Giidaheechta 2 - Bibliyeeda Ghaydit

Giijasta weah Efeso

¹ “Heeda malaykajeanda ganiiseeda Efeso ng'oara, ‘Ng'asheega ninyeeda mideawa miinga asispwa aba geatindaanyi bea dugwa nea gwaneayeewa dageascheeda hoorgaji ispwa bea gheaboonyanga meeng'meeng'i.

² “‘Aniini ghaanali gadiyoojigaagu, ea sawanadeadaang'u ea milikghteaydaang'u nea giihang'waanyi, ea gida miimuustani milikghta fuga munyas iissa ginyo ghanyi sima fugiga guura geat giijasoodiga nea mawoosean, ak gidaahi gideaba gaba ng'uya;

³ ak ghaanali giihaang'ooydaang'u nea gimilikghti nea giidiing'di gheawungeasu, ak ghanyea mii bura.

⁴ Ak geandeawi ng'ashaan aba badaydaang'u, bea gideaba ninung'wi heeda bariinyeagaagu bea mwadi.

⁵ Asi apkaada gidabwaanyi, ak giduukuuni ak gibiiksi gadiyoojiga ghayi iisini bea madeeda. Ak iimisini, gaydahidu headaang'u, ak gaydageanda hoorgeeda gheaboonyaneadaang'u aba heeda mida, ea eaghus duukuunana.

⁶ Ak gindeawi ng'asheanji gideaba gisti gadiyoojiga fuga Nikolayi, ak eara aniini ghaasichi.

⁷ Gilinyoo googar iita, dayiinya ng'asheanji rukusa Guroorooda ganiisajeegean. Nea dea jooriischi gaydanung' ghwaak haghweega geeta eaweega, mida jeeda madamnyeanda mwanang' bea ASEETEAN.’

Giijasta weah Smirna

⁸ “Heeda malaykajeanda ganiiseeda Smirna ng'oara, ‘Ng'asheega madeeda ea dea huuydean, was dea ghayi meah ak gabiikta gamajeegiit.

⁹ “‘Ghaanali sawanadeadaang'u ea barbarandaang'u, (ak guwoosi meanang'oocheanda), ak ghaanali eara giing'weakeaba fiisu eena geewooschi fuga Yahudi nea mawoosean, nea saawa ea ghooriida siinealshacheewa bea Shataani.

¹⁰ Asi adiiwali ng'asheega jea nyasa was sawanadeeda. Ng'ula, meang'nyeandeenda niriikghta gwahisa buuneeda mwaatkwa mida jeedeang'wa ghealooniga, ak abeeda geesimsimeegwa, ak aba jeemba askwearjooji damanamughuush gajanyasa sawanadeeda. Woosa doabiiwaat ea hita miyeeda, ak gaydagoonyi shiipka mideawa eaweega.

¹¹ Siida agar iita, dayiinya ng'asheanji rukusa Guroorooda ganiisajeegean. Nea dea jooriischi ea mayghwanyas sawanadeeda miyeedeaba iyeenya.’

Giijasta weah Bergamo

¹² “Heeda malaykajeanda ganiiseeda Bergamo ng'oara: ‘Suh ng'asheega dea mideawa ng'uta ng'aniip meadajeega duwaawi.

¹³ “‘Ghaanali heediibiiti, heeda mida hoorgeeda gheambalmeeda Shataani gil; ak ang'iing'i ea niing'waanyi muuchi gheawungeasu, ak ea mii heawana masaweegeasu eara damandida bea Antipa was muuwshoocheandeanyuun, was siideanyu doabiiwaat, sinuuksa bugusteang'wa, was heeda abiita Shataaniin.

¹⁴ Ak geandeawi ng'asheesu ng'ay aba badaydaang'u: gideaba gindeawi fiisu ng'ay aba hoowa aat geeshta giinealshooda Balaamu, niny ghayi ghoanaal Balaki ak gwaruusa orjooga Israeli ak ghwanung' ghwaak hamichoojiga siyaat lukghumajeega siitaw sanaamu ea biissa mealuuleega.

¹⁵ Ak eara ang'iing'i gindeawi fuga aat geeshta giinealshooda fuga Nikolayi.

¹⁶ Asi duukuunana. Nea iimiduukuunani, gaydahidu headaang'u nea ghaalamwajaanyi ak gaydang'uchi saawa aba ng'uta leabu ghuuteanyu.

¹⁷ Gilinyoo googar iita, dayiinya ng'asheanji rukusa Guroorooda ganiisajeegean. Nea siida jooriischi gaydaadaw hamita siguura maana ghayi sifuy ak gaydaadaw lagheaneedeesh, ak badaydeaba lagheaneani geeng'oorsa gheawunga eashish, mwanala sih geaghus siidida ang'waayiin.’

Giijasta weah Diyatira

¹⁸ “Heeda malaykajeanda ganiiseeda Diyatira ng'oara: ‘Ng'asheega Orjeeda ASEETA, bea gheanyanga oar ng'ushapta beasta, ak geeshangaaschi gawuurji lagheaneeda mur sisiy muuchi.

¹⁹ “‘Ghaanali gadiyoojigaagu, ea bariinyeagaagu ea masaweagaagu ea gidigadiyeati ea milikghteaydaang'u nea giihang'waanyi, ak gicha gadiyoojigaagu huuydean ghang'al gea ghayi bea madeeda.

²⁰ Ak geandeawi ng'ashaan aba badaydaang'u, bea gideaba ang'iing'i gimilikghti gatmoodida siguura Yesebeliin, guura geaw sibaneeda ak ghoareat soomjoogeasu ak ghoanaal mealuuleega nea ghwaak haleanjeeda siyaat lukghumajeega siitaw gidamawoosa ASEETEAN.

²¹ Ak ea naadawji gheata gwaduukuuna, ak ghaheawa duukuunooda mealuuleagaaschi.

²² Ng'ula, gaydayiin gatmoodida muunda aba miyeanda, nea fugiga jea gamealuul sea ninyiin gaydaadaw sawanadeeda haw, ea eaghus gwaduukuuna ng'asheega sina;

²³ ak gaydabwar diibigaaschi gameewa. Ak gayghwanal ganiisajeega sean gideaba aniini geawooschi siida sikiideawa fughareenga ea gurooruunatka, ak gaba siisi aadawji aba jeedeang'wa giteaschi sea gadiyoojigeagwa.

²⁴ Nea fuga mida jeedeang'wa aba ng'eanyiida Diyatira, was fuga moang'waanya giinealshooniin, fuga mwanala gidaguura buuneeda mwaatkwa haleanjeeda sheagi jih bea Shataani, aba heedeang'wa gaydayi, mwaydayiin badahuukeagwa sareenda nuut;

²⁵ ghusa ging'ooyda gida indeawi, ea dahidu.

²⁶ Nea siida jooriischi ak ghoang'waay gadiyoojigeasu ea ghwahita huuydeanda, gaydanung' goombal fuga eemoojiga,

²⁷ ak gayghoahaaghwiida saawa bileangida gharinyeanda, gawuurji gidiisa ghwanyarda haleanjeeda sisna sigeeda ak ghoah banajanga, gwasunu eara aniini naanyaschi uurda leabu heeda Bwaabwa;

²⁸ ak gaydaadaw miing'weandida bea muchuunoodean.

²⁹ Gilinyoo googar iita, dayiinya ng'asheanji rukusa Guroorooda ganiisajeegean.’