Giidaheechta 4 - Bibliyeeda Ghaydit

Ghadoowanda ASEETA aba humng'eeda

¹ Iing'ata ng'asheesu ghaang'weardi, ama deagheata gwanda humng'eeda gidaghuuta jaadaat. Hean ghuuta gwachi aayiinyi bea madeedean goobaloolan nea ghwanyaashta giiguuleanda, nea gwayi, “Beeni hiji, ak gaydaahiimneey gichea ghwahidu iing'ata ng'asheesu.”

² Deagheata geandi jeeda Guroorooda, hean ghamiinaada hoorgeeda gheambalmeeda aba humng'eeda, nea goopteada siida aba uhuudeaba hoorgeedida bea gheambalmeedean!

³ Nea siida apteadawa uhuuda iising'ula ghawaar lagheaneeda mur ea dea dughwaang', nea hoorgeedida bea gheambalmeedean gwaneaweesa gidaghuweang'da sheagiitka ama sing'ula ea nyawiish.

⁴ Ak gwaneaweesa hoorgeedida bea gheambalmeedean hoorgaji diktam ea ang'wan bea gheambalmeeda, ak ghaadaayi gwearu diktam ea ang'wan, aba uhuudeaba hoorgajeegiga bea gheambalmeedean nea goobiitpiit, nea siikwealsa hang'weaka eashish, nea iheenga nyaawa gwanda shiipka dahaabu.

⁵ Nea heeda hoorgeeda gheambalmeeda iissa gwarina dadamandeeda, nea ghuusiga ea nyeashta gighweendandeeda, nea madeeda hoorgeeda gheambalmeeda ghwayeat gheaboonyan ispwa bea beasta, nea gurooruunat ispwa bea ASEETA;

⁶ nea madeeda hoorgeeda gheambalmeeda gawuurji gili mida basooda daliil oar giyo, nea ghameang'meang'. Nea gwaneaweesa hoorgeeda gheambalmeeda, aba meadajeega sean bea hoorgeeda gheambalmeeda, gwanda diyean ang'wan majeekcheewi, hean ghwanyiit gheanyanga mwadi ea bwadaw:

⁷ diyeayda madeeda majeek gawuurji ng'adiida, nea diyeaydeaba iyeenya majeek gawuurji heeyda, diyeaydeaba samwagu majeek gwandeawa gheamamda uurji dea siida, nea diyeaydeaba ang'wan majeek gawuurji rabearda ng'eata.

⁸ Nea diyeanga asang'wan majeekcheewiin, gaba nih bea meang'i lah, hean ghoang'wearu gang'ula meadajeega ea jih, nea askweari ea eawa ghanyea mii ghwanung'waada sarmeeda, “Dea Ghaydit, dea ghaydit, dea ghaydit, Ng'utamiida was ASEETA Haw Uri, niny dea mida ea dea bean gwanda ea dea jea ghwahidu.”

⁹ Ak ghoadaw diyeanga majeekcheewiin giigheambiita ea mureeda ea badiischooda ninyeeda apteada aba uhuuda hoorgeeda gheambalmeeda maygoosha, damanda manda muudeanooda,

¹⁰ inyeessa gwearsu atiktam ea ang'waniin iissa goobeedeaysa madeeda siidida apteada aba uhuudeaba hoorgeedida bea gheambalmeedean ak ghaghadoawan ninyeeda majeek ea ghoah damanda manda muudeanooda; nea gwajaksa shiipka nyaawa madeeda hoorgeedida bea gheambalmeedean, nea gwasarman,

¹¹ “Ng'utamiideanya was ASEETA gamiiseey ang'iing'i giigheambiita ea mureeda ea uurda, aba gideaba ghayi gisini haleanjeeda sean, nea aba gidigasiidi gisini ak goobiida.”