IITOODA 1 - Bibliyeeda Ghaydit

Iitooda madeeda bea fuga Israeli

¹ Iimuchu goobalool NG'UTAMIIDA Musa aba dareapcheeda Sinayi, aba jeeda maheemajeanda siroondooscheesa, eaweeda madeeda bea sheedeaba iyeenya, aba gweaydeaba iyeenya iing'ata rinooda rinna ng'eanyiida Misri, ak gwayeesha,

² “Ayiita buuneesean bwat geat bea Israeli, giliwas sih ea fugeaba gheanyi, ea gealga ghweaniga nyaawa, ng'oara gheawunga headiga sean;

³ ghang'eada siida bea gweanyeew diktam, ghana ghwanaawa, was fuga ammu gaweay ng'ucheeda aba jeeda Israeli, gajayiita ang'iing'i ea Haruni aba gidabeada geenga nyaawa.

⁴ Ak gajandeawana siyagi bea gilatoash; was siida haw aba gheanyaawa.

⁵ Nea gheawunga fuga jea andeawana ea suh; Dea dooshta Rubeni; Elisuri orjeeda Shedeuri.

⁶ Dea dooshta Simeoni; Shelumieli orjeeda Suri-shadayi.

⁷ Dea dooshta Yuda; Nashoni orjeeda Aminadaabu.

⁸ Dea dooshta Isakari; Netaneli orjeeda Suari.

⁹ Dea dooshta Sabuloni; Eliyabu orjeeda Heloni.

¹⁰ Aba jeeda orjooga Yosefu; bea dooshta Efraimu; Elishama gil orjeeda Amihudi; nea dea dooshta Manase; ea Gamalieli orjeeda Bedasuri.

¹¹ Dea dooshta Benjamini; Abidani orjeeda Gideoni.

¹² Dea dooshta Dani; Ahieseri orjeeda Amishadayi.

¹³ Dea dooshta Asheri; Bagieli orjeeda Okirani.

¹⁴ Dea dooshta Gadi; Eliyasafu orjeeda Deueli.

¹⁵ Dea dooshta Naftali; Ahira gil orjeeda Enani.”

¹⁶ Suh fuga siloat gil aba jeeda eemeeda Israeliin.

¹⁷ Ng'ata gageanda Musa ea Haruni headigiga sirugu gheawunga nyaawaan;

¹⁸ ak gageanu saawa eaweeda madeeda bea sheedeaba iyeenya, ak ghabwada geat eemeesean ghayi siyiida was gilasih ea gheanyi ea dooshta nyaawa. Gawuurji gidabeada gheawunga fuga bea gweanyeew diktam ea gea naawa, nea geanung' gabadiina agi.

¹⁹ Gawuurji gidarukusiinda NG'UTAMIIDA Musa, ak ghoah gidiitiida aba hoowa bea dareapcheeda Sinayiin.

²⁰ Nea orjooga Rubeni, was duweacheeda Israeli, jeacheenga nyaawa, aba gidabeada diibiga nyaawa, ea gealga ghweaniga nyaawa ea mooneeda gheawunga nyaawa, aba giliwas sih, giliwas sih bea gweanyeew diktam ea gea naawa, was buuneesean ammu, gaweay ng'ucheeda:

²¹ mooneeda fuga dooshta Rubeni ea sagalamnyooji haradam ea lah ea bughalaji muut.

²² Gea orjooga Simeoni, jeacheenga nyaawa, aba gidabeada fuga gheanyaawa, ea gealga ghweaniga nyaawa, was fuga siyiida aba giteena mooneeda gheawunga nyaawa, aba giliwas sih, giliwas ng'eedeeda bea gweanyeew diktam ak gwadiyeada, was fuga ammu gaweay ng'ucheeda:

²³ fuga siyiida aba jeeda fuga eemeeda Simeoni, buuneeda ea sagalamnyooji haradam ea damashageash ea bughalaji samwagu.

²⁴ Aba jeeda fuga Gadi, aba gidabeada jeacheenga nyaawa, ea fuga gheanyaawa, ea gealga ghweaniga nyaawa, aba giteena mooneeda gheawunga, ghang'eada siida bea gweanyeew diktam ghana ghwanaawa, was fuga sean ammu gaweay ng'ucheeda;

²⁵ Fuga siyiida bea eemeeda Gadi, buuneeda ea sagalamnyooji haradam ea muut ea bughalaji lah ea haradam ea damanamughuush.

²⁶ Aba jeeda orjooga Yuda, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba mooneeda gheawunga nyaawa, ghang'eada siida bea gweanyeew diktam ea gea naawa, fuga sean ammu ng'ucheeda;

²⁷ fuga siyiida bea eemeeda Yuda, buuneeda ea sagalamnyooji laadam ea damanang'wan ea bughalaji lah.

