Giidaheechta 15 - Bibliyeeda Ghaydit

Malaykajeega mideawa sawanadeeda huuydean

¹ Hean ghaadaayi gwadeagooda nuut aba humng'eeda, nea aahaw ak daamdaamwaat, malaykaji ispwa mideawa sawanaduut ispwa was gea huuydean, aba gideaba aba badaydeaba suh niduulean nyarasta ASEETA.

² Ghaadaayi giduurji basooda giyo guuyi beasta, ak fugiga joar diyeayda ea gissiratiidean ea mooneeda gheawungaaschi, nea ghamiinaada aba murdeeda basoodida bea giyoohiin, nea gwandeawa gidoondoorajeega ASEETA aba geatinga nyaawa.

³ Ak gwasarman duumda Musa, was soomjeanda ASEETA, ea duumda Dayeenda Gisilleanda, nea geeyi, “Gadiyoojigaagu isinayi ea hees nea deamdeameadi, Ea Ng'utamiida was ASEETA Hoauur! Naweadingaagu doobiiwnata gil ea huumwa, Ea Sugoocheanda gweanyeeka sean!

⁴ Ng'eaha gil dea moawalnyi ak ghoaghaambiit gheawungaagu, Ea Ng'utamiida? Aba gideaba ang'iing'i guwoosi ghaydit nea gibwaageaw. Aba gideaba gayghapka eemoojiga sean ak ghaghadoawanyi, aba gideaba girgweageadaang'u siitaajiit.”

⁵ Ng'ata ng'asheesu ghaang'weardi ak ghaadaayi gheeda sibata ASEETA bea maheemajeanda bea muuwuunooda mida humng'eeda nea nijaada,

⁶ ak gwarina jeeda gheeda sibata ASEETA malaykaji ispwa nea gwandeawa sawanaduut ispwa, nea gookwa hang'weaka miyaasiin meeng'meeng'i, nea daghanuunatka nyaawa ea sirat aba ghealooda meeng'meeng'i.

⁷ Hean gageanu akaleala aba jeedeaba diyeangiga asang'wan majeekcheewiin ak ghoadaw malaykajeegiga asispwaan gweeraji ispwa sisna dahaabu nea ghwanyiit nyarasta ASEETA majeek ea ghoah damanda manda muudeanooda;

⁸ ng'ata geanyiit gheeda sibata ASEETA aroosta leabu heeda giigheambiita ASEETA ea dea leabu uurdaanyi, ak ea manda eara siyagi ammu gawa jeeda gheeda sibata ASEETA ea eaghus ghwahit sawanaduutkiga asispwa bea malaykajeegiga asispwaan.