Giidaheechta 16 - Bibliyeeda Ghaydit

Gweerajeega nyarasta ASEETA

¹ Hean ghaayiinyi ghuuta haw nyaasha jeeda gheeda sibata ASEETA nea gwayeesha malaykajeegiga asispwaan, “Aweayeena ak ghoahiidi gweerajeegiga as ispwa bea nyarasta ASEETA mida badayda ng'eanyiidean.”

² Gawa malaykajeanda madeeda ak ghoahiida gweeriidaanyi aba badayda ng'eanyiida, hean ghoaptu deaneaduutka munyas bea ririnnyeanda mideawa giirooraneedeaba diyeaydideani ak ghaghadoawan gidida siratiida ninyiin.

³ Nea malaykajeandida bea iyeenyean goohiisa gweeriidaanyi jeeda basooda, ak ghwayamwa gawuurji foojeanda siida meah, hean gameewa haleanjeeda sean mideawa eaweega mida jeeda basooda.

⁴ Ghoahiida malaykajeandida bea samwaguun gweeriidaanyi jeeda eeniga ea gheanyanga beega, ak ghoah foojeanda.

⁵ Ak ghaayiinyi malaykajeanda ambal beega nea gwayi, “Ang'iing'i guwoosi doabiiwaat aba girgweaguutkaagu, ang'iing'eeda indi nea ghayi gindi, Ea Dea asagi Ghaydit.

⁶ Aba gideaba buuneeda niihiida foojeanda fuga ghaydidi ea gea Sibanga, ak ea niidawi saawa foojeanda ghwali. Ak ea gidamiisa!”

⁷ Ak ghaayiinyi heeda wagiida nea gooyeawda, nea gwayi, “Huumwa gil Ng'utamiida was ASEETA mideawa uurda, girgweaguutkaagu huumwa gil nea ghwadoabiiw!”

⁸ Goohiisa malaykajeandida bea ang'waniin gweeriidaanyi badayda aseeta, ak geenung' ghaghwarda buuneeda aba beasta;

⁹ ak geaghwarda buuneeda aba beasta ng'waan, ak ghamwaashta saawa gheawunga ASEETA mideawa uurda aba badaydeaba sawanaduutsu, ak ea maduukuunana ak ghoadaw niny giigheambiita.

¹⁰ Goohiisa malaykajeandida bea muudiin gweeriidaanyi badayda hoorgeeda gheambalmeedeaba diyeaydida, ak geenung' gamisaniit sugoocheanduumeadaanyi; hean ghwanyeanyea buuneeda ng'ushapkeaka nyaawa aba siilalga

¹¹ ak ghamwaashta ASEETA humng'eeda aba sawanaduutka nyaawa ea deaneaduutka nyaawa, ak ea maduukuunana sinaweega nyaawa.

¹² Goohiisa malaykajeandida bea lahiin gweeriidaanyi jeeda eenda haw siguura Furatiin, hean ghwajaam beagaaschi, ak geesissin naweeda sugoodiga leabu heeda ghayeawa.

¹³ Ng'ata ghaadaayi, ng'asheega rinna ghuuta ichibooda ea ghuuta diyeayda ea gea ghuusiga sibanga ng'uyeega, ea gurooruunat samwagu munyas uurji udagheambagajeamajeega;

¹⁴ suh gurooruunatka meangeenda gil, sina gwadeagwajeega, inyeessa gwarita ak gaweesa sugoodiga mida giigheawda bea ng'eanyiissean, ak ghoamughuush saawa aba ng'ucheedida aba eaweeda haw bea ASEETA Hoauuriin.

¹⁵ “Asi, gaydoanda mareanghweanda! Ghang'wana siida majeek, nea ghaghamwat hang'weakaaschi ak ea mawa nea dawiish ak geadaah baspaseegaaschi!”

¹⁶ Ak goomuguushsa saawa hiji siguura aba ghuuta Ebraniya Armagedoni.

¹⁷ Goohiisa malaykajeandida bea ispwaan gweeriidaanyi humng'eeda, ak gwarina nyeashta haw jeeda gheeda sibata ASEETA, heeda hoorgeeda gheambalmeeda, nea gwayi, “Nigeawiit gwasa!”

¹⁸ Hean gwardu dadamandeeda, ea nyeashta, ea gighweendandeeda, ea sawooda haw bea ng'eanyiida dea eara heeda ghayi miigwardu dea uurji nih dea niibiideewa buuneeda badayda ng'eanyiida, aba gideaba sawooni bea ng'eanyiidean aahaw.

¹⁹ Hean gwaheeli mujiineedida hawiin niba samwagu, ak ghoabeada mujiinajeega eemoojiga, ak ghoapkaat ASEETA Babeleedida hawiin, ak geataw gweeriida difaayeeda nyarastaanyi.

²⁰ Gilinyoo ea ng'eanyiida neaweesa beega gaygamng'aw, ak ea manda giijeega jea gudeadaah;

²¹ hean gang'adeesa buuneeda roopta haw bea lagheanga durumani muuchi, ak goobitpisa buuneeda nea gwaleabu humng'eeda, ea eeyi bwak ea ghamwaashta buuneeda ASEETA aba sawanadeeda nyas aba lagheanga, ak ghoabeal fih sawanadeedida.