Giidaheechta 9 - Bibliyeeda Ghaydit

¹ Hean googuul malaykajeandeaba muut durumbeateadaanyi, ak ghaadaayi miing'weanda ng'adaana humng'eeda ak goobissa badayda ng'eanyiida, ak geataw gida jea gootina ghuuta shoomanda mamuudeana;

² gootin shoomanda mamuudeana, hean gwarina aroosta jeedeaba shoomandida, nea gawuurji aroosta duwayda haw, ak ghwanung' gamisaniit gheang'da aseeta ea humng'eeda aba aroostida bea jeeda shoomandean.

³ Gwarina jeedeaba aroostida deashamga ak ghapka badayda ng'eanyiida, hean geataw uurda uurji dea mideawa udagilbajeega ng'eanyiida;

⁴ ak geeyeesha adoosawanyi nyeega mida ng'eanyiida ghana gili wassean nyawiish, ghana giliwas geeta geaghus fugiga mandeawana giirooraneeda ASEETA aba gheamamuunatka nyaawaan;

⁵ geataw gheata jea gwasawana saawa sheeh muut, ak ea mii gideaba gaygwanuuseada saawa gil, ak sawanadeeda nyaawa gawuurji siida ghanya udagilba, iighanya siida.

⁶ Ak eawoojigiga gaygagasa buuneeda miyeeda ak ea mayghwanyas; ak gaygagasa miyeeda, ak gaygamng'aw miyeeda aba madeanyaawa.

⁷ Ak sinoodeaba deashamsu gawuurji faraasajeega, nea hidaat aba ng'ucheeda; nea iheenga nyaawa gwanda duguuga uurji shiipka sisna dahaabu; ak gheamamuunatka nyaawa gawuurji gheamamuunatka buuneeda,

⁸ nea buudeega nyaawa gawuurji buudeega gadeemga, nea geeshatka nyaawa gawuurji geeshatka ng'adiida;

⁹ ak daghanuunatka nyaawa gwadiiy igeambooda injilga uurji gharinyeanda, nea ghuusiga dabiniga nyaawa gawuurji ghuuta mutukwajeega, ea faraasajeega saang'a weay ng'ucheeda nea ghwalamwajaada.

¹⁰ Nea gwandeawa shoomng'eega uurji udagilbajeega, ak gaba halaghweenga, ak uurjeenga nyaawa jea gwasawana buuneeda sheemuut gwanda shoomng'eega nyaawa.

¹¹ Ak gwandeawa sugoocheanda ambal saawa was malaykajeanda shoomanda mamuudeana, ak gheawungaaschi aba iita fuga Ebraniya geeguura Abadoni, nea aba ghuuta Yunani geeguura Apoliyoni (nea gideaba habitkweeda).

¹² Asi haloota madeeda ning'ata; ng'ula, gayghwahidu haloocheew iyeenya.

¹³ Hean ghaghuut malaykajeandeaba lah durumbeateadaanyi, ak ghaayiinyi ghuuta nyaasha jeedeaba gujakiga asang'wan bea heeda wagiida sisina dahaabu mida madeeda ASEETEAN,

¹⁴ nea gwayeesha malaykajeandeaba lah mideawa durumbeatiin, “Siksiina malaykajeegiga asang'wan sirassa jeedeenda haw siguura Furatiin.”

¹⁵ Hean geesiksa malaykajeegiga asang'waniin, ghayi siikghuumu ea ghwahita damandideaniin, ea eaweedida ea sheeda, ea gweayda, ak gwanuus buuneeda heeda haw.

¹⁶ Ak mooneeda shirikareeda mida badayda faraasajeega ea sagalamnyooji diktam niba sagalamnyoojiga saang'a mwoamu eeyiida; ghaayiinyi mooneeda nyaawa.

¹⁷ Nea nih ea gididaakti faraasajeega gil aba gidasihiimnaan; fuga mida badahuuka gwadiiy igeambooda oar beasta nea ghabwada oomnata ea giikayda, nea iheenga faraasajeega gawuurji sea iheenga ng'anyeeka, ak gwarina ghuusiga nyaawa beasta ea aroosta ea giikayda.

¹⁸ Aba nih gwanuus buuneeda heeda haw aba dawni, ea aba beasta ea aroosta ea giikayda rinna ghuusiga nyaawa.

¹⁹ Aba gideaba uurdeaba faraasajeesu gwanda ghuusiga nyaawa ea shoomng'eega nyaawa; aba gideaba shoomng'eega nyaawa gawuurji ichipkeega, nea gwandeawa iheenga, nea inyeessa gaganyeatiida.

²⁰ Nea buuneeda mwaatkwa, mabwara dawni, ghanyea maduukuunana aba gadiyoojiga nyaawa sin aba geatinga nyaawa ghana ghwanung'waada ghadoowanda meangeenda ea sanaamu sisna dahaabu ea shiliingajeega ea lagheanga areeri ea lagheaneeda ea geeta, nyooh ea moamu ghoang'wearda ghana ghwayiiy ghana gaweelweel;

²¹ ak ea maduukuuna nuusta nyaawa bea buuneeda, ghana beeneetkuumeeda nyaawa, ghana munyasnacheeka nyaawa ghana gwadishta nyaawa.