HOSEYA 9 - Bibliyeeda Ghaydit

Hoseya gwarukuta gichea eergweaksiinda Israeli

¹ Adihoosani, Ea Israeli! adiidu gihoosandi fuga suurja; aba gideaba nihiseadi, nea nijakti ASEATAANG'U. Nibwariinyi sheayda hiseadayda aba badayda heeda silakiisa booga.

² Ak heeda silakiisa booga ea nagheeda difaayi ea mayghoarear saawa, nea maygang'assa saawa difaayeeda eesh.

³ Maygudu goobiida jeeda ng'eanyiida NG'UTAMIIDA, ak Efraimu niny gaygabiikta ng'eanyiida Misri, nea gayghwaak hamita muy aba Ashuru.

⁴ Mayghoadaw NG'UTAMIIDA lukghumajeega was difaayi, nea ea mayghoan ghwasapsap niny aba lukghumajeega. Mukaateenyaawa gaygawuurji mukaateeda shoogoodiga; nea dea jea ghwaak gajeeng'uda ririnnyeanda aba gideaba mukaateenyaawa gaygoomiis jalooda nyaawa ak ghwahit; nea ea majeeyeadu jeeda gheeda NG'UTAMIIDA.

⁵ Gajasina naaha aba eaweeda siloat bea ghweelmeedean, ea eaweeda ghweelmeeda NG'UTAMIIDA?

⁶ Aba gideaba ng'ula, gaygaweay Ashuru; ak gayghoamughuush saawa Misri saawa, gaygabuy Memfisi saawa. Nea gaygwarina nyeega jeeda haleanjeeda nyaawa haw sheayeat bea lapiya; nea gaygwarina halaghweenga jeeda maheemajeega nyaawa.

⁷ Eawoojiga girgweaksiinda nihidu, eawoojiga jea eawala nupka; Israeli gayghwanal ng'asheesu. Sibaneeda aadasha, siida guroorooda gaba geas, aba munyindeang'wa haw ea sicheeda haw.

⁸ Sibaneeda niiw shirikarajeanda Efraimu, was fuga ASEETEANYU, gidasiing'oonya dariideanda gwanda jeeda naweadingaaschi sean, nea jeeda gheeda ASEATAANYI gwanda sicheeda.

⁹ Ning'uda geat riing'eeda gawuurji eawoojiga Gibeya: gayghoapkaat munyasnacheeka nyaawa, ak gayghwaaga ghoorjooda riing'eega nyaawa.

Riing'eeda Israeli ea gichea ghabwat badayda

¹⁰ Gawuurji sabiibooda mida dareapcheeda, heeda aanyasi Israeli. Gawuurji haghweega madeeda bea geeta siguura mtiini, damanda jeataanyi bea madeeda, naadaayi ghweanigaagu. Ng'ata ghapka uhuuda giijeeda Baal-beori, ak ghang'eat ghabwat Baali, ng'ata ghwayamwa ghoan munyinda ea gawuurji gidida bwariiyiin.

¹¹ Giigheambiita Efraimu gayghang'amwa headaanyi gawuurji gidang'eetiideayda dariideanda– maygudu gwanda jeata, ghana gweayuumeeda, ghana ghwarat!

¹² Eara iyarear diibiga, gaydaareat ea muteabuusa gil. Eamuy daanyaawa iyaang'ami bugusta nyaawa!

¹³ Diibiga Efraimu aba gidaadaakti, gagal miyeeda; Efraimu gayghwaat diibigaaschi heeda siida nuusa buuneeda.

¹⁴ Adawa saawa, Ea NG'UTAMIIDA– nea gajadawa naaha? Adawa jeesinga moamu ghwarat ea gidinga moamu gooreerji diibiga.

NG'UTAMIIDA goorgweaksa fuga Israeli

¹⁵ Munyasnacheeka nyaawa gwanda Gilgali; hean aba hoowa ghoah heeda aang'eadi sidooda nyaawa. Aba munyasnacheeka nisin gaydahoan gwariteawa jeedeaba gheanyu. Nea ea maygudu dabwariiy gicha; fuga nyaawa hees nijaktaneani.

¹⁶ Efraimu sibwar, hawunga nyaawa nigajeamiidi, maygudu ghoamu gwaji haghweega. Eara iijih, gaydanuuseada diibiga nyaawa bwariiy.

Sibaneeda gabaloola badayda Israeli

¹⁷ ASEETEANYU gayghoang'aamwa saawa madeadaanyi, aba gideaba ghaheawa gooleeysiit niny; gayghoah fuga jea gwaneayi aba bugusta eemoojiga.