IITOODA 11 - Bibliyeeda Ghaydit

Ng'eanyiida siguura Dabera

¹ Iimuchu ghoang'eat buuneeda giiniikghta, ak gwarugu ng'asheega munyas ak ghwayiiy NG'UTAMIIDA; hean iiy NG'UTAMIIDA ng'asheesu, hean ghwanyareas; ak ghwayeat beasta NG'UTAMIIDA aba badahuuka nyaawa, ak ghwaak ea gooneaweesa muudeanooda museasooda.

² Hean gooyeawusa buuneeda Musa; ak gamus Musa NG'UTAMIIDA, ak gamis beastida.

³ Ak geeguura gheawungeaba ng'eanyiita Dabera; aba gideaba nih heeda yeada beasta NG'UTAMIIDA aba jeenyaawa.

Giiniikghta buuneeda

⁴ Nea gwanda fuga mwaatkwa adeayi sea saawa gasa haleanjeeda muuchi. Ak gabiikta gooyeawda fuga Israeli, nea gwayi, “Inyeeda geanyaschi banyeega jea eayaaga!

⁵ Geapkaachi ghweayeega ghayi siyeagayi aba ng'eanyiida Misri mwadaagha; ea njooriida, ea musukwa, ea nyeanyiida, ea gituunguru, ea gituungurooda ng'weani;

⁶ ak ghamneawa ea nigajeamiidi gurooruunatkaasa; ak ea meendeawani hamita geaghus maanaheeni ak ghwahit.”

⁷ Nea maana geegala geat sea gheang'nyeanda gibeerjeanda, nea oormeadaanyi gagasa ghawaar booreega.

⁸ Ng'ata gwaneayi buuneeda nea ghoawaam, amang'ata ghang'aal aba badayda lagheaneeda sing'ealiida, ghana gagul aba gunyooda, amahit ghoawaala dahuuda, ak gwasin mukaate; nea samneadaanyi gwasamu dea nagheeda duwea eesh.

⁹ Iidu nea ghoaptu rahooda bugusta eaweeda, ak goobissa museasooda, ghoaptu maanaheedida nea goodeana rahooda.

¹⁰ Hean ghwayiiy Musa nea gooyeawda buuneeda aba jeeda gealga nyaawa, giliwas sih aba ghuuta maheemajeandaanyi; ak ghwayeat nyarasta NG'UTAMIIDA muuchi, ak ghwanyareas Musa.

¹¹ Ghwalamda Musa ak gwayeesha NG'UTAMIIDA, “Ghwasaan inyas gisimanean ng'asheanda muy nea geawooschi soomjeandaang'u?

¹² Neada fiisu seaniin gearadanaani? Neada geajiilu aniini, inyas geeyi bwak ea rukunean ang'iing'i ng'asheesu, ‘Aadana daghataang'u uurjeewana ghweanda sar baleanda mwanang',’ ak giyaadi ea ahiita ng'eanyiida ghayi iyeaksi habeawooda gideaba gajadawa ghweaniga nyaawa?

¹³ Gaydanyasa yeenu banyeega jea daadaw fiisu seaniini? Aba gideaba gooyeawusean, nea gwayi, ‘Gooneasa banyeega, jea eayaaga.’

¹⁴ Aniini maydaamu dasar fiisu seaniin nea gabwageaw, sareenda ea durumwana muuchi aba heedeanyu.

¹⁵ Nea iisimanean ng'asheanji, abeeda gibwarjaan dami aba geeshang'su, nea iyaanyaschi alooheeda aba madeadaang'u ea adinung'waadi dang'uchi sawanadeedeanyu.”

Musa ghwaloat fiisu hees laadam ea damanamughuush

¹⁶ Hean ghwalamda NG'UTAMIIDA ak gwayeesha Musa, “Gakuunean fih laadam ea damanamughuush, aba jeeda gweargwa Israeli, was fuga inali ang'iing'i gideaba fuga hees gil mida madeedeaba fiisu, nea gwandeawa sugoodiga ahaaghwa; ak giyeadu ea ghwahidu heeda maheemajeanda siroondooscheesa, ak ghamiinaada aba hoowa sea ang'iing'i.

¹⁷ Ak gaydararang'aan aniini ak geabalooleey aba hoowa, ak gaydageanda meatkweenagi bea uurda guroorooda ghayi eagoonyeey ak ghaadawji fiisu; ak gayghwasar sareendeaba fiisu sea ang'iing'i ak ea misareani ang'iing'i nea gibwaageaw.

¹⁸ Ng'ata giyeeshi fiisu, ‘Oamiini geat nea mii ghwahita numuji, ak gajoayaaga banyeega; aba gideaba nooyeawusi iidiga NG'UTAMIIDA, nea gooyeenyi, “Gaygagooneasa ng'eaha banyeega jea eayaaga? Aba gideaba ghayi ghang'wana aba ng'eanyiida Misri.” Asi aba ng'asheanji gaygagooneegwa NG'UTAMIIDA banyeega ak gajayaaga.

