Giidaheechta 18 - Bibliyeeda Ghaydit

Giibeedeayda Babeli

¹ Iing'ata suh ghaadaayi malaykajeanda nuut nea ghwararang'aana humng'eeda, nea gwandeawa gheambalmeeda haw; ak ghoabwaay ng'eanyiida giigheambiitaanyi.

² Hean gaguurda aba nyeashta haw nea gwayi, “Niibeadi, niibeadi Babeleeda haw! Niwoosi heeda jea goobiida meangeenda, ak ea heeda abiita gilinyoo ea guroorooda muy, ea heeda abiita gilinyoo ea dariideanda muy;

³ aba gideaba eemoojiga sean nili difaayeeda ng'asheagaaschi munyas gaseadayi, ak eara sugoodiga ng'eanyiida nihiseada sea niny, nea fuga ageakshi bea ng'eanyiida ea ninyas meanang'oocheanduumeeda aba uurda hiseadayeanduumeadaanyi.”

⁴ Hean ghayiinyi ghuuta nuut nyaasha humng'eeda nea gwayi, “Ariteawana headaanyi, fugeasu, adooguuyeewi riing'eadaanyi, adiidu ghoanyaschi sawanaduutkaaschi;

⁵ aba gideaba riing'eadaanyi sijip ea ghwahita humng'eeda, ak ea niipkaat ng'asheagaaschi munyas ASEETA.

⁶ Oatawa siida gidagooneegwa niny, ak ghoatawji niny niba iyeenya aba sinaweagaaschi; Ookuuyeena nibiyeenya aba badaydeaba niny aba jeeda gikoombeeyda aguuyeesa niny.

⁷ Aba gidaghaambiita geaw niny nea gwanda jeeda hiseadayeanduumeeda, oatawa niny gheadeendida was sawanadeeda ea giiseaneegean. Aba gideaba gwayi niny aba jeadaanyi, ‘Neapteadi sugoocheanda was gatmooda nea meawoosi masinung'weanda, ak ea maydadaah giiseaneega,’

⁸ aba gideaba sawanaduutkaaschi gayghwahidu eaweecheanjagi, miyeeda ea giiseaneega ea jalooda, nea niny gajeenung' ghwaak beasta; aba gideaba Ng'utamiida was ASEETA gwandeawa uurda ak gaygoorgweaksa niny.”

⁹ Nea sugoodiga ng'eanyiida, hiseada abeeda gwahiseada sea niny, gaygooyeawda nea gagutu heareega aba badaydeaba niny iidaah aroosta beasta sighwardaawa niny;

¹⁰ ak gayghamiinaada nea sheagi, aba muuwda sawanadeadaanyi, nea gwayi, “Eamuy daanyi! eamuy daanyi! mujiineedida hawiin, mujiineeda Babeli mideawa uurda! Aba gideaba jeemba aseadeanagi gayghwahidu girgweaksiindaang'u.”

¹¹ Ak fuga ageakshachi bea ng'eanyiida gaygooyeawda nea gagutu heareega aba badaydaanyi aba gideaba manda siida jea gutghwasha haleanjeeda nyaawa,

¹² haleanjeeda sisna dahaabu, ea lapiya, ea lagheanga hees sheayeat ea sageeka, ea hang'weaka miyaasiin bumbuni, gea oomng'i ea gea buudeega ea gea areeri, ea geeta hideeda, ea gilinyoo ea dabicheanda sisna gujaweeda gil, ea gilinyoo ea dabicheanda geeta haw sheayeat gil, ea dea gharinyeanda areara, ea gharinyeanda ea lagheanga siguura marumaru,

¹³ ea geeta ng'andit siguura mdalasiini, ea geediga ng'andidi siyiina jeeda nyeanyiida, ea hideeda ng'andit, ea nagheeda ng'andit, hideeda ng'andit bea duumbeecheanda, ea difaayi, ea nagheeda, ea dearanga miyaasiin bea ngaano, ea dugwa ea gisilga, ea faraasajeega, ea mutukwajeega, ea giing'oonyanga, nea gurooruunatka buuneeda.

¹⁴ “Haghweega bwariiy jeadaang'u ninung'useey heeda, ea hamichoojigaagu ibwariinyi ea haleanjeeda miyeenooda nirooda aba headaang'u, ak ea maygudu eebiikta gicha eanyas!”

¹⁵ Ak fuga ageakshachi aba haleanjeeni, ghayi nyasa meanang'oocheanduumeeda headaanyi, gayghamiinaada nea sheagi, aba muuwda sawanadeadaanyi, hean gooyeawda nea gagutu heareega aba ghuuta haw,

¹⁶ “Dashageada, dashageada, mujiineedida hawiin siikwealsa hang'da bumbun miyiin, ea hang'weaka oomng'i ea gea areeriin, nea geetaamdaam aba dahaabu, ea lagheanga sheayeeda haw, ea sageeka!

¹⁷ Aba jeemba aseadeanagi haleanjeeni seaniin sihista.” Ak fuga sean ambal maleambajeega ea fuga weay bareanyeeka aba maleambooda ea gearnoodiga maleambooda ea fuga ageakshi aba jeeda basooda, hean ghamiinaada nea sheagi

¹⁸ gooyeawda iidaah aroosta beasta sighwardaawa niny, “Ana mujiinajean gil uurji mujiineani hawiin?”

¹⁹ Hean gwajaksa iheenga nyaawa birjeanda, ak gooyeawda nea gagiisan, hean gooyeawda nea gwayi, “Dashageada, dashageada, mujiineedida hawiin nea gea mideawa maleambajeega hees aba jeeda basooda ghwanyas baruureega aba meanang'oocheanduumeadaanyi! Ak aba jeemba aseadeanagi ea sijakta.

²⁰ Ahoosana aba badaydaanyi, Ea humng'eeda, Ea fuga ghaydidi ea giijasoodiga ea sibanga, aba gideaba ASEETA nigooneegwa girgweaksiinda aba badaydaanyi!”

²¹ Hean gagatkat malaykajeanjagi mideawa uurda, lagheaneeda uurji lagheaneeda haw bea ng'ealdeayda ak gwajaksa jeeda basooda, nea gwayi, “Asi gajeejakseey ng'eanyi Babeleedida was mujiineeda hawiin aba nyarasta, ak ea maygudu eebiikta eadaah;

²² ak eara ghuusiga fuga mideawa gidoondoorajeega ea gea sarman, ea gea seawiir ea gea aguul, ea maygudu eebiikta eeyiing'sa jeadaang'u earahay; ghana siida geariir aba giliwas gearinda maygudu eanyasa jeadaang'u earahay; ghana ghuuta lagheaneeda ng'ealshi maygudu eeyiing'sa jeadaang'u earahay;

²³ ak eara weeshinda gheaboong'nyeanda ea maygudu gabiikta ghoabwaay aba jeadaang'u earahay; ak eara ghuuta siida geeshi ea dea gatmooda sighi maygudu eebiikta eeyiing'sa jeadaang'u earahay; aba gideaba fiisu ikaagu ageakshiin ghayi saawa fuga hees bea ng'eanyiida gil, ak eemoojiga sean ea sireengani aba beeneetkweanduumeadaang'u.

²⁴ Nea jeadaanyi geenyasa foojeanda sibanga ea gea fuga ghaydidi, ea gea fuga ghayi sinuus aba badayda ng'eanyiida.”