Giidaheechta 17 - Bibliyeeda Ghaydit

Hiseadayda nalaat

¹ Hean ghwahidu malaykajeanjagi bea jeedeaba giika asispwa mideawa gweeraji ispwaan ak gwayeeshiinean, “Beeni, gaydaahiimneey girgweaksiinda hiseadayda haw abiita badayda beega saang'aan,

² nea nihiseada sea sugoodiga badayda ng'eanyiida, ak gea mida badayda ng'eanyiida ea niboogit aba difaayeeda hiseadayeanduumeadaanyi.”

³ Hean ghwaadan aba jeeda Guroorooda ea dawa dareapcheeda, ak ghaadaayi gatmooda nea goopteada aba badayda diyeayda areara nea ghwanyiit saseeda gheawunga giing'weaka, nea gwandeawa iheeni ispwa ea gujaw damanamughuush.

⁴ Ak gatmoodida ea niikwa hang'da oomu ea dea areara, nea siitaamdaamwa dahaabu ea gea haw sheayeat ea sageeka, ak gwanda geatindaanyi gikoombeeyda mida dahaabu biissa ghwanyiit ng'asheega munyas ea ririnnyeanda hiseadayeanduumeadaanyi;

⁵ ak gheamamdaanyi geeng'oorsa gheawunga makcheameeda, “Babeleeda haw, gheamata fuga hiseada bea ng'asheega munyas bea ng'eanyiida.”

⁶ Ghaadaayi gatmoodida, nea niboogit aba foojeanda fuga ghaydidi sea foojeanda sinuus aba badayda Yesu. Hean nea ghaadaayi gatmoodida ghahamwan ng'eanyi gidahaw.

⁷ Hean gwayeeshiinean malaykajeanda, “Ghwasaan anda gihami ng'eanyi? Gaydarukuneey makcheameedeaba gatmooni, ea dea diyeayda mideawa iheeni ispwa ea gujaw damanamughuush aat gatmooniin.

⁸ Diyeaydideani idaahiin abeeda gwanda, ak ea mandana, ak gaygwadiyeana uuta shoomanda mamuudeana ak gawa heeda ng'asheega munyas. Ak fuga mida badayda ng'eanyiida miyeeng'oorsa gheawunga nyaawa jeeda gitaabooda eaweega dea sibada sindeeta ng'eanyiida, gayghahamng'eanyi iidaah diyeaydida. Aba gideaba gwanda, ak ea mandana ak gayghwahidu.

⁹ Ak nih geeguura heeda fughareeda mida weaghuumeeda: iheengiga as ispwaan giijeega as ispwa apteadawa gatmooni gil;

¹⁰ ak gwanda eara sugoodi ispwa, nea muut aba jeenyaawa ea niibeada, akaleala gwanda, ak niirja ea miighwahidu, nea iihidu gayghwashng'u gilinuwaas.

¹¹ Nea diyeaydida mida ak ea mandanean, niny deaba sissi ak niny gaba jeedeaba giika asispwaan, ak niny gawa jeeda ng'asheega munyas.

¹² Ak gujakiga atamanamughuush idaahiin ea sugoodiga atamanamughuush gil, was gea miighoang'waay uurda sugoocheanduumeeda, ak ea ninyas gheambalmeeda gawuurji sugoodiga aba aseadeanagi, sea diyeayda.

¹³ Saawa gaba fughareanagi ak saawa ghoadaw diyeaydida uurda nyaawa ea gheambalmeeda;

¹⁴ ak suh gaygang'uchi sea Dayeenda Gisilleanda, ak gayghwajoar Dayeenda Gisilleanda saawa, aba gideaba niny Ng'utamiida ng'utamoojiga gil ea Sugoocheanda sugoodiga, ak suh mideawa ninyiin ea gea geeguursa gea siloat ea gea doobiiweadi.”

¹⁵ Hean gwayeeshiinean, “Beegigeani idaahiin, bea heeda apteadawa hiseadaydideaniin, ada buuneeda gil ea eemoojiga ea iidiga.

¹⁶ Ak gujakiga atamanamughuush idaahiin, ea diyeaydida ak gayghwasit hiseadaydida ak gajeenung' ghang'ut salgheang'da nea dawiish, ak gajeayaak banyeagaaschi ak gajeenung' gamurjan aba beasta,

¹⁷ aba gideaba ASEETA niyiin gurooruunatka nyaawa ak ghwasareanda gidagasiida nea gaba fughareanagi ak ghoadaw diyeaydida uurda sugoocheanduumeeda nyaawa, ea gwasa ng'asheega ASEETA.

¹⁸ Ak gatmoodida idaahiin ea mujiineedida hawiin gil mideawa giimbaliischooda aba badayda sugoodiga badayda ng'eanyiidean.”