Giidaheechta 7 - Bibliyeeda Ghaydit

Fih sagalamnyooji bughala ea haradam ea ang'wan bea Israeli

¹ Iing'ata suh ghaadaayi malaykaji ang'wan nea ghamiinaada aba murdajeega asang'wan bea ng'eanyiida, nea ghwadeal jeameeda leabu murdajeega asang'wan bea ng'eanyiida, aba gideaba ea mwaghuuna jeameeda aba badayda ng'eanyiida, ghana aba jeeda basooda ghana ghaghuut geeta wassean.

² Ghaadaayi malaykajeanda nuut nea gwascheeng'na heeda arearuuna aseeta, nea gwandeawa giirooraneeda ASEETA majeek, hean gaguurda aba ghuuta haw ak gaguursa malaykajeegiga asang'wan ghayi siitaw uurda jea gwasawana ng'eanyiida ea basoodean,

³ nea gwayeesha, “Adoosawanyi ng'eanyiida ghana basooda ghana geediga, ea eaghus ea siyiinyi giirooraneeda gheamamuunatka soomjooga ASEETEANYA.”

⁴ Ghaayiinyi mooneeda fuga siiroor, fih sagalamnyooji bughala ea haradam ea ang'wan siiroor, aba giliwas eamwa aba jeeda orjooga Israeli,

⁵ gea eemeeda Yuda geeroor fih sagalamnyooji damaniyeenya, gea eemeeda Rubeni sagalamnyooji damaniyeenya, gea eemeeda Gadi sagalamnyooji damaniyeenya,

⁶ gea eemeeda Asheri sagalamnyooji damaniyeenya, gea eemeeda Naftali sagalamnyooji damaniyeenya, gea eemeeda Manase sagalamnyooji damaniyeenya,

⁷ gea eemeeda Simon sagalamnyooji damaniyeenya, gea eemeeda Lawi sagalamnyooji damaniyeenya, gea eemeeda Isakari sagalamnyooji damaniyeenya,

⁸ gea eemeeda Sabuloni sagalamnyooji damaniyeenya, gea eemeeda Yosefu sagalamnyooji damaniyeenya, gea eemeeda Benjamini sagalamnyooji damaniyeenya siiroor.

Eemeetuw

⁹ Iing'ata ng'asheesu ghaang'weardi, ak ging'ulayi, ghaadaayi, eemeeda saang'a manda siida ammu gwayiida, fuga leabu giliwas daroar ea eemoojiga sean ea buuneeda ea iita nea ghamiinaada aba madeedeaba hoorgeedida bea gheambalmeedean, ea madeeda Dayeenda Gisilleanda, nea gookwa hang'weaka eashish, nea ghoang'waay damealga miilayga aba geatinga nyaawa,

¹⁰ nea gooyeawda aba ghuuta haw nea geeyi, “Lealeanooda gaba ASEETEANYA apteada aba uhuuda hoorgeeda gheambalmeeda, ea heeda Dayeenda Gisilleanda!”

¹¹ Abeeda malaykajeega sean ghamiinaada aba murdajeega sean bea hoorgeedida bea gheambalmeedean ea dea gweargwa, ea deaba diyeangiga majeekcheewi assang'waniin, ak goobeedeayi ak ghabwada jeesinga ng'eanyi aba madeedeaba hoorgeedida bea gheambalmeedean ak ghaghadoawan ASEETA

¹² nea gwayi, “Amin! Ghawooda ea giigheambiita ea weaghuumeeda ea badiischooda ea mureeda ea uurda ea hawunda daba ASEETEANYA ea ghoah damanda manda muudeanooda! Amin.”

¹³ Hean gwayeeshean gweargweanagi, “Fiisu akeega, akwa hang'weaka eashish gulng'eanyiin, nea fiisu gwaleabu yeenu?”

¹⁴ Geayeeshi niny, “Siida mureeda, ginali ang'iing'i.” Hean gwayeeshean, “Suh fuga leabu jeedeaba sawanadeedida hawiini; ak ea niihuun hang'weaka nyaawa geawi ea ghwanung' gaweeriidi aba foojeanda Dayeenda Gisilleanda.

¹⁵ Ak gwanda madeeda hoorgeeda gheambalmeeda ASEETA, nea gagadiiyeesa askweari ea eawa aba jeedeaba gheanyi sibata ASEETA; ak ninyeeda apteada aba uhuuda hoorgeeda gheambalmeeda gaygookwa saawa aba gideaba gwanda hiji.

¹⁶ Ak ea maygudu ghwadaah jalooda, ghana ghwaak muwoash gicha; ak ea mayghwaak daknooda saawa, ghana giliwas daknooda ng'waan.

¹⁷ Aba gideaba Dayeeneanji bea Gisilleanda mida bugusta hoorgeeda gheambalmeedean gayghoah jeagiischoocheanda nyaawa, ak gaygoodoobiiwseegwa gheang'deenda mida beega mideawa eaweega; ak ASEETA gaygoobuus dabeaka sean mida gheanyanga nyaawa.”