HOSEYA 12 - Bibliyeeda Ghaydit

¹ Efraimu ghoahaaghwa jeameeda, nea ghwaat geeshta jeameeda askwearjeanda geaw; inyeesa ghoahaat ng'uyeega ea jaliida; nea nisin neajeeda sea Ashuru, ak ghwaat nagheeda Misri.

² NG'UTAMIIDA gwandeawa giiheakteayda aba badayda Yuda, ak gayghwaaga ghoorjooda Yakobo nea gajeegala naweadingaaschi, ak gayghawal aba giteena ginisin.

³ Aba jih ghoang'waay diding'da orjeeda ghaamwat, hean nea gwaheedu gang'aleali sea ASEETA.

⁴ Gang'aleali sea malaykajeanda ea ghwajoar, hean gooyeawda nea gamus baydeayda. Ng'ata gwaroonyi ASEETA aba Beteli, ak aba hoowa gabalool ASEETA sea niny–

⁵ NG'UTAMIIDA was ASEETA bea lugweega, ak gheawungaaschi ea NG'UTAMIIDA gil:

⁶ “Asi ang'iing'i, biikni aba weeta ASEATAANG'U, ang'waanya bariinyeega ea doobiiwnata ASEATAANG'U.”

Ng'asha suuk bea girgweageeda

⁷ Niny siida ageakshachi gil, mida geatingaaschi gidasiiteeniida bea ng'uyeega, nea inyeesa ghabwariiy gwasawan buuneeda.

⁸ Efraimu gwayi, “Aniini aba huumwa neabaruurji, Neanyaksi geaw meanang'oocheanduumeeda”; nea meanang'oocheanduumeadaanyi sean mideawa ea moamu gageanda ramaseanda niing'waanya geadi.

⁹ Aniini geawooschi NG'UTAMIIDA was ASEATAANG'U gidang'eada damanda irini ng'eanyiida Misri; ak gaydanung' abiikta oopiidana jeeda maheemajeega gawuurji eawoojiga ghweelmeeda simwas.

¹⁰ Aniini neabaloolji sea sibanga; ak ea aniini gil siida aheasa giirgweatka, nea aba ashoohoodiga hean ghaadawji gideatooscheeda.

¹¹ Ng'eanyiida Gileyadi iimida riing'eeda aba huumwa gayghoah gidamwadaagha nea aba Gilgali geenuus heewga lukghumajeega, aba heanyaawa bea wagiida gaygawuurji lagheanga siimughuush aba lilaneeda madamnyeanda.

¹² Yakobo gamng'aw ea ghwahita ng'eanyiida Aramu, ak aba hoowa Israeli gwasin gadiyeeda nyasita gatmooda, ak ghoahaaghwa gisilga gwarachi gatmooda jea ghaghi.

¹³ Nea aba ghuuta sibaneeda NG'UTAMIIDA gooruuna fuga Israeli ng'eanyiida Misri, ak hean aba geatinda sibaneeda ghwanyas giibinda.

¹⁴ Efraimu niinyareasan muuchi, hean NG'UTAMIIDAANYI gayghwanung'wa foojeandaanyi badaydaanyi, ak gaygoodeelsa headaanyi munyasnacheekaaschi.