IITOODA 15 - Bibliyeeda Ghaydit

Deaweedeeda haleanjeeda ghadooweeda sisabwa geadi

¹ Hean ghwalamda NG'UTAMIIDA ak gwayeesha Musa,

² “Eeshiina fuga Israeli, Iyooweayi jeeda ng'eanyiida jea oopiidana, ghayi eagoonyeegwa,

³ ak ghoatawji NG'UTAMIIDA aba jeeda dugwa ghana jeeda nooga haleanjeeda ghadooweeda sighwarda, ghana haleanjeeda sighwarda bea ghadooweeda, ghana lukghumajeega, jea ghoahiit gida sirat ghana haleanjeeda ghadooweeda siitayda nea geegasa ghana gea ghweelmoojigeagwa siloat, ak ghoanung' ghoah shearooda ng'andit aba heeda NG'UTAMIIDA,

⁴ nea siida eadu haleanjeadaanyi bea ghadooweeda gayghoadaw NG'UTAMIIDA haleanjeeda ghadooweeda was booga was gideaba damanamughuush bea gilooyda dearanga miyaas, siikuuyi sea gideaba ang'wan bea gideeshteayda nagheeda;

⁵ ea difaayeeda was haleanjeeda ghadooweeda sileeha, ea gideaba ang'wan was gilo, ak gaysinuudayeena sea haleanjeeda ghadooweeda sighwarda, ghana aba lukghumeeda, giliwas gisilleanda.

⁶ Ghana aba lagweenda, gaysina haleanjeeda ghadooweeda bea booga giloohaji iyeenya sidaksiinyi sea nagheeda nyiit jupajeanjagi ea dea agweena iyeenya ak geatayda ghoah haleanjeeda ghadooweeda was booga;

⁷ ak haleanjeeda ghadooweeda sileeha was bayoagagi ea dea agweena iyeenya bea difaayi, ak gwasissa shearooda ng'andit haleanjeeda ghadooweeda ak ghwanung' gahoosan NG'UTAMIIDA.

⁸ Iimuchu nea gigasayi adayda heeyda ghadooweeda jea eaghwarda, ghana ea haleanjeeda ghadooweeda sinuus, aba geandeayda gida sirat, ghana ea haleanjeeda ghadooweeda bea hoyyoo gil bea NG'UTAMIIDA;

⁹ ak abeeda gajadayda sea danyi haleanjeeda ghadooweeda was booga was gideaba bea samwagu bea damanamughuush bea gilo bea booga miyaasiin siikuuyi sea nagheeda agweena iyeenya gikoombe.

¹⁰ Ak gajadayda gikoombeeyda agweena iyeenya bea difaayi ghoah haleanjeeda ghadooweeda sileeha, was haleanjeeda ghadooweeda sighwarda ghoah shearooda ng'andit jea goohoosan NG'UTAMIIDA.

¹¹ “Nih gichea eesin gil aba giliwas dayi, ea aba giliwas lagweenda, ea aba giliwas dayeenda gisilleanda was lagweenda, ghana giliwas dayeenda mbooyda.

¹² Aba giteena mooneeda haleanjeeda jea eatayda, nih gichea asina gil aba giliwas gil aba giteena mooneeda nyaawa.

¹³ Fuga sean sijiilsa ghaheang'wa gaygwasin ng'asheesu seaniin nea gagala nih aba eanooga haleanjeeda ghadooweeda sighwarda, jea ghoah shearooda ng'andit jea goohoosan NG'UTAMIIDA.

¹⁴ Ama mida rabascheanda jeedeang'wa, ghana siida wassean mida bugusta jeacheengeagwa, ak gagasa ghoadayda haleanjeeda ghadooweeda sighwarda, jea ghoah shearooda ng'andit jea goohoosan NG'UTAMIIDA; eara niny gaygwasinda gidoosiniidi agooga.

¹⁵ Nea aba jeedeaba girgweageeni, gaygwanda digheanjagi heedeang'wa agooga sea rabascheanda mida jeedeang'wa; nih diigheanda manda muudeanooda aba jeeda jeacheengeagwa; nea gidoowuurjeewi agooga, eara rabascheanda gaygwasnu aba madeeda NG'UTAMIIDA.

¹⁶ Gaygwanda deaweedeanagi ea digheanjagi aba heedeang'wa agooga sea rabascheanda mida jeedeang'wa.”

¹⁷ Ng'ata goobalool NG'UTAMIIDA Musa ak gwayeesha,

¹⁸ “Abaloola fuga Israeli ak giyeeshi, Iyoahiti jeeda ng'eanyiida aayaacheegwa,

¹⁹ ak damanda jea ayaagana hamiteaba ng'eanyiini gajoatawa NG'UTAMIIDA haleanjeeda ghadooweeda sigatkat.

²⁰ Nea aba dearangeagwa bea booga madeeda gajoatayda mukaatajeega ghoah haleanjeeda ghadooweeda jea eegatkat; gawuurji gidoohiniidi haleanjeeda ghadooweeda sigatkat bea heeda bugharjeanda silakiisa booga, asi nih gida jea agatkata.