²⁸ Aba jeeda fuga Isakari, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga, ghang'eada siida bea gweanyeew diktam ea ghwanaawa, was buuneesean ammu gaweay ng'ucheeda:

²⁹ Fuga siyiida aba jeeda eemeeda Isakari, buuneeda ea sagalamnyooji haradam ea damanang'wan ea bughalaji ang'wan.

³⁰ Aba jeeda fuga Sabuloni, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda:

³¹ fuga siyiida bea eemeeda Sabuloni, buuneeda ea sagalamnyooji haradam ea damanispwa ea bughalaji ang'wan.

³² Aba jeeda fuga Yosefu, suguura fuga Efraimu, ea jeacheenga nyaawa aba gidabeada fuga gheanyaawa, ea gealga ghweaniga nyaawa, ea giteena mooneeda gheawunga, ghang'eada siida bea gweanyeew diktam ghana ghwanaawa, was giliwas sih ammu gawa ng'ucheeda:

³³ mooneeda fuga eemeeda Efraimu ea sagalamnyooji haradam ea bughalaji muut.

³⁴ Aba jeeda fuga Manase, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda;

³⁵ fuga siyiida bea eemeeda Manase, buuneeda ea sagalamnyooji diktam ea damaniyeenya ea bughalaji iyeenya.

³⁶ Aba jeeda fuga Benjamini, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda;

³⁷ fuga siyiida bea eemeeda Benjamini, buuneeda ea sagalamnyooji diktam ea damanamuut ea bughalaji ang'wan.

³⁸ Aba jeeda fuga Dani, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda;

³⁹ fuga siyiida bea eemeeda Dani, buuneeda ea sagalamnyooji laadam ea iyeenya ea bughalaji ispwa.

⁴⁰ Aba jeeda fuga Asheri, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda;

⁴¹ fuga siyiida bea eemeeda Asheri, buuneeda ea sagalamnyooji haradam ea agi ea bughalaji muut.

⁴² Aba jeeda fuga Naftali, jeacheenga nyaawa, aba gidabeada fuga gheanyaawa, ea gealga ghweaniga nyaawa, aba giteena mooneeda gheawunga nyaawa, ghang'eada siida bea gweanyeew diktam ghana ghwanaawa, buuneesean ammu gaweay ng'ucheeda;

⁴³ fuga siyiida bea eemeeda Naftali, buuneeda ea sagalamnyooji haradam ea damasamwagu ea bughalaji ang'wan.

⁴⁴ Suh fuga ghayi iida Musa ea Haruni gil sea fuga hees atamaniyeenya bea Israeli weat saawa aba iitooda; nea gaba siisi weat aba meatkweeda fuga gealga ghweaniga nyaawa.

⁴⁵ Nea mooneeda buuneesean bea Israeli siyiida aba gidabeada gealga ghweaniga nyaawa, ng'eada siida bea gweanyeew diktam ghana ghwanaawa, giliwas sih ammu gawa ng'ucheeda aba Israeli,

⁴⁶ buuneesean siyiida was headiga ea sagalamnyooji bughalaji lah ea samwagu ea bughalaji muut ea haradam ea damanamughuush (603,550).

⁴⁷ Nea fuga Lawi aba gidabeada fuga ghweaniga nyaawa ea meeyiiduudayi sea buuneeda suurja.

⁴⁸ Aba gidabeada ghayi gwayeesha NG'UTAMIIDA Musa,

⁴⁹ “Eemeeni bea Lawiin adiidu giyiidayi, nea mooneeda nyaawa ea adiiguuyeewi sea dea fuga Israeli;

⁵⁰ ak giloadi fuga Lawi ghoah fuga jea gafur maheemajeanda muuwuunooda, ea dabitaanyi sean ea haleanjeadaanyi sean, saawa gaygagadiyeesa, ak gwajip maheemajeega nyaawa nea gooneaweesa maheemajeanda meadajeega sean.

⁵¹ Nea iissa iijea gawa maheemajeanda mwadi, nea iijea eengoor maheemajeanda, iissa gayghwahiing'u fuga Lawi, nea rabascheanda jea gwaneekiisa gajeabwar.

⁵² Ak gaygwajip fuga Israeli maheemajeega nyaawa, ak gaba siisi abiida jeeda museasoadaanyi, ak gaba siisi miinaada aba guumda beendeerajeandaanyi, gawuurji gidabeada lugweega nyaawa.

⁵³ Nea fuga Lawi gaygwajip maheemajeega nyaawa nea ghwanung' gwaneaweesa maheemajeanda muuwuunooda aba meadajeega sean, ak ea mwahina nyarasta badahuuka fuga Israeli; ak gaygafur fuga Lawi maheemajeanda muuwuunooda.”

⁵⁴ Nih gisin fuga Israeli gil; ak gwasinda ng'asheega sean gidarukusiinda NG'UTAMIIDA Musa.