Giidaheechta 12 - Bibliyeeda Ghaydit

Gatmooda ea ichibooda

¹ Ng'ata geadaah gwadeagooda haw aba humng'eeda was gatmooda siikwealsa aseeta, nea gwanda jeeda baneaguuka geeshangaaschi sheeda, nea uhuudaanyi gwanda shiipka miinga atamaniyeenya;

² niny abeeda ea bungaroocheanda gil, ak gooyeawda aba lajooda jeata, ak gwasawana aba jeata.

³ Ng'ata geadaah gwadeagooda nuut aba humng'eeda, ng'ula, hararjooda haw areara, mideawa iheeni ispwa ea gujaw damanamughuush, nea iheenga nyaawa gaba nih mideawa shiip ispwa.

⁴ Nea shoomng'eandaanyi goongiir miinga humng'eeda heeda haw, ak gwahisa badayda ng'eanyiida. Hean ghamiinaada ichiboodida aba madeedeaba gatmoodida riikghta gwaji jeeptean, ak abeeda ghwanukghuta jeaptaanyi damanda jiila;

⁵ hean gwaji baleanda was baleanda, ak gayghoahaaghwa eemoojiga sean aba bileangida gharinyeanda, ak baleandaanyi geetiing'da ea gawa heeda ASEETA ea heeda hoorgeadaanyi bea gheambalmeeda,

⁶ iidu gamng'aw gatmoodida gawa dareapcheeda, nea nisissa ASEETA heechea goobiida, ak geerear ak goobiida hoowa eawooji sagalama ea bughalaji iyeenya ea laadam.

⁷ Ng'ata ghang'eat ng'ucheeda aba humng'eeda, gang'uchi Mikaeli ea malaykajeagaaschi sea hararjoodida; ak gang'uchi ichibooda sea saawa ea malaykajeagaaschi,

⁸ iidu geajoar ak ea mudugwanda heechea goobiida aba humng'eeda.

⁹ Ak geejaksa ng'eanyi hararjoodida haw was ichiboodeaba garayiin, siguura Meang'nyeandeenda ea Shataani, was dea reengani ng'eanyiisean, ak geejagu badayda ng'eanyiida, ak eara malaykajeagaaschi geehisu ghapka ng'eanyi sea niny.

¹⁰ Ak ghaayiinyi nyeashta haw nyaasha humng'eeda nea gwayi, “Ghamneawa lealeanooda ea uurda ea Sugoocheanduumeeda ASEETEANYA ea gheambalmeeda Gristoydaanyi nihidu, aba gideaba sijaksa ng'eanyi dea aheakiida fuga siduupcheewi, ninyeeda aheakiida aba madeeda ASEETEANYA askweari ea eawa.

¹¹ Ak ghwajoar aba foojeanda Dayeenda Gisilleanda, ea aba ng'asheanda muuwuunooda nyaawa, ak ea mwabwariinya eaweega nyaawa eara gaweay miyeeda.

¹² Asi ang'weela, Ea humng'eeda, ea agoogeeni oondi jeedean! Asi agooga ashageada, Ea ng'eanyiida ea basooda, aba gideaba meang'nyeandeenda nirarang'aan ghwahidu heedeang'wa nea gaba nyarasta haw aba gideaba ghwanal gwandeawa gheadi nuwaas!”

¹³ Iidu nea ghwadaah ichiboodida gideaba sijaksa badayda ng'eanyiida, hean ghwaat geeshteaba gatmoodida jih baleanda was baleandean.

¹⁴ Ng'ata geataw gatmoodida meang'i iyeenya bea rabearda haw ak ghang'eata gawa dareapcheeda sheageewa ichiboodida, ak gawa heeda jea gweagiischi gheadi nuwaas, sheeh haradam ea iyeenya.

¹⁵ Hean gwarina ghuuteaba ichiboodida beega uurji gea eenda, aba badayda gatmoodida, ak ghwanung' ghwaat guldeayda.

¹⁶ Iidu ghaweat ng'eanyiida gatmooda, ak ghwajaat ng'eanyiida ghuutaanyi ak ghwanukghuta eendida rinna ghuuta ichiboodean.

¹⁷ Hean gwanyareeksa ichibooda gatmoodida, ak ghang'eat gawa ghoang'eat ng'ucheeda sea jeata siipuut bea gatmoodean, sea fugiga ang'waay digheanyeeka ASEETA nea gamuuwu iita Yesuun. Ak ghamiinaada aba badayda iseaskweanda basooda.

¹⁸ Hean ghamiinaada ichibooda aba ghuuta basooda.