HOSEYA 7 - Bibliyeeda Ghaydit

¹ Damanda eagasayi dahaabwa fugeasu was Israeli, geanung' ghwadaajiit munyinda Efraimu, ea munyasnacheeka ng'asheega sina Samariya. Aba gideaba iissa gwareengani fih; mareanghweanda gwanyarja, nea fuga areetiida haleanjeeda iissa ghoareat haleanjeeda aba naweeda.

² Ak ea moapkaada gideaba gudu daapkaat riing'eega nyaawa sean. Ak ghamneawa gadiyoojiga nyaawa nineaweesa meatkwajeega nyaawa, gwanda madeeda gheanyangeasu.

Makcheameeda aba jeeda gheeda sugoocheanda

³ Aba munyasnacheeka nyaawa ninung' gahoosan sugoocheanda, ea fuga hees aba ng'uyeega nyaawa.

⁴ Gwahiseada buuneeda sean; gawuurji duwayda aba jeeda beasta, nea siida awoosachi ea ninung'waada giseawsiinda beasta, gidang'eada damanda sidasa dearanga ea gagul gheata mwatawiida.

⁵ Eaweeda sugoocheandeanya gaminyeani fuga hees aba beasta difaayi; ghamiinda geatindaanyi sea fuga bara budeay.

⁶ Gurooruunatka nyaawa ghwayeada beasta aba makcheameeda gawuurji dahuuda lalach eaweesean nyarasta nyaawa iissa ghwayeat nea goojiileesa; iimuchu sakteayda ghwayeata ng'ushapta beasta.

⁷ Saawa nishang'shang'iidi ea gawuurji duwayda, nea ea nibwar gameewa fuga nyaawa hees. Sugoodiga nyaawa sean niibeedeayi; nea aba jeenyaawa ea manda eara siyagi guurnean.

Israeli sea eemoojiga

⁸ Efraimu niiguuyi geaw sea eemoojiga suuk; Efraimu mukaateeda meayamwa.

⁹ Uurdaanyi niyaak rabasta, nea niny ea mandeawana iita; nea uhuudaanyi ea ninyiit ghearashka, nea niny ea mandeawana iita.

¹⁰ Nea ghwarjeeda Israeli ea nidaajiit aba madeadaanyi; nea ea mabiikta heeda NG'UTAMIIDA was ASEETA nyaawa, eara aba ng'asheesu, ea magaseada niny.

¹¹ Efraimu gawuurji ghariibajeanda, dasha nea manda fughareeda, inyeesa gaguuriisa Misri, ak gawa Ashuru.

¹² Iiweay, gaydawiilsa madeeda nyaawa gheareedangeasu; ak gaydanung' goobitpisiinda ng'eanyi dariidaka humng'eeda; ak gaydalas aba munyasnacheeka nyaawa.

¹³ Dashageada, ea gideaba ninung'usean heedeanyu! Gayghwanyas nyariida, aba gideaba nijaktaneani. Gaydalealu saawa, nea inyeesa gwanaba ng'uyeega aba badaydeanyu.

¹⁴ Ak ea mii gooyeawusean aba gurooruunatka nyaawa, inyeesa ghoaniikgh aba iheenga bulaleenga nyaawa, dealeeysiit musiischooda nyaawa bea booga nea ea nijaktaneani.

¹⁵ Naanalji nea naahang'waanyi geatinga nyaawa, inyeesa gawiilsa ng'asheega munyas madeedeanyu.

¹⁶ Niyamsa geat Baali; niwuurji ghuweang'da bealbeal, fuga nyaawa hees gayghabwar ng'uta aba ghwarjeeda ghuusiga nyaawa. Ng'asheanji gayghoah gichea eefoola aba ng'eanyiida Misri.