Giidaheechta 3 - Bibliyeeda Ghaydit

Giijasta weah Sardi

¹ “Heeda malaykajeanda ganiiseeda Sardi ng'oara: ‘Suh ng'asheega ninyeeda mideawa gurooruunat ispwa bea ASEETA ea miinga asispwaan gil. “‘Ghaanali gadiyoojigaagu; gideaba gindeawi gheawunga majeeknata, nea nimeawi.

² Ang'wearni, ak giimajeegi ng'asheega shoada jea gweadu miyeeda, aba gideaba mii dadeaksa gadiyoojigaagu alooheeda aba madeeda ASEETEANYU.

³ Asi apkaada gidaghayi inyasi ea gidaghayi iiyiinyi; asi ang'waanya gidida, ak giduukuuni. Ak iimiing'wearni gaydahitaayda mareanghweanda, ak ea maynala damanda jea dahina headaang'u.

⁴ Ak gindeawi gheawung'su ng'ay aba ng'eanyiida Sardi, fuga miighang'uda hang'weaka nyaawa ririnnyeanda; ak gaydeadeaydooschi saawa nea siishuubeasa hang'weaka eeshish, aba gideaba gammiisa.

⁵ Nea siida jooriischi gajeekwealsa hang'weaka eeshish, ak ea maydeabuus gheawungaaschi aba jeeda gitaabwajeanda eaweega; ak gaydamwas gheawungaaschi aba madeeda Bwaabwa, ea madeeda malaykajeagaaschi.

⁶ Gilinyoo googar iita, dayiinya ng'asheanji rukusa Guroorooda ganiisajeegean.’

Giijasta weah Filadelfiya

⁷ “Heeda malaykajeanda ganiiseeda Filadelfiya ng'oara: ‘Suh ng'asheega siida ghaydit gil asakaleala, bea huumwa, mideawa gisiitina gidaghuuta sugoocheanduumeeda Dawdi, siida ama atin ea manda siida ammu ghwarat, siida amarat ea manda siida jea gootin.

⁸ “‘Aniini ghaanali gadiyoojigaagu. Ng'ula, aniini naayiinyi madeadaang'u gidaghuuta jaadaat, moamu sih ghwarat; aniini ghaanali gideaba gindeawi Uri mwanang', ea gideaba giing'waanyi ng'asheandeanyu ak ea mii shaang'a gheawungeasu.

⁹ Ng'ula, gaydanung' ghoah fugiga was gheeda siinealshacheewa bea Shataani eena geawooschi Yahudi nea mawoosa ak gwanaba ng'uyeegean, ng'ula, gaydanung' ghapka ak gwatkuy aba madeeda geeshangaagu, ak ghwanal gideaba ghaabwariinyeey.

¹⁰ Aba gideaba niing'waanyi ng'asheandeanyu bea milikghteayda nea giihang'waanyi, ak aniini gaydafurnyi, nea giriti aba damanda simsimda jea gwahissa ng'eanyiissean, ak gwasimsim fuga mida badayda ng'eanyiida.

¹¹ Gaydahidu nea ghaalamwajaanyi; ang'waanya muuchi gida indeawi, ak ea mooreanyi sih shiipkaagu.

¹² Siida jooriischi gaydanung' ghoah daraneeda aba jeeda gheeda sibata ASEETEANYU; ak ea mayghanyi gwariteawa jeeni, ak gaydang'oorsa badaydaanyi gheawunga ASEETEANYU, ea gheawunga mujiineeda ASEETEANYU, nea Yerusalemooda eeshi, rarang'aana humng'eeda heeda ASEETEANYU, ea gheawungeasu giika eeshishiin.

¹³ Gilinyoo googar iita, ea dayiinya ng'asheesu rukusa Guroorooda ganiisajeegean.’

Giijasta weah Laodikiya

¹⁴ “Heeda malaykajeanda ganiiseeda Laodikiya ng'oara: ‘Ng'asheega siida was Amin, was siida doabiiwaat was muushoocheanda huumwa, was giing'eeta haleanjeeda sean sin ASEETA.

¹⁵ “‘Aniini ghaanali gadiyoojigaagu: gideaba muwoosi garbabu nea muwoosi gharaat. Ghang'wana guwoosi garbabu ghana woosa gharaat!

¹⁶ Asi, aba gideaba guwoosi shang'shang', nea muwoosi garbabu ghana woosa gharaat, gaydang'udaneey ak giriteawi ghuuteanyu.

¹⁷ Aba gideaba giyeeni aniini geawooschi meanang'oocheanda ak ea neabaruurji, ak ea meagassi gil; ak ang'iing'i ea minali gideaba mindeawani uurda, nea guwoosi bwarbwar, ak giwoosi ng'oaw, nea guwoosi dawiish.

¹⁸ Ak gaydayeeshiineey, shaaha aba heedeanyu dahaabu siihuuna beasta, ak abeeda gaywoosa meanang'oocheanda, nea giikweali hang'weaka eashish, ak ea meadaaha baspaseega dawiishnataang'u, ak gaynyasa meajooda jea eashana gheanyangaagu ak abeeda giing'weardi.

¹⁹ Fugiga aabwariinyiin, inyeessa geawoowsi nea ghaabwarji; asi milmiliida ak giduukuuni.

²⁰ Ng'ula, ghaamiinaadi aba gidaghuuta nea geagulguli; siida jea ghwayiiy ghuuteanyu ak ghwajaat gidaghuuta gaydoan headaanyi ak geambuucheewi, nea eara niny goombuucheewean.

²¹ Siida jooriischi gaydanung' goopteada nea geendeayi aba uhuuda hoorgeedeanyu bea gheambalmeeda, gawuurji gideajooriischeati ak geapteadi sea Bwaabwa aba uhuuda hoorgeadaanyi bea gheambalmeeda.

²² Gilinyoo googar iita, dayiinya ng'asheanji rukusa Guroorooda ganiisajeegean.’”