HOSEYA 6 - Bibliyeeda Ghaydit

Duukuunooda maba huumwa

¹ “Apkaani, eebiiksiina NG'UTAMIIDA; niny nibwareasa, ak gay ghoahaabeasa; niny nisawaneasa, ak gayghwarat deaneaduutkaasa.

² Iing'ata eawooji iyeenya gaygagooneasa eaweega gicha; eaweeteaba samwagu gaygagatkadeasa, ak gajeepiidana madeadaanyi.

³ Anung' eanala, eesisiina uurda nalita NG'UTAMIIDA; hinoadaanyi gawuurji muchuunooda; gayghwahitaayda roopta doomeelda, gawuurji roopta girjeanda gida iissa gwaroobassa ng'eanyiida.”

⁴ Ghamneawa gaydasimaneey naaha, Ea Efraimu? Ghamneawa gaydasimaneey naaha, Ea Yuda? Aba gideaba bariinyeegeagwa aba heedeanyu gawuurji shamooghooda sakteayda, gawuurji rahooda inyeesa goosha sakteayda.

⁵ Ak hean ea neahuydi aba ghuusiga sibanga, naabwarji gameewa aba ng'asheega ghuuteanyu, nea girgweageadaanyi gayghwaanda weeshinda.

⁶ Aniini ghaabwariinyi huumwa nea ea mii haleanjeeda lukghumeeda gil, nea ghwanal ASEETA, ea ghang'al haleanjeeda ghadooweeda sigwariida.

⁷ Hean eara saawa ghwadatasta neajeeda gidaghayi datasta Adamu, nisimanean gidamwadoabiiwa.

⁸ Gileyadi mujiineeda fuga riing'eega gil, ak ea nibwar foojeanda.

⁹ Gawuurji mareanghooga inyeesa ghwarat naweeda siida, hean eara ashoohoodiga inyeesa ghoamughuush geat; ak ghabwar buuneeda gameewa aba jeeda naweeda gal Shekemu, aba huumwa, nisin munyinda.

¹⁰ Jeeda gheeda Israeli naadaayi ng'asheanda muy; hiseadayeanduumeeda Efraimu gwanda hoowa, nea Israeli ea sing'uda munyinda.

¹¹ Ak eara ang'iing'i, Ea Yuda, sing'oorseey ghoorjooda. Damanda jea deadeelna gheamamda fugeasu.