HOSEYA 10 - Bibliyeeda Ghaydit

¹ Israeli gawuurji geeta sabiibu aruutu haghweagaaschi. Gilinyoo ghoahaadaata hean inyeesa ghoahaat heeda wagiida; hean gidabaruurda ng'eanyiidaanyi gwasin daranajeagaaschi miyaas.

² Gurooruunatka nyaawa gaba ng'uya; ak gayghoahiimu munyasnacheeka nyaawa. NG'UTAMIIDA gaygwalalaksa ng'eanyi heeda nyaawa bea wagiida, ak gaygwahirjeawi ng'udanga nyaawa.

³ Nea ghamneawa gaygwayi: “Aseasa meendeawani sugoocheanda, nea NG'UTAMIIDA ea meesisiini mureeda, abeeda sugoocheanda, gayghoamu gwahindaneasaan?”

⁴ Inyeesa gwaruku ng'asheega mwadaagha; inyeesa ghwaak habeawooda ng'uyeega gheata neajeeda; hean girweaksiinda gaygwariteayda nyeega mideawa furooda aba jeeda madamnyeanda sibwar.

⁵ Fuga abiita Samariya gayghaboadan aba badayda meayda Bet-afeni. Ak fugaaschi gaygagiisan aba badaydaanyi, nea ashoohoodigaaschi hiseada gaygoonyahuushi aba badaydaanyi, ea badayda giigheambiitaanyi siheeli sea niny.

⁶ Ak gajeayaat Ashuru, ghoah gida geatinda aba heeda sugoocheanda. Efraimu gajeang'uda baspaseega, nea Israeli gajeapwaaspwaas aba sanaamoadaanyi.

⁷ Sugoocheanda Samariya gayghami, gawuurji furghooda mida badayda beega.

⁸ Aba heeda wagiida bea Bet-afeni, riing'eeda Israeli gajeehuuyda. Nea gaygwarina halaghweenga ea ng'eamga heeda nyaawa bea wagiida; ak gaygwayeesha giijeega, ookwealeasa, ea heayeeniga, oopeedeayseasa.

NG'UTAMIIDA gwarugu girgweageeda Israeli

⁹ Gidang'eada eawoojiga Gibeya, noosinyi riing'eeda, Ea Israeli; aba hoowa gagutkuta gaweay mwadi. Abeeda mayghwanaawa saawa ng'ucheeda aba Gibeya?

¹⁰ Gaydoan ak ghaabwarji fuga riing'eeda ak gaydaaga ghoorjooda saawa; gayghabwat geat eemoojiga aba badahuuka nyaawa ak gajeayaaga ghoorjooda riing'eega nyaawa.

¹¹ Efraimu niwuurji haghweanda siinaal bwariiy goobuugu booga, nea gheataanyi miy ea naang'waanyi; ak Efraimu gaydarasa gheataanyi yookajeanda, Yuda gayghabwar ng'eanyi, Yakobo gayghabwar ng'eanyi niny.

¹² Histeaysiina geaw doobiiwnata, laja haghweega bariinyeega huumwa; aweawa madamnyeandaanyi lil, aba gideaba nihita damanda jea eegasa NG'UTAMIIDA, ak abeeda ghwahidu ak gwaroobassa badahuukeagwa lealeanooda.

¹³ Noabwarji munyinda, ak ghoalaji ramaseanda, noayaaji haghweega ng'uyeega. Aba gideaba nikghusi mutukwajeagaagu ea seang'ayda shirikareadaang'u,

¹⁴ ak ghwahidu ng'ucheeda jeeda fugaagu, nea ghamardaang'u sean gajeadatas, gawuurji gidahuuydeanda Shalmani Bet-arbeli eaweeda ng'ucheeda; ak gagiishachi gheamadiga ea diibiga nyaawa.

¹⁵ Nih gichea eesimaneegwa gil, Ea gheeda Israeli aba munyindeang'wa haw. Aba jeeda dung'usta gajeabwar sugoocheanda Israeli.