Giidaheechta 21 - Bibliyeeda Ghaydit

Humng'eeda Eesh ea Ng'eanyiida Eesh

¹ Hean ghaadaayi humng'eeda eesh ea ng'eanyiida eesh; aba gideaba humng'eeda madeeda ea ng'eanyiida madeeda goola ghang'ata, ak basooda ea mudugwanda.

² Ak ghaadaayi mujiineeda ghaydit, was Yerusalemooda eesh, nea ghwararang'aana humng'eeda heeda ASEETA, nea hidaat gawuurji sibeeda siitaamdaam aba siyeeda;

³ hean ghaayiinyi ghuuta haw nyaasha heeda hoorgeedida bea gheambalmeedean nea gwayi, “Ng'ula, giibinda ASEETA gwandeayi sea buuneeda. Ak gaygwasin giibindaanyi sea saawa, ak gayghoah fugaaschi ak ASEETA niny gaygwandeayi sea saawa;

⁴ ak gaygoobuus giliwas dabeaka aba gheanyanga nyaawa, ak ea maygudu gwanda miyeeda, ghana giiseaneega ghana shooka ghana sawanadeeda, maygudugwanda aba gideaba, ng'asheega madeeda goola ghang'ata.”

⁵ Ng'ata gwayi siidida apteada aba badayda hoorgeeda gheambalmeedean, “Ng'ula, gaydanung' gaweeriidi haleanjeeda sean.” Ak gwayi gicha, “Ng'oara ng'asheesu, aba gideaba ng'asheesu doobiiwnata gil ak ea huumwa.”

⁶ Ak gwayeeshiinean, “Nisa! Gideaba Aniini geawooschi Alfa ea Omega, giing'eeta ea huuydeanda. Siida bearji muwoash gaydaadaw mwadaagha beega leabu gheang'deenda mideawa eaweega.

⁷ Nea dea jooriischi gaygwahearan haleanjeeni, ak gaydoaw ASEATAANYI nea niny gayghoah orjeedeanyu.

⁸ Ak gea giyoonyi, ea gea mandeawana masaweega, ea gea ririnnyeanda, ea gea nuusa buuneeda, ea gea hiseada, ea beeneediga, ea gea gadoowani sanaamu, ea gea naba ng'uyeega sean, heanyaawa jeeda basooda yeada beasta gil ea giikayda, nea nih ea miyeedeaba iyeenya.”

Yerusalemooda eesh

⁹ Hean ghwahidu malaykajeanjagi bea jeedeaba giika as ispwaan nea gwandeawa gweeraji ispwa nyiit sawanaduut ispwa huuydean ak goobaloolan, nea gwayi, “Beeni hiji, ak gaydaahiimneey sibeeda, was gatmooda Dayeenda Gisilleanda.”

¹⁰ Hit ghwaadan aba Guroorooda ea ghoahiitanaan giijeeda haw, geaw, ak ghoahiimnaan mujiineeda ghaydit was Yerusalemu nea ghwararang'aana humng'eeda heeda ASEETA,

¹¹ nea gwandeawa giigheambiita ASEETA, ak weeshindaanyi gawuurji lagheaneeda haw sheayeat, gawuurji lagheaneeda mur, ak ea miyaasiin nea ghameang'meang',

¹² abeeda gwanda ghamarda haw, geaw, mideawa ghuusi damaniyeenya, ak gidaghuudajeesu gwanda malaykaji damaniyeenya, nea gidaghuudajeesu ea sing'oorsa gheawunga eemooji damaniyeenya was orjooga Israeli;

¹³ meatkweeda ghayeawa gwanda gidaghuudaji samwagu, wiilooda ng'eanyiida ghayeawa gwanda gidaghuudaji samwagu, wiilooda ng'eanyiida biyeara gidaghuudaji samwagu, heeda biyeara gwanda gidaghuudaji samwagu.

¹⁴ Ak ghamarda mujiini abeeda gwandeawa sindeecheew damaniyeenya, ak badaydeaba sindeecheekiga gwanda gheawun damaniyeenya bea giijasoodigiga atamaniyeenya bea Dayeenda Gisilleandean.

¹⁵ Nea siidida abaloolaniin abeeda gwandeawa bileangida sisna dahaabu, jea goodeena mujiineedida ea gidaghuudajeagaaschi ea ghamarda.

¹⁶ Nea mujiineani gooyang'deay meadajeega sean, nea geawundaanyi gooyang'deay sea baraknata; ak goodeen mujiini aba bileangidaanyi, gilomiitaji sagalamnyooji iyeenya ea bughalaji ang'wan; nea geawunda ea baraknata ea geawunda gal humng'eeda gooyang'deay.

¹⁷ Hean goodeen eara ghamardaanyi, ak ghwanyas geatin bughala ea haradam ea ang'wan aba gidadeeniida buuneeda nea diita ea malaykajeanda gil.

¹⁸ Ak ghamardida geadeasa lagheang'su murjeew, ak mujiineedida geesina dahaabooda miyaasiin nea ghawaar giyo.

¹⁹ Nea sindeecheeka ghamarda mujiini abeeda siitaamdaamwa aba giliwas lagheana haw sheayeat; dea madeeda ea mur, deabiyeenya gameaji ea oomu, deaba samwagu ea ng'ooreadi, deaba ang'wan ea nyawiish,

²⁰ nea deaba muut ea bwaash, nea deaba lah ea areara, nea deaba ispwa gameaji ea nyawiish, nea deaba sis ea booshcheanda, nea deaba shageash ghawaar booreega, nea deaba damanamughuush gameaji ghawaar booreega, deaba damwanagi ea dughwaang', deaba damaniyeenya ea oomu.

²¹ Ak gidaghuudajeegiga atamaniyeenyean gwanda sageeka damaniyeenya, gilinyoo ea gidaghuuta gil gwanda sageeyeanjagi, nea naweeda mujiini ea dahaabooda miyaasiin siing'weardaawa uurji giyoohi.

²² Ak ea mwaadaahi, gheeda sibata ASEETA aba mujiini, aba gideaba gheenyaawa sibata ASEETA Ng'utamiida was ASEETA Hoauur ea Dayeenda Gisilleanda.

²³ Ak mujiineedida ea magassa gideaba gayghoabwaay aseeta ghana sheeda, aba gideaba giigheambiita ASEETA weeshindaanyi, ak gheaboong'nyeandaanyi ea Dayeenda Gisilleanda gil.

²⁴ Aba gideaba weeshindaanyi gaygwaneayeewa eemoojiga jeeda; ak sugoodiga ng'eanyiida gaygweadu giigheambiita nyaawa jeadaanyi,

²⁵ ak gidaghuudajeagaaschi ea mwajearat askweari earahay, aba gideaba jeeni manda eaweeda;

²⁶ ak saawa gaygweadu jeenyaawa giigheambiita ea mureeda eemoojiga.

²⁷ Nea jeadaanyi ghanyea maygawa gidamuy, ghana deasina ng'asheega munyas ghana gea ng'uyeega, geaghus giika sing'oorsa jeeda gitaabooda eaweega bea Dayeenda Gisilleandean.