IITOODA 12 - Bibliyeeda Ghaydit

Miriyamu gealas

¹ Iimuchu gabalool Miriyamu sea Haruni badayda Musa aba badayda gatmooda eemeeda Gushi ghayi ghoah; aba gideaba nighi gatmooda eemeeda Gushi.

² Hean gwayi saawa, “Huumwa gil NG'UTAMIIDA neada goobalool Musa ak ghwahidi? Neada ea meabaloaleasa eara aseasa?” Hean ghwayiiy NG'UTAMIIDA ng'asheega nyaawa.

³ Nea abeeda siisi was Musahiin ea siida garbabu muuchi gil ea ghang'al buuneesean mida badayda ng'eanyiida.

⁴ Ng'ata gwasham, NG'UTAMIIDA Musa ea Haruni ea Miriyamu ak gwayeesha, “Arita jarooda agoogeeni asamwaguun, aweayeena jeeda maheemajeanda siroondooscheesa.” Hean gwarita jarooda fiisu asamwaguun.

⁵ Ak ghwararang'aan NG'UTAMIIDA aba jeeda daraneeda shamooghooda, ak ghamiinaada aba ghuuta maheemajeanda, ak gaguursa Haruni sea Miriyamu, ak gwardu jarooda duwaawi.

⁶ Ng'ata gwayeesha, “Asi ayiinya ng'asheegeasu; iimida sibaneeda jeedeang'wa, abeeda, aniineeda was NG'UTAMIIDA, gaydeahiimsa geaw niny aba jeeda giirgweatka, ak gaydeabalool niny aba jeeda giirgweatka.

⁷ Maygawuurji giduurji aba heeda siideanyu bea gadiyeeda, was Musa; niny ea garbabu aba jeedeaba gheenyu sean;

⁸ Niny gaydeabalool nea geeyamutooschi ghuut, aba gideaba gaydawoos daachi nea mii gwadeagooda; ak niny gayghwadaah ratooda NG'UTAMIIDA. Abeeda ghwasaan agooga inyas moawali arukunana ng'asheega munyas badayda siideanyu bea gadiyeeda, was Musa?”

⁹ Hean ghwayeat nyarasta NG'UTAMIIDA aba badahuuka nyaawa; ak ghang'eat gawa heechea gawa.

¹⁰ Ng'ata ghabeawa shamooghoodida uhuuda maheemajeanda; ak ging'ulayi, Miriyamu ghwanyas udamusuura, ak gaweeshiit ea ghawaar gapkeanda; hean gang'ula Haruni Miriyamu, ak ging'ulayi, ninyas udamusuura.

¹¹ Hean gwayeesha Haruni Musa, “Ea ng'utamiideanyu, geamuscheey muuchi, adiyiini badahuukaasa riing'eeda, aba gideaba sisinyi ng'asheega leendeeda, ak geesinyi riing'eeda.

¹² Geamuscheey, adagawuurji siida ghayi meah, was dea niyaak banyeagaaschi meatkweanagi siyaak damanda rinna aba jeeda ghaamwat.”

¹³ Ak gooyeawusa Musa NG'UTAMIIDA, ak gwayeesha, “Ahaabwa, Ea ASEETA, geamuscheey ang'iing'i.”

¹⁴ Ghwalamda NG'UTAMIIDA ak gwayeesha Musa, “Inyeeda gwachi goong'uusha ghwaan gheanyanga gwachi mayghabwaspwas ea ghwahita askwearjoojiga ispwa? Ghang'wana geerasa badayda museasooda askwearjooji ispwa, amang'ata geebiikta eeteelu gah gicha.”

¹⁵ Asi Miriyamu geerasa riteayda museasooda eawooji ispwa; ak ea maneayi buuneeda ea eeteelu Miriyamu gah gicha.

¹⁶ Iing'ata hiji hean gabiisa gwaneayi buuneeda ghang'eada Haseroti, ak gwasin museasooda aba dareapcheeda Barani.