Giidaheechta 14 - Bibliyeeda Ghaydit

Dayeenda Gisilleanda ea fugaaschi

¹ Ng'ata ghaang'weardi, ak ghaadaayi gwanda uhuuda Giijeeda Sayuni Dayeenda Gisilleanda nea ghamiinaada, nea gwandeayi sea niny fih sagalamnyooji bughala ea haradam ea ang'wan nea gwandeawa gheawungaaschi ea gheawunga Ghwaan nea sing'oorsa gheamamuunatka nyaawa.

² Ak ghaayiinyi nyeashta nyaasha humng'eeda uurji nyeashta beega saang'a ak gawuurji nyeashta gighweendandeeda haw; ak nyeashi aayiinyiin gawuurji nyeashta fuga gidoondoorajeega las gidoondoorajeega nyaawa,

³ nea gwasarman duumdeesh aba madeeda hoorgeeda gheambalmeeda ea madeedeaba diyeangiga asang'wan majeekcheewiin ea madeeda gweargwa. Ak ea manda siida ammu ghoanaal geaw duumdida, geaghus fugiga as sagalama ea haradam ea ang'wan ghayi siikghu aba badayda ng'eanyiidean.

⁴ Suh gea mii ghang'uda geat ririnnyeanda aba gadeemga, aba gideaba ea ghaydidi; nea suh ea gea eada geeshta Dayeenda Gisilleanda gil aba hiji weah sean; asuh ea siikghu aba jeeda buuneeda nea gawuurji haghweega madeeda aba heeda ASEETA ea Dayeenda Gisilleanda,

⁵ ak ghuusiga nyaawa ea manda ng'uyeega, aba gideaba gwanya gilimuy.

Malaykaji samwagu

⁶ Hean ghaadaayi malaykajeanda nuut nea ghang'eata aba bugusta humng'eeda, nea gwandeawa giijasta miy manda muudeanooda jea gwarukwiisa fuga mida muunda ng'eanyiida, ea giliwas eamwa ea eemeeda ea iita ea buuneeda;

⁷ ak gwayi aba ghuuta haw, “Oawala ASEETA nea ghoatawji niny giigheambiita, aba gideaba damanda girgweageadaanyi nihidu; aghadoawana niny deabwat humng'eeda ea ng'eanyiida, ea basooda ea gheanyanga eenda.”

⁸ Gweadu geeshta malaykajeanda nuut bea iyeenya, nea gwayi, “Niibeadi, Niibeadi Babeleeda haw, aba gideaba ginung' ghwali eemoojiga sean difaayeeda gidida igasayi muyiin.”

⁹ Gweadu geeshta nyaawa malaykajeanda nuut bea samwagu, nea gwayi aba ghuuta haw, “Gili wassean iighadoawan diyeanyi ea gisiratiida, ak ghwanyas giirooraneeda aba gheamamdaanyi ghana geatindaanyi,

¹⁰ eara niny gayghwali difaayeeda nyarasta ASEETA, sisin nea meekuuyi gil aba jeeda gikoombeeyda nyarastaanyi, nea niny gajeesawan aba beasta ea giikayda aba madeeda malaykajeega ghaydidi, ea madeeda Dayeenda Gisilleanda.

¹¹ Ak gwadiyeada aroosta sawanadeeda nyaawa ea ghoah gweanyeeka manda muudeanooda; ak ea mayghwanyas fuufta, askweari ghana eawa, nea fuga ghadoawan diyeanyi gil ea gisiratiida, ea giliwas siida wassean mideawa giirooraneeda gheawungaaschi.”

¹² Hiji heeda mida giihang'ooyda fuga ghaydidi gil, nea fuga ang'waay digheanyeeka ASEETA gil ea masaweega Yesu.

¹³ Hean ghaayiinyi ghuuta nyaasha humng'eeda nea gwayi, “Ng'oara ng'asheesu: Ghang'wana siida meah ghamneawa meewsa heeda Ng'utamiida.” “Ghang'wana huumwa,” gwayi Guroorooda, “ak gafuuf iing'ata gadiyeeda nyaawa, aba gideaba sinaweega nyaawa ghwaat geeshta!”

Lajooda booga ng'eanyiida

¹⁴ Hean ghaang'weardi ak ghaadaayi shamooghooda eesh, nea uhuudeaba shamooghooni goopteada siida uurji orjeeda siida, nea uhuudaanyi gwanda shiipka dahaabu, nea gwanda geatindaanyi barda ng'aniip.

¹⁵ Gwarina jeeda gheeda sibata ASEETA malaykajeanda nuut, ak gaguurda aba ghuuta haw, gaguursa siidida apteada aba uhuudeaba shamooghoodean, “Adealda bardaang'u, ak guwi laja, aba gideaba booga ng'eanyiida niheas.”

¹⁶ Hean siidida apteada aba badayda shamooghoodean gwajaksa bardaanyi badayda ng'eanyiida, ak gealach ng'eanyiida.

¹⁷ Ng'ata gwarina malaykajeanda nuut jeeda gheeda sibata ASEETA mida humng'eeda, nea niny gwandeawa barda ng'aniip.

¹⁸ Ak gwarina malaykajeanda nuut heeda wagiida, nea dea burdeawa uurda beasta gil, ak gaguursa dea mideawa bardida ng'aniibiin aba ghuuta haw nea gwayeesha, “Geani bardida itaang'u ng'aniibiin ak gibini dayeega sabiibooda ng'eanyiida, aba gideaba haghweagaaschi niheas.”

¹⁹ Hean gwajaksa malaykajeandida bardaanyi badayda ng'eanyiida ak gaptu sabiibooda badayda ng'eanyiida, ak gwajaksa sabiibu jeeda shoomanda haw simuriisa difaayeeda nyarasta ASEETA;

²⁰ ng'ata geadatas gidida muura difaayiin aba jarooda heeda mawoosa mujiini, hean gwarina foojeanda jeedeaba gidida muura difaayiin, ea gageawiit ea gooyang'da ghealooda faraasi, ea gooyang'da gilomiitaji bughalaji iyeenya ea seedam ea damwalah.