'ata gwayeesha Musa Gora, “Ang'iing'i ea girgweageadaang'u sean numuji apkaani hiji bea madeeda NG'UTAMIIDEAN, ang'iing'i, ea saawa, ea Haruni;

¹⁷ ak ea daba siisi geanu gidaanyi sigwariideawa hideeda, ak ghwayiin hideeda jeeda, ak gooyeadu madeeda NG'UTAMIIDA, haleanjeeda sigwariideawa hideeda hita bughalaji iyeenya ea haradam ea damanamughuush; ak eara ang'iing'i ea Haruni ea daba siisi mideawa gidaanyi gwariideawa hideeda.”

¹⁸ Ak gaba siisi geanu gidaanyi gwariideawa hideeda, ak ghwayiin beasta jeeda, ak ghwayiin hideeda jeeda beasta, nea ghamiinaada aba ghuuta maheemajeanda siroondooscheesa, sea Musa ea Haruni.

¹⁹ Hean ghabwada geat Gora girgweageeda sean nea gang'ula saawa aba ghuuta maheemajeanda siroondooscheesa; ak ghwahidu giigheambiita NG'UTAMIIDA madeeda fuga sean bwatgeat.

²⁰ Ng'ata goobalool NG'UTAMIIDA Musa ea Haruni, ak gwayeesha,

²¹ “Asaja geat aba jeedeaba fiisu bwatgeadiin, ak abeeda ghaalamwaji dalas uhuuda.”

²² Hean ghoabeada nea ghabwada jeesinga ng'eanyi, nea gwayi, “Ea ASEETA, ASEETA bea gurooruunatka gilinyoo gwandeawa saseeda, gaygwasin siyagi riing'eeda, ak gaynyareeksiina fuga sean bwatgeat?”

²³ Ak gwayeesha NG'UTAMIIDA Musa,

²⁴ “Eeshiina fuga bwatgeat, Ang'amwana heeda neekeewa giibinda Gora, ea Datani, ea Abiramu.”

²⁵ Hean ghang'eat Musa ak gaweesa Datani ea Abiramu; sea gweargwa Israeli ak goodeayi.

²⁶ Goobalool fuga bwatgeat, ak gwayeesha, “Geamuscheegwa ang'amwana jeedeaba maheemajeandeaba fiisu munyasiin, nea adoasachi gida wassean itaanyaawa, adealas uhuudeang'wa aba riing'eega nyaawa.”

²⁷ Ak ghang'amwa heeda neekeewa giibinda Gora, ea Datani ea Abiramu aba meadajeega sean; ak gwarita jarooda geaba Datani ea Abiramu, ak ghamiinaada aba ghuusiga maheemajeega nyaawa, sea gadeemga nyaawa, ea orjooga nyaawa, sea diibiga nyaawa manang'i.

²⁸ Ghwalamda Musa ak gwayeesha, “Aba ng'asheanji gajanala gideaba goojeaknean NG'UTAMIIDA, dasin gadiyoojusu seaniin; aba gideaba measini aba fughareedeanyu aniini.

²⁹ Fiisu iimeewa miyeeda gealaan, ghameawda gidameewiida buuneesean, ghana ghwanyas habitkweeda uurji dea nyasa buuneesean; abeeda aniini ea meajeaknean NG'UTAMIIDA.

³⁰ Nea iisin NG'UTAMIIDA ng'asheandeesh, ak ghwajaat ghuut ak ghwanukghuta fiisu sea haleanjeeda nyaawa, ak gaweay gheeda maloonghajeega, abeeda gajanala gideaba fiisu nifool NG'UTAMIIDA.”

³¹ Hean nea ghoahiit balooldeaba ng'asheesu seaniin, ghabwaasha ng'eanyiida was dea miinaadawa;

³² ak ghoabwara ghuut ng'eanyiida ak ghwanukghuta, sea fuga gealga nyaawa, sea buuneesean ang'waay geat sea Gora, ea haleanjeeda nyaawa sean.

³³ Ak saawa ea fuga sean mideawa, ghwararang'aada gaweay jeeda gheeda maloonghajeega nea majeekcheewi; ak gwadukuta ng'eanyiida saawa, ak goosha ghang'amwa jeeda fuga bwatgeat.

