Giidaheechta 13 - Bibliyeeda Ghaydit

Diyean iyeenya

¹ Hean ghaadaayi diyeayda nea ghwadaambiir aba jeeda basooda, nea gwandeawa gujaw damanamughuush ea iheeni ispwa, ak gwanda shiip damanamughuush uhuuda gujakaaschi ak gwandeawa gheawunga giing'weaka aba iheenga gujakaaschi.

² Nea diyeaydida aadaayiin gawuurji mariirda, nea geeshangaaschi gawuurji idamooda, ak ghuutaanyi gawuurji ghuuta ng'adiida. Ak ghoadaw hararjooda diyeayda uurdaanyi ea hoorgeadaanyi bea sugoocheanduumeeda ea gheambalmeeda haw.

³ Ghaadaayi uhuunagi aba iheengaaschi gawuurji gili mideawa dearjooda miyeeda, nea deaneadeadaanyi bea miyeeda ea nihaap, ak ghwaat geeshta diyeayda ng'eanyiisean aba muuwda.

⁴ Hean ghaghadoawan buuneeda ichiboodida, aba gideaba niidaw gheambalmeadaanyi diyeayda, hean ghaghadoawan diyeaydida nea gwayi, “Gawuurji ng'eaha diyeayda, ak gayghoamu ng'eaha gang'uchi sea niny?”

⁵ Ak geataw diyeayda ghuuta jea gabaloola ng'asheega hees bea giing'weaka, ak geataw gheambalmeeda jea gwasina gadiyeadaanyi sheeh haradam ea iyeenya;

⁶ hean ghwajaat ghuutaanyi goong'eawi ASEETA, nea goong'eawi eara gheawungaaschi ea heeda abiita, nea gea abiita humng'eeda.

⁷ Ak geesiksa gang'uchi sea fuga ghaydidi ak ghwajoar. Ak geataw gheambalmeeda aba badayda gilinyoo ea eemoochean gil ea buuneeda ea iita ea eemoojiga,

⁸ nea haleanjeeda sean mida muunda ng'eanyiida gayghaghadoawan niny, giliwas sih miyeeng'oorsa gheawungaaschi jeeda gitaabooda eaweega bea Dayeenda Gisilleanda ghayi sinuus nea miyeebwat sindeeta ng'eanyiida.

⁹ Gilinyoo gwandeawa iita dayiinya:

¹⁰ Siida wassean iijea gawa ghealooniga, gaygawa ghealooniga; siida wassean iilach gheateaba niirja aba ng'uta, eara niny gajealach gheata aba ng'uta. Nih heeda mida giihang'ooyda ea doobiiwnata fuga ghaydidi.

¹¹ Hean ghaadaayi diyeayda nuut siyeeng'u nea gwaleabu badayda ng'eanyiida; nea gwandeawa gujaw iyeenya nea gawuurji Dayeenda Gisilleanda ak gabaloolda ichibooda.

¹² Ak gagadiyeata gheambalmeedeaba diyeaydida bea madeedean iisidaah, ak ghwanung' ghoaghadoawan ng'eanyiida ea fuga mida jeeda diyeaydida bea madeedean, nea dearjoadaanyi bea miyeeda ea nihaap.

¹³ Ak gwasin gwadeagwajeega hees, nea iissa ghwanung' ghwararang'aana beasta humng'eeda ak ghwahidu ng'eanyi madeeda buuneeda;

¹⁴ nea aba gwadeagwajeega siitaw gwasin aba madeeda diyeaydean, hean gwareengani fugiga mida ng'eanyiidean, ak ghwanung' gwasin giduurji diyeayda silasa ng'uta ak ea gudugwanda;

¹⁵ ak geanung' gaguusa jeameeda gidida uurji diyeaydean ak abeeda ghoamu gidida uurji diyeaydean gabalool, ak ghwanung' ealajaada gheatkweaka fuga mwaghadoawana gidida uurji diyeaydean.

¹⁶ Hit gageanu sean fuga manang'i ea gea hees, fuga sean was meanang'oodiga ea gea barbari, sean fuga abal geat ea giing'oonyanga, ak geayiin giirooranga geatinda dugwa ghana gheamamuunatka,

¹⁷ ak abeeda ea siida jea ghoamu ghwasha gil ghana ghwashaayda, geaghus gwandeawa giirooraneedida was gheawungeaba diyeaydideaniin, ghana mooneeda gheawungaaschi.

¹⁸ Ak nih geeguura weaghuumeeda: ninyeeda mideawa fughareeda jea ghwanal ea dayiita mooneedeaba diyeanyi, nea nih ea gidiitiida buuneeda, nea mooneadaanyi ea bughalaji lah ea laadam ea lah.