IITOODA 14 - Bibliyeeda Ghaydit

Buuneeda ghoaniikgh

¹ Ng'ata goojuur buuneesean bwat geat nea gooyeawda; ak goobuutu buuneeda dabeaka eaweedida.

² Hean gooniiksa buuneesean bea Israeli Musa ea Haruni; ak gwayeesha buuneesean bwat geat, “Gwachi ghang'wana geemeewiisi ng'eanyiida Misri, ghana gwachi ghang'wana geemeewiisi jeedeaba dareapcheeni.

³ Anda NG'UTAMIIDA gweaneasa ea ghoahiineasa jeedeaba ng'eang'i ak geesheali aba ng'uta? Gayghoah gadeemgaasa ea diibigaasa soomjooga; neada ea mang'wana geebiikti ng'eanyiida Misrihi?”

⁴ Ng'ata gwayeesha geat, “Eegeana siida jea ghoahaaghwaneasa, ak geebiikti ng'eanyiida Misri.”

⁵ Hean ghoabeada Musa ea Haruni ak ghabwada jih ng'eanyi aba madeeda fuga bwat geat bea Israeli.

⁶ Nea Yoshuwa orjeeda Nuni, ea Galebu orjeeda Yefune, gaba jeeda fuga weay gagwalsa ghaang' ng'eanyiida, hean ghabwaashaada hang'weaka nyaawa,

⁷ ak goobalool fuga sean bwat geat bea Israeli ak gwayeesha, “Ng'eanyiidida ghayi sisikchi bugusta nea geegwalsi ghaang'iin, ng'eanyiida miy gil ea ghwaraanya.

⁸ Ak iihoosan NG'UTAMIIDA aba badahuukaasa, gayghwayiineasa jeedeaba ng'eanyiini ak gagooneasa ghoah deanya, ak ea ng'eanyiida nyiit eanooga gil ea maleeda.

⁹ Asi adoanyareaschi NG'UTAMIIDA, ak ea adoawali fugiga bea ng'eanyiidean, aba gideaba saawa maygwasimaneasa gil; aba gideaba jirooneeda eawoojisu mida iheenga nyaawa sigeanda, ak NG'UTAMIIDA gwanda heedeanya; adoabeali.”

¹⁰ Ak ghwanung' buuneesean bwat geat eegasa eefu aba lagheanga. Ak geadaah giigheambiita NG'UTAMIIDA aba jeeda maheemajeanda siroondooscheesa, aba madeeda fuga sean bea Israeli.

Musa gamusiischeesa buuneeda

¹¹ Hean ghoanyaash NG'UTAMIIDA Musa gideaba, “Fiisu gaygafoolan ea ghoah eeju? Ak ea mayghamwasan ea ghoah eeju? Earapeadi neasinyi gwadeagwajeesu seaniin aba jeenyaawa.

¹² Gaydalas aba dawni, ak geageandi hearaniischooda nyaawa, ak gaydanung' huwa eemeeda haw, biissa gwandeawa uurda ea gaburdeawa saawa.”

¹³ Ng'ata ghwalamda Musa ak gwayeesha NG'UTAMIIDA, “Abeeda gayghwayiiy fuga Misri ng'asheesu, aba gideaba fiisu giyeadu aba uurdaang'u, aba jeenyaawa,

¹⁴ ak gaygwayeesha saawa fiisu bea ng'eanyiidean; niyiiy fiisu gideaba ang'iing'i NG'UTAMIIDA gindi jeenyaawa fiisu; aba gideaba ang'iing'i NG'UTAMIIDA goong'uli geat gheanyanga, nea shamooghoadaang'u ghamiinaada aba iheenga nyaawa, ak nea ang'iing'i gindi madeanyaawa giisheedeawi, aba daraneeda shamooghooda askweari, ea daraneeda beasta iihidu eaweeda.

¹⁵ Asi ghamneawa iibwardi fiisu gili siyagi, abeeda eemoojiga nyas iitaang'u gaygwayi;

¹⁶ ‘Nih gwasin gideaba NG'UTAMIIDA moamu gweadu fiisu jeedeaba ng'eanyiini ghayi aksa habeawooda gideaba gayghoadaw saawaan, asi nilas uhuuda aba dareapcheeda.’

¹⁷ Asi ghamneawa geamuscheey ang'iing'i, nung' gwaheedu uurda NG'UTAMIIDA, gawuurji gidinyaashti nea giyeeni,

¹⁸ ‘NG'UTAMIIDA ea garbabu nyaras, ak aahaw baydeaydaanyi, ak gwasamiisa munyinda giidiinyeanyeeka, ak ea mayghwanung' ea manda giidiinyeanda aba gheatkweakasean; maydanung'waada lasooda diibiga aba giidiinyeanda ghweaniga nyaawa, aba jeateaba samwagu ea deaba ang'wan.’

¹⁹ Geamuscheey samsiina giidiinyeandeaba fiisu, aba giteena hawunda baydaydaang'u, gawuurji gidisamsiindi fiisu, ghang'eada deaghayi bea ng'eanyiida Misri ea ghoah ghamneawa.”

