Giidaheechta 20 - Bibliyeeda Ghaydit

Gweanyeew sagalam

¹ Hean ghaadaayi malaykajeanda nea ghwararang'aana humng'eeda, nea ghoang'waanya geadi gidasiitina shoomanda mamuudeana ea munyaloalajeanda haw.

² Ak ghoang'waay ichibooda was ichiboodida bea garayiin was meang'nyeandeenda ea Shataani, ak ghwarada gweanyeew sagalama,

³ ak gwajaksa niny jeeda shoomanda, hean gwadukuta ak ghwayiin giirooraneeda badaydaanyi, aba gideaba maygabiikta gicha gwareengani eemoojiga, ea ghang'ata gweanyeew sagalama. Amang'ata hiji gajeetin gilinuwaas.

⁴ Hean ghaadaayi hoorgajeega gheambalmeeda, nea goobiitbiida badahuuka fuga jea goorgweach. Ak ghaadaayi gurooruunatka fuga ghayi silajaada gheatkweaka aba badayda muuwuunooda Yesu ea aba badayda ng'asheanda ASEETA, ea giika ghayi mii ghaghadoawan diyeaydideaniin ghana gidida siratiidean nea miighwanyas giirooraneadaanyi aba gheamamuunatka nyaawa, ghana geatinga nyaawa. Ak gwaduutu, ak goombaliischi sea Gristo gweanyeew sagalam.

⁵ Ak muscheekiga siipuudiin ea mabiikta gwaduutu ea ghang'ata gweanyeew sagalam. Nih duunooda madeeda gil.

⁶ Ghang'wana nea ghaydit siida mida jeeda duunooda madeeda! Aba badahuukeaba fiisu miyeedeaba iyeenya manda uurda ak gayghoah ashoohoodiga ASEETA ea gea Gristo, ak gaygoombaliischi sea niny gweanyeew sagalam.

Joorda Shataani

⁷ Ak iyasha gweanyeew sagalama, gajeetin Shataani gwarina ghealoonigaaschi

⁸ ak gayghwahidu ak gwareengani eemoojiga mida murdajeega asang'wan bea ng'eanyiida, ak ea, Gogu gil ea Magogu, ak ghoawaam saawa aba ng'ucheeda; nea mooneeda nyaawa gwadeena iseaskweanda basooda.

⁹ Hean ghwascheang'da gaweay badayda ng'eanyiida ak geeneaweesa gealga fuga ghaydidi ea mujiineedida sibwariiyiin; hean ghwararang'aan beasta leabu humng'eeda ak ghwaak saawa,

¹⁰ ak geejaksa meang'nyeandida reengani saawaan jeeda basooda beasta ea giikayda heeda mida diyeaydida ea sibaneeda ng'uyyeega, ak gajeesawan askweari ea eawa ea ghoah damanda manda muudeanooda.

Girgweaksiinda huuydean

¹¹ Hean ghaadaayi hoorgeeda haw eesh bea gheambalmeeda ea siida apteadawa uhuuda; nea madeadaanyi gamng'aw ng'eanyiida ea humng'eeda, ak ea meadaaha heeda jea goobiida.

¹² Hean ghaadaayi fuga nimeewa, gea hees ea gea manang'i, nea ghamiinaada aba madeeda hoorgeeda gheambalmeeda, hean geetin gitaabwajeega. Ak geetin gitaabwajeanda nuut, nea gitaabooda eaweega gil. Ak geergweaksa fugiga nimeewean aba ng'asheega sing'oorsa jeedeaba gitaabwajeegiga, giduurji gidaghayi nisin.

¹³ Gooruudu basooda fuga nimeewa mida jeadaanyi, ak gooruudu miyeeda ea Gheeda maloonghajeega fuga nimeewa mida jeadaanyi, ak geergweaksiina sean gidaghayi nisin.

¹⁴ Hean geejaksa miyeeda ea Gheeda maloonghajeega jeedeaba basoodida bea beastean. Nea nih ea miyeedeaba iyeenya gil, basooni bea beastean;

¹⁵ Ak giliwas sih iimiyeeng'oorsa gheawungaaschi jeeda gitaabooda eaweega, hean geejaksa jeedeaba basoodida bea beastean.