Giidaheechta 22 - Bibliyeeda Ghaydit

¹ Hean ghoahiimnaan eenda beega mideawa eaweega, nea eesh ea ghameang'meang', nea ghwadalaalaana hoorgeeda ASEETA ea dea Dayeenda Gisilleanda,

² nea bugusta naweadinga mujiini, earada, meatkwajeega sean bea eenda, abeeda gwanda geeta eaweega, mideawa haghweega heeluut damaniyeenya, nea inyeessa gooruudu haghweagaaschi gilasheah; nea seengeaba geedi gaba giiheapta eemoojiga.

³ Ak ea maygudugwanda gilinyoo ea mooshteayda gil, nea hoorgeeda gheambalmeeda bea ASEETA ea dea Dayeenda Gisilleanda gaygwanda jeadaanyi, nea soomjoagaaschi gayghoaghadoawan niny,

⁴ ak gayghwadaah gheamamdaanyi, nea gheawungaaschi gaygwanda gheamamuunatka nyaawa.

⁵ Ak ea maygudugwanda eaweeda; nea magasa weeshinda gheaboong'nyeanda ghana aseeta aba gideaba Ng'utamiida was ASEETA gayghoah weeshinda nyaawa, saawa gaygoombaliischi ea ghoah damanda manda muudeanooda.

Hinooda Yesu

⁶ Hean gwayeeshiinean, “Ng'asheesu ghwadoabiiw ak ea huumwa gil. Nea Ng'utamiida, was ASEETA bea gurooruunatka sibanga, abeeda gaygoojeagu malaykajeandaanyi goohiimsa soomjoagaaschi ng'asheega jea gabean ghwahidu.

⁷ Ak ging'ulayi, gaydahidu nea ghaalamwajaanyi. Ghang'wana siida ang'waay ng'asheega siramoorani aba jeedeaba gitaaboani.”

⁸ Aniini Yohana ghaayiinyi nea ghaadaayi ng'asheesu. Damandida aayiinyi nea ghaadaayiin, hean geabeedeaysi ng'eanyi ak ghaghadoawanyi aba madeeda malaykajeanda ahiimnaan ng'asheesuun;

⁹ hean gwayeeshiinean, “Adiidu gisini gidida! Aniini geawooschi soomjeanda sea ang'iing'i sea fuga siduupcheewi was sibanga, ea fugiga ang'waay ng'asheegeaba gitaaboaniin. Aghadoawana ASEETA.”

¹⁰ Ak gwayeeshean, “Adiiroori ng'asheega siramoorani bea gitaaboaniin, aba gideaba damanda nineekiit.

¹¹ Siida sina ng'asheega munyas daraanya sinooda ng'asheega munyas, dea mideawa ririnnyeanda daraanya ririnnyeanda, dea doabiiwaat daraanya doobiiwnata, dea ghaydit ea daraanya ghaydidanda.”

¹² “Ng'ula, ghaawunyi nea ghaalamwajaanyi, nea geayeadu gichea daadaw siida, ak ghaadawji giliwas sih giduurji gidaghayi sin.

¹³ Aniini geawooschi Alfa ea Omega, dea madeeda gil ea dea huuydean, was dea giing'eeta ea dea huuydean.”

¹⁴ Ghang'wana fuga ahuun hang'weaka nyaawa, ak gwandeawa doobiiwnata jea gaweesiina geeta eaweega ak gaweay jeeda mujiini aba gidaghuudajeagaaschi.

¹⁵ Hoowa bea jaroodean gwanda gudajeega ea beeneediga ea fuga hiseada ea fuga nuusa buuneeda ea fuga ghadoawani sanaamu, ea gilinyoo ghabwariiy ng'uyyeega nea gwasin.

¹⁶ “Aniini Yesu, neajeagu malaykajeandeanyu headaang'u nea gweadu muwuunooni heeda ganiisajeega. Aniini geawooschi hawunyeanda ea jeata Dawdi, was miing'weandida aboong'u bea muchuunoodean.”

¹⁷ Ak gwayi Guroorooda ea Sibeeda, “Beeni.” Nea siida iing'shi dayi “Beeni.” Ak doani siida bearji muwooshta, nea dea gasa ea dageanda beega eaweega nea manda sheayeeda.

Ng'asheega huuydean

¹⁸ Geereekusi giliwas sih iiy ramoorangeaba gitaaboani: giliwas sih iyahaat, gaygooheasa ASEETA sawanaduutsu sirugu aba jeedeaba gitaaboani,

¹⁹ ak giliwas sih iigeanda gili aba jeeda ng'asheega siramoar bea gitaaboaniin, gaygageanda ASEETA headaanyi aba jeeda geetida bea eaweegean ea aba jeeda mujiineedida ghaydidiin, sirugu ng'asheagaaschi aba jeedeaba gitaaboani.

²⁰ Nea siida muuwu ng'asheesu gwayi, “Asi aba huumwa ghaawunyi nea ghaalamwajaanyi.” Amin. Beeni, Ng'utamiida was Yesu!

²¹ Gagasa anyasa dagheerjeanduumeeda Ng'utamiida was Yesu agoogeeni sean oowooschi ghaydidiin. Amin.