Giidaheechta 6 - Bibliyeeda Ghaydit

Giirooranga

¹ Ng'ata ghaadaayi aba hoowa Dayeenda Gisilleanda nea gootin giirooraneanagi aba jeedeaba giika as ispwaan, ak ghaayiinyi aba jeedeaba diyeangiga asang'wan majeekcheewiin nea gwayi, aba nyeashta haw uurji gighweendandeeda, “Beeni!”

² Hean ghaadaayi, asi ng'ula faraaseedeesh, nea gwanda badaydaanyi siida mideawa ghuweang'da; hean geataw shiipka, ak gwarita ak gwajooriischi nea ghwajoar.

³ Iidu nea gootin giirooraneedeaba iyeenya ghaayiinyi ghuuteaba diyeaydida bea iyeenya majeegiin nea gwayi, “Beeni!”

⁴ Hean gwardu faraasajeanda nuut, nea areara muuchi; nea siidida mida badaydean geenung' gageanda weayda aba badayda ng'eanyiida, ak gwanuusa geat buuneeda; ak niny geataw ng'uta haw.

⁵ Iidu nea gootin giirooraneedeaba samwagu, ghaayiinyi ghuuteaba diyeaydida bea samwaguun majeegiin nea gwayi, “Beeni!” Hean ghaadaayi, ak geang'ulayi faraasajeanda duw, nea siida mida badayda gwandeawa gidasigala haleanjeeda aba geatindaanyi;

⁶ ghaayiinyi giduurji nyeashta aba bugusteaba diyeangiga majeekcheewi asang'waniin, nea gwayi, “Gweeriida ngaano nea googween iyeenya sishaaha dinaarajeanjagi, ea gweeriida riighu bea nganooyda siguura shayiiri sishaaha dinaari; ak ea adidatasi, nagheeda ea difaayi!”

⁷ Iidu nea gootin giirooraneedeaba ang'wan, ghaayiinyi ghuuteaba diyeaydida majeek bea ang'waniin nea gwayi, “Beeni!”

⁸ Hean ghaadaayi, ak geang'ulayi, faraaseeda mur, nea siida mida badayda ea Miyeeda gil, nea goodeayi Gheeda maloonghajeega; ak geataw uurda aba badayda ng'eanyiida hiji mwanang', ak gwanuus aba ng'uta ea geejeeda ea dawni ea diyeanga ng'weani bea ng'eanyiida.

⁹ Iidu nea gootin giirooraneedeaba muut, hean ghaadaayi aba jeeda heeda wagiida gurooruunatka fuga ghayi silajaada gheatkweaka aba badayda Ng'asheanda ASEETA, ak gamuuwu ng'asheesu;

¹⁰ goojuur aba ghuuta haw nea geeyi, “Ea Ng'utamiida ambaliischi, ghaydit bea huumwa, gajeeyi bwak ea ghoah eeju nea mii argweaksiina ak giwaldi foojeandeanya aba badahuuka fuga mida badayda ng'eanyiida?”

¹¹ Ak gaba nih siitaw hang'deesh geaw nea geeyeesha anyo ghanyi afuufa ea gameaji gageawiit, ea gwadeayi mooneeda bareanda nyaawa was soomjooga ea fuga duupchi jea eenuusta gidaghayi sinuusta saawa.

¹² Iidu nea ghwajaat giirooraneedeaba lah, ghaadaayi, ak geang'ulayi sawooda haw bea ng'eanyiida; ak gwatuudu gheang'da ASEETA ea gawuurji hang'weaka sisna guniya, nea eara sheeda ghawaar foojeanda,

¹³ nea miinga humng'eeda gang'adeesa badayda ng'eanyiida gawuurji gidiissa goojiroonda shaboogheecheanda haghweagaaschi damanda gooroogeeda nea gooyuuk jeameeda;

¹⁴ hean geenung' ghwaroat humng'eeda ea gawuurji gitaabooda simughut, nea giliwas giija ea ng'eanyiida neaweesa beega gajeanung' ghang'amwa heeda mida.

¹⁵ Nea sugoodiga badayda ng'eanyiida ea fuga hees, ea shirikarajeega hees ea meanang'oodiga ea gea mideawa uurjeenga, ea giliwas sih, soomjeanda, ea dea abal geaw, hean gafuysa geat jeesinga gwaleadinga ea dageascheeda lagheanga giijeega,

¹⁶ hean gaguursa giijeega ea lagheanga nea gwayeesha, “Oopeedeayseasa ak ghoafunyeasa aba madeedeaba gheanyangeaba siidida apteada aba uhuuda hoorgeeda gheambalmeedean, ea aba nyarasta Dayeenda gisilleanda;

¹⁷ aba gideaba eaweeda haw bea nyarasta nyaawa nihidu, ak ea ng'eaha gil jea ghoamu ghamiinaada aba madeeda?”