³⁴ Nea abeeda fuga Israeli mida murdajeega nyaawa gwasalda aba shooka nyaawa; aba gideaba gwayi, “Gajiidu gwayamu geaw ng'eanyiida ak ghwanukghutaneasa eara aseasa!”

³⁵ Ak gwashuubean beasta leabu heeda NG'UTAMIIDA, ak ghwalas uhuuda fuga nyiit bughalaji iyeenya ea haradam ea damanamughuush ghwarda hideedean.

Haleanjeeda sigwariideawa hideeda

³⁶ Ng'ata goobalool NG'UTAMIIDA Musa ak gwayeesha,

³⁷ “Eeshiina Eliyasari orjeeda ashoohoocheanda was Haruni, geanda haleanjeeda sigwariideawa hideeda aba heeda beasta; ak giidaardi beasta aba gideaba dabidi ea ghaydidi,

³⁸ haleanjeeda sigwariideawa hideeda bea fuga sin riing'eeda aba badahuuka eaweega nyaawaan, ak geetaay gamaning'iidi ak ghoah gichea eedukuteawa heeda wagiida, aba gideaba ghoadayda aba madeeda NG'UTAMIIDA; ak ea ghaydidi; gayghoah gwadeagooda aba heeda fuga Israeli.”

³⁹ Ng'ata gageanu ashoohoocheanda was Eliyasari haleanjeedida sigwariideawa hideeda sisna lagheanga oomng'i adayda fuga silas uhuuda; ak ghoadaay ghoah gida jea eedukuteawa ghuuta heeda wagiida;

⁴⁰ ak ghoah gichea goopkeadi fuga Israeli, ak abeeda rabascheanda wassean maba jeata Haruni, ea adagwaneekiit ghaghwarda hideeda aba madeeda NG'UTAMIIDA; ea mawuurji sea Gora, ea buuneadaanyi; gawuurji gidabaloolda NG'UTAMIIDA niny, aba geatinda Musa.

Haruni gwalealu buuneeda

⁴¹ Iimuchu eaweeteaba iyeenya gooniiksa fuga sean bwatgeat bea Israeli Musa, ea Haruni, nea gwayeesha, “Agooga noabwarji fuga NG'UTAMIIDA.”

⁴² Hean nea ghabwatgeat buuneeda nea ghwala bwadaw Musa, ea Haruni, goong'weersa murdeeda maheemajeanda siroondooscheesa; ak ging'ulayi, shamooghoodida gwadukuta maheemajeanda, ak geadaah giigheambiita NG'UTAMIIDA.

⁴³ Ak gaweay Musa ea Haruni madeeda maheemajeanda siroondooscheesa.

⁴⁴ Ng'ata goobalool NG'UTAMIIDA Musa, ak gwayeesha,

⁴⁵ “Ang'amwana jeeda fuga bwatgeat, ak abeeda ghaalamwaji dalas uhuuda.” Ak ghoabeada ak ghabwada jeesinga ng'eanyi.

⁴⁶ Ghwalamda Musa ak gwayeesha Haruni, “Asi geani gida igwariideawi hideeda, ak giyiini beasta jeeda, was beasta heeda wagiida, ak giyiini hideeda jeeda beasta, ak gilamwaji aada ea ahiita jeeda fuga bwatgeat, ak gisini giiduupcheeda; aba gideaba nyarasta gwaleabu heeda NG'UTAMIIDA; ak ea ning'eat dawni.”

⁴⁷ Hean ghoang'waay Haruni gidagwariideawa hideeda gawuurji gidarukusiinda Musa, ak ghafwach ea ghwahita jeeda fuga bwatgeat; ak ging'ulayi, ning'eat dawni aba jeeda buuneeda; ak ghwayiin hideeda jeeda beasta ak gwasin giiduupcheeda aba badahuukeaba fiisu.

⁴⁸ Ak ghamiinaada aba bugusta fiisu meewean ea deaba fiisu duu gwandean; ak geereekusa dawni.

⁴⁹ Nea fuga meewa aba dawni ea sagalamnyooji damanang'wan ea bughalaji ispwa, ak ghwanaawa mooneeda fuga meewa aba giidiinyeanda Gora.

⁵⁰ Ak gabiikta Haruni heeda Musa aba ghuuta maheemajeanda siroondooscheesa; ak geereekusa dawni.