²⁰ Ak gwayi NG'UTAMIIDA, “Aniini neasamsi aba ng'asheandaang'u;

²¹ Nea aba huumwa aniini, aba gideabiideati, ea gichea ghoanyiita ng'eanyiisean giigheambiita NG'UTAMIIDA,

²² aba gideaba fiisu seaniin, was gea nidaah giigheambiiteanyuun ea gwadeagwajeegeasu, ghayi easinyi aba ng'eanyiida Misri, ea hoowa bea dareapcheedean, ak ghoaraanya simoodeanyu ghamneawa niba damanamughuush, nea mooleeysiiniit ghuuteanyu;

²³ aba huumwa aniini geayi mayghwadaah ng'eanyiini ghayi eayaksi habeawooda ghweaniga nyaawaan, nea aba jeedeaba fiisu sean foolaniin ghanyea manda dea jea ghwadaa;

²⁴ amaduuku siideanyu bea gadiyeeda was Galebu, aba gideaba gwanda jeadaanyi guroorooda nuut, ak gweadu geeshteanyu aba gurooroadaanyi sean, gaydeadu niny ea ghwahidu ng'eanyiini hidu jeedean; ak gaygoombal jeacheangaaschi.

²⁵ Ak goobiida fuga Amaleki sea fuga Ganaani moangoachi; numuji ghoayamnyi geat, ak gooweayi dareapcheeda nea goosikchi naweeda gal basooda Shaamu.”

²⁶ Ng'ata ghwalamda NG'UTAMIIDA ak gwayeesha Musa ea Haruni,

²⁷ “Fiisu bwat geat munyasiin gaygooniikiisean ea ghoah eeju? Aniini naayiinyi giiniikghta fuga Israeli, nea ghoaniikgh aba badaydeanyu.

²⁸ Ayeeshiina, ‘Aba gideabiideati, gwarugu NG'UTAMIIDA, aba huumwa aniini aba gidoorukusiindi iidigeasu, nih gichea dasinneegwa agooga;

²⁹ gaygoobeedeaysa muscheekeagwa jeedeaba dareapcheeni, nea buuneesean siyiida aba jeedeang'wa, aba giteena mooneedeang'wa, ghang'eada fuga bea gweanyeew diktam ghana ghwanaawa, was fuga aniikseaniin,

³⁰ aba huumwa manda siyagi jea gawa jeeda ng'eanyiida eayeaksi habeawooda gideaba gajahearana, geaghus Galebu orjeeda Yefune, ea Yoshuwa orjeeda Nuni.

³¹ Nea diibigeagwa ghayi ooyeenyi gayghoah soomjooga, ea fuga jea danung' gaweay jeeda, ak gayghwanal saawa ng'eanyiida ghayi oaheawi.

³² Nea aba agooga, gaygoobeedeaysa muscheekeagwa jeedeaba dareapcheeni.

³³ Ak gayghoah diibigeagwa jeagiischoodiga aba dareapcheeda gweanyeew haradam, ak gaygageanda sareenda hiseadayeanduumeedeang'wa, bwak ea gooshealsa muscheekeagwa dareapcheeda.

³⁴ Nea aba mooneedeaba askwearjoojisu oogwalsiini ghaang' ng'eanyiita, aba askwearjooji haradamiin, aba giliwas askwearja aba jeeda gweayda, gajasareana munyasnacheekeagwa, gweanyeew haradam ak gajanala gideaba naanyareaschi.’

³⁵ Aniini neargu aba gideaba geawooschi NG'UTAMIIDA, aba huumwa nih gichea dasima fiisu sean bwat geat munyasiini, bwat geat aba badaydeanyu; gaygooshealsa jeedeaba dareapcheeni, ak ea heechea gameewiisa.”

³⁶ Nea fugiga ghayi ajeakta Musa gagwalsa ghaang' ng'eanyiidean, iidu nea gabiigu, ak ghabwat geat gooniiksa, aba gideateayda iita muy aba badaydeaba ng'eanyiita.

³⁷ Fiisu eadu iita muy aba badayda ng'eanyiidean, ghwalas uhuuda dawni aba madeeda NG'UTAMIIDA.

³⁸ Nea Yoshuwa orjeeda Nuni ea Galebu orjeeda Yefune, gaboos aba jeedeaba fugiga ghayi weay gagwalsa ghaang' ng'eanyiidean.

Simooda madeeda bea giing'ooyda ng'eanyiida

³⁹ Ng'ata gwarukusa Musa fuga Israeleesean ng'asheesu; ak ghoaniikgh muuchi buuneesean.

⁴⁰ Hean ghang'eat ng'eat sakteayda duu, ak gwading'da giijeeda ea ghwahita uhuuda, nea gwayi, “Ang'ula aseasa geendi hiji, ak gajeescheang'da eeweaya heeda ghayi rukuneasa NG'UTAMIIDA; aba gideaba siitiinyi.”

⁴¹ Ghwalamda Musa ak gwayeesha, “Ghwasaan agooga inyas ghamneawa ghoaheawi diigheanda NG'UTAMIIDA? Aba gideaba ng'asheanji maygwasa.

⁴² Asi adoascheang'di, aba gideaba NG'UTAMIIDA manda jeedeang'wa; adiidu gealaseagwa ak geabwanyeagwa aba madeeda weajoodigeagwa.

⁴³ Aba gideaba fuga Maleki ea fuga Ganaani gwanda madeedeang'wa ak gajeabwareagwa aba ng'uta, aba gideaba noobiikti bwadaw ak ea moayaadi geeshta NG'UTAMIIDA, asi gaygwanung'useegwa heeda NG'UTAMIIDA.”

⁴⁴ Iidu gabadaksa gwading'da giijeeda ea ghwahita uhuuda, nea sandakwajeanda neajeeda bea NG'UTAMIIDA ea mariteawana jeeda museasooda, ak eara Musa ea marita.

⁴⁵ Ng'ata ghwararang'aana fuga Maleki ea fuga Ganaani abiita ng'eanyiida heayeeniga ak gang'uchi ea ghwajoar saawa ea ghwahita Horma.