IITOODA 10 - Bibliyeeda Ghaydit

Durumbeatajeega sisna gharinga lapiya

¹ Ng'ata goobalool NG'UTAMIIDA Musa ak gwayeesha,

² “Sina durumbeataji iyeenya bea lapiya; ak gaysinana gadiyeeda gidayda; ak gaygadiyeata aba igasayi bwadana geat buuneeda; ghana igasayi gabalak maheemajeega.

³ Nea damani jea ghaghuuda durumbeatiin, abeeda gaygabassa geat buuneesean headaang'u, aba hiji bea ghuuta maheemajeanda siroondooscheesean.

⁴ Nea saawa iighuut durumbeati nibwagi abeeda fuga hees, mida madeeda fuga Israeli nyiit sagalamnyoojiga, gaygabassa geat madeadaang'u.

⁵ Ama oaghuuchi nea ghoanung' ghwadaruur nyeashta muuchi, abeeda gaygaweay museasajeega duukusa meatkweeda ghayeawa. Ama oaghuuchi nea ghoanung' ghwadaruur deaba iyeenya, abeeda gaygaweay museasajeega duukusa wiilooda ng'eanyiida biyeara.

⁶ Gayghaghuut nea ghoadaaruur aba ng'eayda nyaawa nyooh gaweay.

⁷ Iidu nea geanung' gwaroonyi buuneesean bada geat, gajaghuuda, nea majanung' ghwadaruur.

⁸ Orjooga Haruni was ashoohoodiga fuga jea ghaghuut durumbeatajeegiga; ak gayghoah aba heedeang'wa diigheanda manda muudeanooda aba jeacheengeagwa sean.

⁹ Nea aba damanda oobeawi ng'ucheeda aba jeeda ng'eanyiideang'wa, ak goong'ucheewi weajoocheanda ghabwaseegwa agooga, abeeda gajaghuuda durumbeati nea ghoanung' ghwadaaruur muuchi; ak abeeda gajeapkaadeagwa aba madeeda NG'UTAMIIDA, was ASEETEANG'WA, ak abeeda gajeelealneegwa aba heeda weajoodigeagwa.

¹⁰ Nea aba eaweeda oohoosani, ea aba askwearjoojiga ghweelmoojigeagwa ghayi sirukuneegwa, ea aba ng'ushiindeang'wa bea sheeda, gajaghuuda durumbeatajeesu aba badahuuka haleanjeedeang'wa bea ghadooweeda jea eaghwarda, ea badahuuka lukghumajeega was haleanjeeda ghadooweedeang'wa gichea eapkaada aba madeeda ASEETEANG'WA; aniini geawooschi NG'UTAMIIDA, was ASEETEANG'WA.”

Fuga Israeli gabalak

¹¹ Hean gweaydeaba iyeenya, sheedeaba iyeenya, eaweeteaba diktam bea sheeda geegatkat shamooghoodida aba uhuuda maheemajeanda muuwuunooda.

¹² Ak gwasim gaweay fuga Israeli gaweay mwadi, aba beata nyaawa ghabeawa dareapcheeda Sinayi; ak gawa shamooghooda ea ghamiinaada aba dareapcheeda Barani.

¹³ Ak goosheeda saawa gaweay aba diigheanda NG'UTAMIIDA aba geatinda Musa.

¹⁴ Hean goosheeda gabalak hoorgeeda orjooga Yuda sea lugooda nyaawa; ea Nashoni orjeeda Aminadaabu was siida haw ambal lugoadaanyi.

¹⁵ Nea lugooda orjooga eemeeda Isakari aahaw Natanaeli was orjeeda Suari.

¹⁶ Nea lugooda eemeeda Sabuloni aahaw Eliyabu was orjeeda Heloni.

¹⁷ Iidu nea geahiing'u maheemajeanda, ak ghwasar fuga dooshta Gershoni sea gea Merari, hean gwasimsa gaweay mwadi.

