HOSEYA 2 - Bibliyeeda Ghaydit

¹ Asi aguureewana orjooga giyeang'wa “Fugeasu”, ea haweega giyeang'wa “fuga sibwayda.”

Gomereeda mii doabiiwaat–Israeleeda mii doabiiwaat

² “Asapsabwa geamadu, asapsabwa– aba gideaba niny mudea gatmoodeanyu gil, nea eara aniini ea mudu dawas siyeadaanyi– danung' goosheagiida geaw hiseadayeanduumeadaanyi, nea adiidu goobiida madeadaanyi, nea adiidu goobiida hiseadayeanduumeadaanyi dageascheeda gidingaaschi;

³ adiidu ghaang'awji hang'weakaaschi ak ghwadawshiit, danung' gabiikta gawuurji gida ghayi sijiilda, ak gaydanung' gawuurji dareapcheeda, ak ghaanung' gawuurji ng'eanyiida ghajaam, ama ng'ata gaydanung' ghabwar muwooshta.

⁴ Nea ea maydabwayda diibigaaschi, aba gideaba diibiga hiseadayeanduumeeda gil.

⁵ Aba gideaba nihiseada gheamata nyaawa, ninyeeda jiilu saawa nisin ng'asheega baspaseega. Aba gideaba gwayi, ‘Gaydeadeayi ng'wasangeasu goonean hamiteanyu ea beegeasu ea hang'deanyu durumwana ea dea bumbuni, ea nagheedeanyu ea difaayeedeanyu.’

⁶ Asi aba ng'asheesu ging'ulayi, gaydajap naweadaang'u aba halaghweenga, aba ng'ata gaydamiinda ghamarda aba madeadaanyi, ea mwadaaha naweadaanyi.

⁷ Hean ng'ata gayghwaat geeshanga ng'wasangaaschi, nea ea mayghwanyas, hean gaygagaseada ak nea ea mayghwadaah; aba ng'ata gaygwayi, ‘Gaydabiikta dabiiksa siyeedeanyu bea mwadi; aba gideaba giibindeanyu bea ghayi aamiy ea ghang'al deaba ghamneawa.’

⁸ Aba gideaba mwanala gideaba aniini gil siida adaw ngaano, ea difaayi, ea nagheeda, ak geaheasi lapiya ea dahaabu, ghayi gadiyeata aba badayda Baali.

⁹ Hean aba ng'asheesu, gaydageanda gicha ngaanoodeanyu aba damandaanyi, ea difaayeedeanyu aba damandaanyi; ak gaydaareat hang'deanyu durumwana, ea hang'deanyu bumbuni, akweala dawiishnataanyi.

¹⁰ Ak ghamneawa gaydanung' ghwadawshiit aba madeeda ng'wasangaaschi, ak ea maygwanda siichea gwalealna geatingeasu.

¹¹ Ak gaydahuta hooseaneagaaschi sean, ea ghweelmajeagaaschi sean, ea eawoojigaaschi sean bea ng'ushiinda sheeda, ea sabaatohajeagaaschi, ea ghweelmoojiga ghayi sirukuta.

¹² Ak gaydadatas sabiibajeagaaschi ea shaboogheetaanyi nea gwayi, ‘Mii gida geatindeanyu gil ghayi goonan ng'wasangeasu.’ Ak gaydanung' ghoah dareabeeta ak gayghwaak diyeanga jarooda.

¹³ Ak gaydaaga ghoorjooda aba ng'asheega eawoojiga Baali, ghayi gwardeaysa haleanjeeda ng'andidi, gheata sissa geaw suulga seangheayoojiga iidigaaschi ea haleanjeeda haw sheayeat, ak ghwaat geeshta ng'wasangaaschi, nea gwanung'usean heeda, ghoah gidanyaashta NG'UTAMIIDA.

Bariinyeega NG'UTAMIIDA aba heeda fugaaschi was Israeli

¹⁴ “Asi ng'ula, gaydasapsap, ea daat jeeda dareapcheeda, ak gaydeabalool ng'asheega jea goohoosan gurooroadaanyi.

¹⁵ Ak gaydaadaw madameagaaschi bea sabiibu nea mwaangwaachiheeda Akori gayghoah gidaghuuta hoyyoo. Ak gayghwasha ghuuteanyu aba hoowa gawuurji damanda ghayi bea gheareemaneanduumeadaanyi, ea eaweeda ghayi siyeeng'na ng'eanyiida Misri.

¹⁶ “Nea aba eaweedida gayghoah gidarukuteayda NG'UTAMIIDA, gayguureeweani, ‘Siyeedeanyu’, nea maygudu guureeweani, ‘Baali’.

¹⁷ Aba gideaba gaydageandeawa ghuutaanyi gheawunga Baali, nea ea maygudu eeguuriisiina gheawunga nyaawa.

¹⁸ Ak eaweedida gaydasin neajeeda sea diyeanga jarooda aba badahuuka nyaawa, hean sea dariidaka humng'eeda ea diyeanga manang'i; aba ng'ata gaydahirja ghuweang'da, ea ng'uta, ea ng'ucheeda gwariteawa jeeda ng'eanyiida ak gaydanung' oopiitpiida nea goobeayi seayu.

¹⁹ Ak gaydeanyeareey huwa deanyu gida manda muudeanooda, gaydeanyeareey aba doobiiwnata, ea huumeanda, ea bariinyeega huumwa, ea baydeayda.

²⁰ Ak gaydeanyeareey aba weamnata, ak gaynala NG'UTAMIIDA.

²¹ “Ak gayghoah eaweedida, gayghwanya ghuuteanyu, aba gida nyaashta NG'UTAMIIDA, gaydasha ghuuta humng'eeda, ak eara humng'eeda gayghwasha ghuuta ng'eanyiida;

²² nea ng'eanyiida gayghwasha ghuuta booga, ea difaayi ea nagheeda; hean saawa gayghwasha ghuuta Yesreeli.

²³ Ak gaydahisa jeeda madamnyeanda aba badaydeanyu, ak gaydabwayda dea miyeebwayda, ak gaydayeesha gea mawoosa fugeasu, ‘Agooga goowooschi fugeasu’; ak gaygwayi, ‘Ang'iing'i guwoosi ASEETEANYU.’”