Giidaheechta 8 - Bibliyeeda Ghaydit

Giirooraneedeaba ispwa

¹ Iidu nea gootin Dayeenda Gisilleanda giirooraneedeaba ispwa, hean gwayi humng'eeda saw gheadi nuwaas.

² Ak ghaadaayi malaykajeandeaba ispwa nea ghamiinaada aba madeeda ASEETA, ak geataw saawa durumbeataji ispwa.

³ Hean ghwahidu malaykajeanda nuut ak ghamiinaada heeda wagiida, nea gwandeawa dabicheanda sisna dahaabu siimiikiisiinda, ak geataw hideeda ng'andit saang'a ak googuuyi sea mooshta ASEETA bea fuga sean ghaydidi aba badayda heeda wagiida sisina dahaabu mida madeeda hoorgeeda gheambalmeeda;

⁴ ng'ata gwadiyeada aroosteaba hideedida ng'andidiin sea mooshta ASEETA bea fuga ghaydidiin aba geatinda malaykajeanda ea ghwahita madeeda ASEETA.

⁵ Iidu gageanu malaykajeanda dabicheandida ak ghoanyiit beasta leabu heeda wagiida, ak gwajaksa badayda ng'eanyiida; hean ghwanya nyeashta ea giighweandandeeda humng'eeda, ea nyeashta nea ghoabwaay dadamandeeda, ea sawooda ng'eanyiida.

Durumbeatajeega

⁶ Ng'ata gwasisin geaw malaykajeandeaba ispwa mideawa durumbeataji ispwa nea gagasa ghaghuut.

⁷ Hean googuul malaykajeanda madeeda, ak ghwahidu roopta lagheanga ea beasta, nea gaguuyi foojeanda, ak goobissa badayda ng'eanyiida; hean ghwaak ng'eanyiida beasta ea eapuut hiji mwanang', ak ghwaak beasta geediga ea ghoabuut suung'ay, nea eara nyeega nyawiiri sean ghwaak beasta.

⁸ Ghaghuut malaykajeandeaba iyeenya durumbeateadaanyi, hean geejaksa jeeda basooda giduurji giijeeda haw, nea ghwayeada beasta;

⁹ nea basooda heeda haw ghoah foojeanda, nea diyeanga heeda haw majeekcheewi mida gameewa aba jeeda basooda, nea maleambajeega hees geenyarjeaweada heeda haw.

¹⁰ Ghaghuut malaykajeandeaba samwagu durumbeateadaanyi, ak ghang'adaana humng'eeda miing'weanda haw, nea ghwayeata gheaboong'nyeanda, ak goobissa eeniga heeda haw ea gheanyanga eeniga mideawa beega.

¹¹ Ak gheawungeaba miing'weandida geeguura Ng'weaninda, nea beega heeda saang'a gang'weaniidi, ak gameewa fuga saang'a aba badaydeaba beesu, aba gideaba sinung' gang'weaniidi.

¹² Ghaghuut malaykajeandeaba ang'wan durumbeateadaanyi, ak geawiim gheang'da aseeta heeda haw, ak eara gheang'da sheeda geawiim heeda haw, ak eara gheanyanga miinga geawiim heeda haw, ak abeeda uurda nyaawa abwaanya geanung' gamisaniit heeda haw; nea askwearjeanda heeda haw ea madakna, ak gwasunu eara eaweeda heeda haw.

¹³ Hean ghaang'weardi, ak ghaadaayi rabearda ajuur muuchi, nea ghang'eata aba bugusta humng'eeda, nea gwayi, “Ashageada, ashageada, dashageada fuga mida badayda ng'eanyiida, damanda jea ghwanyaasha giiguuleanda nuut nea niriikghta googuul malaykajeega asamwaguun!”