Giidaheechta 19 - Bibliyeeda Ghaydit

¹ Ng'ata ng'asheesu ghaayiinyi ghuuta haw uurji dea eemeeda saang'a aba humng'eeda, nea gwayi, “Haleluya! Lealeanooda ea giigheambiita ea uurda gaba ASEETEANYA,

² aba gideaba girgweageadaanyi dea huumwa gil nea doabiiwaat; aba gideaba niirgweaksa hiseadaydida hawiin ghayi datas ng'eanyiida aba hiseadayeanduumeadaanyiin, ak ea niwalda aba badaydaanyi foojeanda soomjoagaaschi.”

³ Geebiikta gicha eechuur nea geeyi, “Haleluya! Aroosta leabu heedeaba gatmoodida gwadiyeada ea ghoah damanda manda muudeanooda.”

⁴ Nea gweargiga atiktam ea ang'waniin sea diyeangiga asang'wan majeekcheewiin goobeedeayi ak ghoaghadoawan ASEETA apteada aba badayda hoorgeeda gheambalmeeda nea gwayi, “Amin. Haleluya!”

Ghweelmeeda nyeangiida Dayeenda Gisilleanda

⁵ Hean gwarina ghuuta nyaasha jeedeaba hoorgeedida bea gheambalmeedean nea gwayi, “Eeduumsheesiina ASEETEANYA, agoogeeni sean oowooschi soomjoagaaschiin, agoogeeni oowali gheang'daanyiin, was gea manang'i ea gea hees.”

⁶ Hean ghaayiinyi ghuuta uurji dea eemeetuw, ak ghwanyaashta ghuuta beega saang'a ak gabiissa ghwanyaashta dea giighweandandeeda haw nea gwayi, “Haleluya! Aba gideaba Ng'utamiida was ASEETEANYA Hoauur niimbaliischi.

⁷ Asi eehoosana nea geeng'weelayi nea geatawji giigheambiita, aba gideaba geeshooda Dayeenda Gisilleanda nihidu, ak eara gatmoadaanyi ea nisisin geaw ea ghwahit;

⁸ ak ea siikwealsa hang'weaka miyaasiin bumbuni, meeng'meeng'i nea miyaas”– aba gideaba hang'weaka miyaasiin sinaweega doabiiw bea fuga ghaydidi gil.

⁹ Hean gwayeeshean malaykajeanda, “Ng'oara ng'asheesu: Ghang'wana fugiga siguursa hamita geeshooda Dayeenda Gisilleandean.” Ak gwayeeshiinean, “Suh ng'asheega huumwa bea ASEETA.”

¹⁰ Ak geabeedeaysi madeeda geeshangaaschi ak ghaaghadoawanyi niny hean gwayeeshiinean, “Adiidu gisini ng'asheesu! Aniini geawooschi soomjeanda sea ang'iing'i sea fuga iduupcheewi mideawa muuwuunooda Yesu. Ghadoawana ASEETA.” Aba gideaba muuwuunooda Yesu guroorooda sibaneanduumeeda.

Siida mida uhuuda Faraaseeda eesh

¹¹ Hean ghaadaayi nea ghwajaada humng'eeda, ak ghaadaayi, faraaseedeesh! Nea gwanda badaydaanyi siida siguura Doobiiwnata ea Huumwa, ak niny aba doobiiwnata goorgweaksa nea gwasin ng'ucheeda.

¹² Ak gheanyangaaschi gawuurji ng'ushapta beasta, ak uhuudaanyi gwanda shiipka saang'a; ak gheawunga sing'waar mwanala eara sih geaghus niny.

¹³ Ak niny ea siikwealsa hang'da sing'uda foojeanda, ak gheawungaaschi geeguura Ng'asheanda ASEETA.

¹⁴ Nea ghwaat geeshta lugooda humng'eeda, nea gookwa hang'weaka bumbuni, eashish nea miyaas, ak ghwaat geeshta faraasajeega eeshish.

¹⁵ Ak gwarina ng'uta ng'aniip ghuutaanyi jea ghabwara eemoojiga, ak gayghoahaaghwiida saawa bileangida gharinyeanda; nea niny ghoalaapta ng'eanyi shoomanda difaayeeda bea nyarasta haw bea ASEETA Hoauur.

¹⁶ Ak badayda hang'daanyi ea gibeestaanyi geeng'oorsa, gheawunga Sugoocheanda sugoodiga ea Ng'utamiida ng'utamoojiga.

¹⁷ Hean ghaadaayi malaykajeanda nea ghamiinaada aba badayda aseeta, nea goojuur aba ghuuta haw nea gwayeesha dariidaka ng'eatng'eata aba bugusta humng'eeda, “Apkaani, aghadoawana geat aba ghweelmeeda haw bea ASEETA,

¹⁸ ak ghoayaaji sasanuuka sugoodiga, ea sasanuuka shirikarajeega hees, ea sasanuuka fuga mideawa uurjeenga, ea sasanuuka faraasajeega ea gea fuga ding'da, ea sasanuuka buuneesean, sea siida abal geaw ea giing'oonyaneeda, dea mwanang' ea dea haw.”

¹⁹ Hean ghaadaayi diyeayda ea sugoodiga ng'eanyiida ea shirikarajeega nyaawa nea ghabwat geat nea gagasa gang'uchi sea siidida apteada aba badayda faraasiin sea shirikareadaanyi.

²⁰ Hean geang'waay diyeaydida, sea sibaneeda ng'uyeega ghayi sina gwadeagwajeega aba madeadaanyi, ak gwareengani fugiga ghayi niing'waay giirooraneedeaba diyeaydida ea fugiga ghadoawan gidasiratiida ninyiin. Hean geejaksa suh asiyeenyean jeeda basooda beasta nea majeekcheewi ak ghwaak beasta ea giikayda.

²¹ Ak giika siipuudiin geenuuseadawa ng'uteaba siidida apteada aba badayda faraasiin, aba ng'uta rinna ghuutaanyi; hean gwalang'u dariidaka sean aba banyeega nyaawa.