¹⁹ Majayaaga eaweecheanjagi, ghana eawooji iyeenya, ghana eawooji muut, ghana eawooji damanamughuush, ghana eawooji diktam;

²⁰ gajayaaga sheeda mughuush, bwak ea gwarina sareenuukeagwa, ak gayghwargheagwa, aba gideaba noaheawi NG'UTAMIIDA mida jeedeang'wa, ak gooyeawdi aba madeadaanyi, nea gooyeenyi, “Ghwasaan inyas geerini ng'eanyiida Misri?” ’ ”

²¹ Ghwalamda Musa ak gwayeesha, “Fiisu eandi jeeda nyaawaan, ea sagalamnyooji bughalaji lah badiina geeshanga nyaawa; ak giyeeni ang'iing'i, ‘Gaydaadaw banyeega, jea ghwaak sheeda mughuush!’

²² Neada gajeenuuseada nooga ea dugwa aba badahuuka nyaawa, ak gwalang'u? Ghana jea eelealu ghweayeega sean bea basooda aba badahuuka nyaawa, ak ghoahiidi?”

²³ Gwayeesha NG'UTAMIIDA Musa, “Neada geatinda NG'UTAMIIDA ea nuwaasi? Asi ghamneawa gaydaaha ng'asheandeanyu ea jea ghoah huumwa aba headaang'u ghana manda.”

²⁴ Ng'ata gwarita Musa ak gwarukusa buuneeda ng'asheega NG'UTAMIIDA; ak ghabwada geat fih laadam ea damanamughuush was gweargwa, ak ghwanung' gwaneaweesa maheemajeanda.

²⁵ Hean gwashuubean NG'UTAMIIDA aba jeeda shamooghooda, ak gabalool sea niny, ak gageanda meatkweenagi bea guroorooda Musa, ak ghoadaw gweargiga alaadam ea damanamughuushiin; iidu nea ghwanyas gurooroodida, ghwaramoar, ak ea mudu gabiikta gwasin gicha.

²⁶ Ak geepuussa fih iyeenya hoowa bea museasoodean, ak gheawung'spa siyagi geeguura Eldadi, nea gheawungeaba siidida bea iyeenyean geeguura Medadi; ak gwashuubeesa gurooroodida; nea saawa gaba jeedeaba fugiga ghayi sing'waariin, nea abeeda ea maba jeeda fuga weay heeda maheemajeanda; ak ghwaramoar aba jeeda maheemajeanda.

²⁷ Ak ghafwach siyagi was gheareemaneeda, ak gawa gwarukusa Musa gideaba, “Eldadi ea Medadi ghwaramoar ng'asheega aba jeeda museasooda.”

²⁸ Yoshuwa orjeeda Nuni, was siida gadiyeeda Musa ghang'eada gheareemaneanduumeadaanyi, ghwalamda ak gwayeesha, “Ea siideanyu haw was Musa, nung' ghwasiinda aba ng'asheanji.”

²⁹ Ghwalamda Musa ak gwayeesha, “Ang'iing'i gishisean ghaang' aba gadiyeedeanyu; gidabal gwachi ghoah buuneesean bea NG'UTAMIIDA ashoohoodiga, nea ghoadaw NG'UTAMIIDA gurooroadaanyi.”

³⁰ Ng'ata gawa Musa jeeda museasooda, niny sea gweargiga bea Israeliin.

ASEETA gweadu udamughuushta

³¹ Hean ghaghuudu jeameeda leabu heeda NG'UTAMIIDA, ak gweadu udamughuushta leabu meatkweeda basooda, ak ghwanung' goobitpisa murdajeega museasooda sean ak gooyang'da beatpa eaweecheanjagi aba neaweesiinda nea mughuusheanda iisigal humng'eeda gwaramagu ghwahita geatin samwagu aba badayda ng'eanyiida.

³² Hean gabalak buuneeda aba askwearda sean, ea eaweesean, ea eaweeteaba iyeenya sean, ak ghoawaam udamughuushtida; nea siida nyas gea ng'ay madeeneawana gea buuneeda suurja ghwanyas giloohaji sagalama; ak ghoabwarghaan sean aba murdajeega sean neaweesa museasooda.

³³ Nea aba damani duu ea saang'eewa banyeega nea mii gwaduulu aba agitean, gwanyareeksa NG'UTAMIIDA buuneeda, ak ghwalas NG'UTAMIIDA buuneeda lasooda haw muuchi.

³⁴ Ak geeguura gheawungeaba ng'eanyiita Gibrot-hataafa; aba gideaba nih heeda sibung'sa fuga geawi gheanyan.

³⁵ Ghang'eada Gibrot-hataafa gabalak buuneeda gaweay Haseroti; ak goobiida hoowa.