HOSEYA 4 - Bibliyeeda Ghaydit

ASEETA gwanyareeksa Israeli

¹ Ooleeysiina iit ng'asheanda NG'UTAMIIDA, Ea fuga Israeli; aba gideaba NG'UTAMIIDA gwandeawa sheang'nyeeda sea fuga mida ng'eanyiini. Aba gideaba manda huumeanda ghana doobiiwnata, nea ea manda nalita ASEETA aba jeeda ng'eanyiida;

² manda ng'ashaan geaghus habeawooda, ea ng'uyeega, ea nuusta, ea gwadishta ea hiseadayeanduumeeda; iissa gwanuuseada moonghajeega sean ak foojeanda gamaseaw foojeanda.

³ Ak aba ng'asheanji ng'eanyiida gaygagiisan, sea fuga sean abiida jeeda ng'eanyiida gaygoosha uurjeenga, eara diyeanga madameega, ea dariidaka humng'eeda; eara ghweayeega jeeda basooda gajeegeanda.

ASEETA gwanyareeksa ashoohoodiga

⁴ Adiidu gwanda siisi jea gang'aleali, nea adiidu gwanda siichea gwasheang'nyi, aba gideaba nyarasteanyu gwanda badaydaang'u ea ashoohoocheanda.

⁵ Ak ang'iing'i gajabeada askweari, sibaneeda gayghoabeada sea ang'iing'i eawa; ak gaydanuus geamadu.

⁶ Fugeasu sihuuyda aba nyoota fughareeda; aba gideaba niheawi fughareeda, ak ea naaheawi huwa ashoohoocheandeanyu. Damanda roosiineeyi diigheanda ASEATAANG'U. Eara aniini gaygwaroosiineani diibigaagu.

⁷ Iinyo gooheadiischi, gooheadiischi riing'eeda nyaawa aba badaydeanyu; ak gaydayam giigheambiita nyaawa ghoah baspaseega.

⁸ Inyeesa gweagiischeewa riing'eeda fugeasu; inyeesa gahoosan aba munyinda nyaawa.

⁹ Ak gayghoah giduurji buuneeda, gayghoah gichea gawuurji ashoohoocheanda; ak gaydanung'wa heeda aba naweadinga nyaawa.

¹⁰ Gaygweagiischi ak ea maygwalang'u; ak gaygwahiseada ak ea mayghoahaada; aba gideaba ninung'usa heeda NG'UTAMIIDA ak gwayamsa geat hiseadayeanduumeeda.

NG'UTAMIIDA gwanyareeksa fuga bada sanaamu

¹¹ “Difaayi ea difaayeeda eashish gahuteawi iheenga fugeasu.

¹² Inyeesa buuneedeanyu ghoabwaarda gwadeagooda aba heeda damealeanda geeta, inyeesa gwarukusa bileangida gida gasa ghwanal. Aba gideaba guroorooda hiseadayeanduumeeda ninung' ghwaschoarda, ak gwanung'usa heeda ASEETA nyaawa ak gwahiseada.

¹³ Iissa gwasin lukghumeeda aba iheenga giijeega, goodayiida haleanjeeda sisabwa geadi, aba iheenga heayeeniga iissa ghaghwarda lukghumajeega aba gumsheaka geediga hees dariida damealga, aba gideaba jirooneadaanyi aamiy. “Ak aba ng'asheanji, haweagaagu gaygwahiseada, nea gadeemga orjoagaagu gaygwahiseada.

¹⁴ Maygudu dalas haweagaagu iihiseada, ea gadeemga orjoagaagu iihiseada; aba gideaba eara headiga inyeesa gaweay mwaatkwa sea gadeemga was hiseadayeeka, nea ghoadayda haleanjeeda sisabwa geadi sea hiseadayeeka, nea fuga mwanala gil gaygoosha.

¹⁵ Ghamneawa eara hiseada, ea Israeli, adiidu ginung' goodiiy Yuda. Adiidu gooweayi Gilgali, ak adiidu goodiiyeesi Besafeni, ak adiidu ghoayaaji habeawooda, “Aba gidabiideata NG'UTAMIIDA.”

¹⁶ Gawuurji haghweanda daruus, Israeli lees, ak NG'UTAMIIDA gayghoamu ghoang'aata saawa gawuurji dayeenda gisilleanda aba jeeda mooheeda bwarak?

¹⁷ Efraimu niiguuyi geaw sanaamu, anung'waada gwandeawa geaw.

¹⁸ Gheamughuushcheeka leeyda, nihiseada; ghabwariiy baspaseega ea ghwanaawa giigheambiita nyaawa.

¹⁹ Jeameeda nidukuta saawa aba meang'eagaaschi, ak gayghabwaspwas aba heeda nyaawa bea wagiida.