¹⁸ Nea fuga mida hing'eadayda beendeerajeanda fuga dooshta Rubeni gwasim gaweay nea gaba gharmucheanji maseaw nuut; nea siida haw haweewa saawa ea Elisuri orjeeda Shedeuri.

¹⁹ Ak siida haw aba jeeda lugooda eemeeda Simeoni geeguura Shelumieli was orjeeda Suri-shadayi.

²⁰ Ak siida haw aba lugooda eemeeda Gadi geeguura Eliyasafu orjeeda Deueli.

²¹ Muchu gabalak fuga Gohati, was fuga sar haleanjeedida ghaydidiin; ak ghamiinda buuneeda suurja maheemajeanda nea miighwahidu saawa.

²² Ak gwasim maheemajeanda fuga Efraimu gaweay mwadi ea lugooda nyaawa; nea gaba gharmucheanji maseaw nuut, nea siida haw aba saawa geeguura Elishama orjeeda Amihudi.

²³ Nea siida haw aba jeeda fuga eemeeda Manase geeguura Gamalieli orjeeda Bedasuri.

²⁴ Ak siida haw aba lugooda orjooga Benjamini geeguura Abidani orjeeda Gideoni.

²⁵ Hean gwasim maheemajeanda fuga eemeeda Dani, was dea huuydeana maheemajeega sean, gwasim gaweay sea lugweega nyaawa; nea siida haw aba lugooda nyaawa ea Ahieseri orjeeda Amishadayi.

²⁶ Nea siida haw aba lugooda fuga Asheri ea Bagieli orjeeda Okrani.

²⁷ Ak siida haw aba jeeda fuga Naftali geeguura Ahira orjeeda Enani.

²⁸ Nih giduurji beata fuga Israeli ea lugweega nyaawa; ak gabalak gaweay mwadi.

²⁹ Ng'ata ghwalamda Musa ak gwayeesha Hobabu, orjeeda Reueli was siida Midiyani, agweaji Musa, “Aseasa geeweayi ng'eanyiida ayi NG'UTAMIIDA, ‘gaydagooneegwa’; beeni eeteayeena ak gajeesineey ng'asheega miyaas; aba gideaba gwayi NG'UTAMIIDA gaydaadaw Israeli ng'asheega miyaas.”

³⁰ Hean ghwalamda niny ak gwayeesha, “Aniini maydawa; aniini gaydabiikta ng'eanyiideanyu ea heeda buweadeegeasu.”

³¹ Ak gwayeesha Musa, “Geemuscheey adinung'useasa heeda, aba gideaba ginali gichea eepideata aba dareapcheeda, ak aba heedeanya gajuna hoorgeeda gheanyangaasa.

³² Ama siiteayi sea ang'iing'i, gida wassean miy jea gwasinneasa NG'UTAMIIDA, abeeda gajeesineey eara aseasa.”

Ghang'eat ng'eayda

³³ Hean gabalaga giijeeda NG'UTAMIIDA ak gaweay eawooji samwagu; nea goosheedeawa sandakwajeanda neajeeda bea NG'UTAMIIDA aba beata eawooji samwagu, nea gagasa ng'eanyiida jea gafuufa saawa.

³⁴ Nea abeeda gwanda shamooghooda NG'UTAMIIDA iheenga nyaawa askweari, Iinyo gabalaga museasooda.

³⁵ Ak iissa Iinyo gwarita sandakwajeanda neajeeda, gwayeesha Musa, “Ng'eada, Ea NG'UTAMIIDA, ak ginung' ghwadarda weajoodigaagu; ak ginung' gamng'aw fuga sinyi aba madeadaang'u.”

³⁶ Nea iifuuf, gwayi, “Biiksiina, Ea NG'UTAMIIDA, heeda fuga nyiit sagalamnyooji sagalamnyooji bea Israeli.”