HOSEYA 8 - Bibliyeeda GhayditNG'UTAMIIDA goowoowsa Israeli aba badita sanaamu 1 Iina ghuutaang'u durumbeati, aba gideaba madooyda gwanda uhuuda gheeda NG'UTAMIIDA, aba gideaba ninyarja neajeedeanyu, nea ea mudu ghoang'waay digheandeanyu. 2 Gaygooyeawuseani, Ea ASEETEANYU, aseasa Israeli geanaleay. 3 Israeli nijakta gida miy; gayghwaat geeshtaanyi weajoodiga 4 Inyeesa ghwaloat sugoodiga, nea mearukusiini aniini. Niminda fuga hees, nea meandeawani iita. Nea ea nisissa geat sanaamu sisna lapiya ea dahaabu ghoah gichea gahuuyda saawa. 5 Neajakti meaydaang'u, Ea Samariya Nyarasteanyu niyeesa badahuuka nyaawa. Gaygageanu eawooji hada iijea gwayi bwak ea ghamiyaasiit 6 ak eara aba jeeda Israeli? ea mii ASEETA gil. Meayda Samariya gajeenyarjeaweada. 7 Saawa nihista jeameeda, ak gayghwalach shaarara. Booga miinaada ea mandeawana bayriida, ak ea maygwaji hamita; eara iijih, gayghwaak rabasta. 8 Israeli sinukghuta, goola gaweay bugusta eemoojiga suuk niwuurji dabicheanda manda gadiyeadaanyi. 9 Aba gideaba nidiyeesa Ashuru, gawuurji digeeda jarooda neaydooschi nea gabwa geaw; Efraimu ghwashaayda geaw aba heeda ng'wasangaaschi. 10 Ak eara ghwasha uurjeenga fuga duupchi aba bugusta eemoojiga, Gaydalamwach daamughuush aba hijagi. Ak gayghanyi gafuuf gilinuwaas ghang'eada sugoocheanda simwaar ea fuga hees. 11 Aba gideaba Efraimu niihaat heeda wagiida aba riing'eeda, ak ea niiw aba headaanyi heeda wagiida bea riing'eeda. 12 Eara dang'oorsa niny diigheanyeeka sagalamnyooji damanamughuush, gajeanung' ghoah gidabunu. 13 Ghabwariiy haleanjeeda sisabwa geadi; inyeesa ghoadayda banyeega lukghumajeega ak ghwaak banyeegiga; ak NG'UTAMIIDA ea mandeawana hooseaneega aba badahuuka nyaawa. Hean gayghoapkaat ramaseanyeeka nyaawa, ak gayghwalas riing'eeda nyaawa; gaygabiikta ng'eanyiida Misri. 14 Israeli niroosa siida ghayi niny, nideas gealga majeekcheewi; nea Yuda ea niihaat mujiinajeega siineaweesa hilooga; ak gaydajaksa beasta mujiinajeagaaschi, ak gayghwaak hiloagaaschi. |
The Bible in Datooga © Bible Society of Tanzania, 2015.
Bible Society of Tanzania