Giidaheechta 5 - Bibliyeeda Ghaydit

Gitaabu ea Dayeenda Gisilleanda

¹ Hean geadeaksi geatinda dugwa bea siidida apteada aba uhuuda hoorgeeda gheambalmeedean gitaabooda sing'waar jeeda ea badayda, nea siiroor aba giirooran ispwa;

² ghaadaayi malaykajeanda mideawa uurda nea gwarukwiida ng'asheega aba ghuuta haw, nea gwayi, “Gamiisa ng'eaha gideaba gaygootin gitaabu ak gwanyarjeaweada giiroorangaaschi?”

³ Ak ea manda siida aba humng'eeda ghana ng'eanyiida ghana uuta ng'eanyiida ammu gootin gitaabu ghana goong'weersa jeeda,

⁴ hean geayeawdi muuchi aba gideaba meadaaha siida miisa giitindeaba gitaaboani, ghana goong'weersa jeeda.

⁵ Ak gwayeeshean siyagi aba jeedeaba gweargiga, “Adiiyeawdi; daaha, ng'adiida eemeeda Yuda, was Hawunyeanda Dawdi, niny nijooriischi, ak gaygootin gitaabu, ea giiroorangaaschi as ispwa.”

⁶ Hean ghaadaayi aba dageascheeda hoorgeedida bea gheambalmeedean ea diyeangiga majeekcheewi asang'waniin ea bugusteaba gweargiga, ghamiinaada Dayeenda Gisilleanda, nea gawuurji gili silach gheata, nea gaba gujaw ispwa ea gheanyan ispwa, nea Gurooruunat ispwa bea ASEETA gil siicheakta gaweay ng'eanyiisean;

⁷ hean gawa ak gageanda gitaabu aba geatinda dugwa bea siidida apteada aba uhuuda hoorgeeda gheambalmeedean.

⁸ Hean nea gageanu gitaabu ghoabeada diyeangiga asang'wan majeekcheewiin sea gweargiga atiktam ea ang'waniin aba madeeda Dayeenda Gisilleanda, ak gaba nih ang'waay gidoondooriida, ea gweeriida sisna dahaabu nea ghwanyiit hideeda ng'andit, was mooshta ASEETA bea fuga ghaydidi;

⁹ hean gwasarman sarmeedeesh, nea gwayi, “Gamiiseey ang'iing'i geanooda gitaabu ak giitin giiroorangaaschi, aba gideaba ghayi gealach gheataang'u nea aba foojeandaang'u giidaydi leadeeda buuneeda aba heeda ASEETA aba giliwas eamwa ea iita ea buuneeda ea ng'eanyiida,

¹⁰ ak ginung' ghwanyas sugoocheanduumeeda ea ashoohoodiga aba heeda ASEETEANYA, nea saawa gaygoombal ng'eanyiida.”

¹¹ Deagheata ghaang'weardi, ak ghayiinyi aba murdeeda hoorgeeda gheambalmeeda ea dea diyeangiga majeekcheewiin ea dea gweargwa ghuusiga malaykajeega saang'a mwoamu eeyiida,

¹² nea geeyi aba ghuuta haw, “Gamiisa Dayeenda Gisilleanda ghayi silach gheata, ghwanyas uurda ea meanang'oocheanduumeeda ea weaghuumeeda ea hawunda ea mureeda ea giigheambiita ea ghawooda!”

¹³ Ak gilinyoo gwanda humng'eeda ea badayda ng'eanyiida ea uuta ng'eanyiida ea jeeda basooda, ea haleanjeeda sean mida jeadaanyi, gwayi, “Ghawooda ea mureeda ea giigheambiita ea giimuusta gwandeawa ninyeeda apteada aba uhuuda hoorgeeda gheambalmeeda ea Dayeenda Gisilleanda ea ghoah damanda manda muudeanooda!”

¹⁴ Ak gwayi diyeangiga asang'wan majeekcheewiin, “Amin!” ak goobeedeayi gweargwa ak ghaghadoawan.