²¹ Boogeagwa bea madeeda was dearangeagwa gajoatawa NG'UTAMIIDA, haleanjeeda ghadooweeda sigatkat, aba jeeda jeacheengeagwa.

²² “Nea iyootiinyi, nea moobaysiini ak ea moang'waanyi ng'asheega sean rukusa NG'UTAMIIDA Musahiin,

²³ nea galanya iimoang'waanya buuneeda ng'asheega sean ghayi rukusa NG'UTAMIIDA Musa,

²⁴ ama deepa ea giidiinyeanda sisin nea meanala, nea gwadeepa ea mwanala girgweageeda, abeeda gayghoadayda girgweageeda sean eeshpajakcheanjagi mwanang' ghoah haleanjeeda ghadooweeda sighwarda, ghoah shearooda ng'andit aba heeda NG'UTAMIIDA, sea haleanjeadaanyi bea ghadooweeda was booga, ea haleanjeeda ghadooweeda sileeha, gawuurji gidanyaashta diigheanda, ea ghwaranyagi ghoah haleanjeeda ghadooweeda aba badayda riing'eeda.

²⁵ Ak gaygwasin ashoohoocheanda giiduupcheeda aba badayda eemeeda bwatgeat sean bea Israeli, ak gajeesamsa; aba gideaba nih giidiinyeanda, ak ea niyeadu saawa haleanjeeda nyaawa bea ghadooweeda, was haleanjeeda ghadooweeda siitaw NG'UTAMIIDA sighwarda, ea haleanjeeda nyaawa bea ghadooweeda aba badayda riing'eeda nyaawa;

²⁶ ak abeeda fuga bwatgeat bea Israeli gajeesamsa, sea rabascheanda mida jeenyaawa; aba gideaba jeedeaba fiisu seaniin, ng'asheanji geesin nea meanala.

²⁷ “Nea iisin siyagi riing'eeda nea mwanala, gaygweadu mbooyeanjagi saawaat bea gwanyagi ghoah haleanjeeda ghadooweeda aba badayda riing'eeda.

²⁸ Ak gaygwasin ashoohoocheanda giiduupcheeda aba badaydeaba siisi adiiyiin, iisin riing'eeda nea mwanala, aba madeeda NG'UTAMIIDA, ak gwasin giiduupcheeda aba badaydaanyi; ak gajeesamsa.

²⁹ Gajoang'waanya deaweedeanagi aba siida sin ng'asheanda wassean nea mwanala, aba siisi sijiilda heedeang'wa was jeeda fuga Israeliin, ea aba heeda rabascheanda mida jeenyaawa.

³⁰ Nea siida sin ng'asheanda wassean nea gabaysa, ada ea siideaba ng'eang'i, ada ea rabascheanda, abeeda goong'eawi NG'UTAMIIDA; abeeda siisi gajeasach aba jeeda fugaaschi.

³¹ Aba gideaba nifool ng'asheanda NG'UTAMIIDA, ak gafool ng'asheagaaschi; siisi gajeasach, ak gaygoobiida munyindaanyi badaydaanyi.”

Siida datas sabaato

³² Eaweecha nea gwanda fuga Israeli dareapcheeda, ghwadaah siyagi nea gabit ghweenga eaweeda sabaato.

³³ Ghwadaa fiisu nea gooliim ghweenga ak geayaat heeda Musa ea Haruni, ea heeda fuga sean bwatgeat.

³⁴ Ak geayaat ghealooniga, aba gideaba, miyeergu gida jea eesima siida sunu.

³⁵ Gwayeesha NG'UTAMIIDA Musa, “Siisi gajeabwar; gaygafuta eemeeda sean bwatgeat lagheanga aba riteayda museasooda.”

³⁶ Hean ghwaat eemeesean ea gooruuteawa museasooda, ak gafuta lagheanga ea ghami; gawuurji gidarukusa NG'UTAMIIDA Musa.

Deaweedajeega seapseapta

³⁷ Ng'ata goobalool NG'UTAMIIDA Musa ak gwayeesha,

³⁸ “Abaloola sea fuga Israeli ak giyeeshi, asisiina weeloojiga hang'weakeagwa seapseapta, aba jeeda jeacheenga nyaawa, ak giyeeshi ayiina giliwas seapseapcheanda gulbeenga oomng'i;

³⁹ ak gayghoah aba heedeang'wa seapseapta, ak abeeda goong'ulayi, ak ghoapkaachi ng'asheega sean bea NG'UTAMIIDA, nea goosinyi; nea mooweelweeli aba gidagasa gurooruunatkeagwa agooga, ea gheanyangeagwa agooga, ghayi oogaseadayi aba hiseadayeanduumeeda;

⁴⁰ ak abeeda ghoapkaachi sinooda ng'asheegeasu sean nea ghoahuuyi fuga ghaydidi aba heeda ASEETEANG'WA.

⁴¹ Aniini geawooschi NG'UTAMIIDA, was ASEETEANG'WA ghayi eeyeananeegwa ng'eanyiida Misri, ak abeeda ghaahuuyi ASEETEANG'WA; aniini geawooschi NG'UTAMIIDA, was ASEETEANG'WA.”