IITOODA 13 - Bibliyeeda Ghaydit

Fuga ghwalda ghaang'

¹ Ng'ata ghwalamda NG'UTAMIIDA ak gwayeesha Musa,

² “Ajeakta fuga jea gaweay ghaghwalda ghaang' aba jeeda ng'eanyiida Ganaani, was dea ghayi aadawji fuga Israeli; ak aba giliwas eamwa aba gealga ghweaniga nyaawa gajageani siyagi, ak giliwas sih gajaahaw aba jeenyaawa.”

³ Ak goojeakta Musa ghabeawa dareapcheeda Barani gawuurji gidarukuteayda NG'UTAMIIDA; nea fiisu seaniin ea fuga heesi aba jeeda fuga Israeli.

⁴ Ak gheawunga nyaawa ea suh; aba jeeda eemeeda Rubeni, Shaamuwa orjeeda Sakuri.

⁵ Aba jeeda eemeeda Simeoni, Shafati orjeeda Hori.

⁶ Aba jeeda eemeeda Yuda, Galebu orjeeda Yefune.

⁷ Aba jeeda eemeeda Isakari, Igali orjeeda Yosefu.

⁸ Aba jeeda eemeeda Efraimu, Hosheya orjeeda Nuni.

⁹ Aba jeeda eemeeda Benjamini, Balti gil orjeeda Rafu.

¹⁰ Aba jeeda eemeeda Sabuloni, Gadieli orjeeda Sodi.

¹¹ Aba jeeda eemeeda Yosefu, nea ea fuga eemeeda Manaseehi, Gadi orjeeda Susi.

¹² Aba jeeda eemeeda Dani, Amieli orjeeda Gemali.

¹³ Aba jeeda eemeeda Asheri, Seturi orjeeda Mikaeli.

¹⁴ Aba jeeda eemeeda Naftali, Nabi orjeeda Wofsi.

¹⁵ Aba jeeda eemeeda Gadi, Geueli orjeeda Maki.

¹⁶ Suh gheawunga fuga ajeakta Musa gaweay gagwalsa ghaang' ng'eanyiida. Nea Hosheya orjeeda Nuni, gang'asa Musa gheawunga siguura Yoshuwa.

¹⁷ Ak goojeakta Musa gaweay gagwalsa ghaang' ng'eanyiida Ganaani, ak gwayeesha, “Ascheang'da aweayeena ea ahita Negebu ak gooscheeng'si ng'eanyiida giijeega,

¹⁸ ak ghoadaayi ng'eanyiida, giduurji; ea fuga mida jeeda, ea fuga meanyi gil ghana ea fuga heali, ak ea ng'ay ghana saang'a;

¹⁹ ak ng'eanyiida abiita ea ng'eanyiida miyi ghana muy; ak goobiita museasooda ghana gealga siimajeek;

²⁰ ak ea ng'eanyiida uurjiini, ng'eanyiida miyeeneadi ghana bearji jalooda, ak gwanda dareabeeta ghana mandana. Asi oomajeega geat ak gooyeadu haghweega ng'eanyiida.” Nea aba damandida ea damanda heasa haghweega madeeda bea sabiibu.

²¹ Hean ghwascheang'da ghaghwalda ghaang' ng'eanyiida ghang'eada dareapcheeda Sini ea ghwahita Rehobu, ea ghwahita jeeda Hamati.

²² Ghwascheang'da ea ghwahita Negebu, ak ghwahita Hebroni; ak ghwanyas hoowa Ahimani, ea Sheshayi, ea Dalmayi, ea orjooga Anaki. (Nea Hebroni ghayi geadeas ak ghang'ata gweanyeew ispwa nea miyeadeas mujiineeda Soani mida ng'eanyiida Misri.)

²³ Hean ghwahita moangoachiyda Eshkoli, ak gwalagu aba hoowa damealeanda sabiibu mideawa haghweega, ak ghwasareana fih iyeenya geeta aba gheatkweaka nyaawa; ak gweadu eara goomamaanga ea shaboogheeta.

²⁴ Mwangwachiydida geeguura moangoachiyda Eshkoli aba damealeandida ghayi lagu fuga Israeli aba hoowa.

²⁵ Hean gabiigu nea nigwalsa ghaang' ng'eanyiida, nea ning'ata eawooji haradam.

²⁶ Gaweay ea ghwahita heeda Musa, ea heeda Haruni, ea heeda fuga bwat geat sean bea Israeli, aba dareapcheeda Barani, aba Gadeshi; ak gweasa saawa iita, ea fuga sean bwat geat, ak goohiimsa saawa haghweega ng'eanyiida.

²⁷ Ak geeyeesha niny, “Aseasa geeleabu ng'eanyiida oocheaktaneasa; gagulda eanooga ea maleeda, ak ea sukwa haghweagaaschi.

²⁸ Iidu buuneeda abiita ng'eanyiita ea meanyi nea mujiinajeega nyaawa ea majeekcheewi, ak ea hees muuchi; ak geabwadi geadaayi aba hoowa orjooga Anaki.

²⁹ Amaleki goobiita ng'eanyiida Negebu; ea fuga Hiti, ea fuga Yebusi, ea fuga Amori nea goobiita giijeega, ea fuga Ganaani goobiita ghuuta basooda; ea murdeeda giigheawda Yordani.”

³⁰ Ak ghwanung' Galebu ghwasiinda buuneeda aba madeeda Musa, ak gwayeesha, “Eaniyean anung' eascheang'da nea gealamwajaadi, ak geaghaschi; aba gideaba geamuuschi eajoara.”

³¹ Ak gwayi fugiga gwachi adeayi sea ninyiin. “Meamuusi eascheang'da eeng'ucheewana fugiga; aba gideaba gwandeawa uurjeenga ea gaburdeaweesa.”

³² Hean gweasa fuga Israeli iita muy bea ng'eanyiita ghayi gwalsa ghaang'iin, ak gwayeesha, “Ng'eanyiidida ghayi sisikchi jeeda eegwalsiina ghaang'iin, ng'eanyiida aga fuga mida jeeda; nea buuneesean sideaksi jeeda ea fuga geawi muuchi.

³³ Ak aba hoowa geadaayi eemeeda Nefili, was orjooga Anaki, was fuga rinna jeedeaba fiisu bea Nefiliin; ak geeng'ulayi geat ak geewuurjeewi dakajeega; ak eara saawa ea gitaaktaneasa.”