Giidaheechta 11 - Bibliyeeda Ghaydit

Muuwshoodi iyeenya

¹ Ng'ata geegoonan ng'archeanda uurji bileangida siiteeniida, ak gwayeeshean, “Ng'eada ak giideeni gheeda sibata ASEETA ea heeda wagiida ea fuga mida jeeda gadoowani ASEETA,

² ak ea adiideeni bugharjeanda mida bwadaw bea ASEETA; dakta bwadaw, aba gideaba siitaw darooraka, ak gayghwadatas mujiineeda ghaydit sheeh haradam ea iyeenya.

³ Ak gaydaadaw Muuwshoodigeasu asiyeenya uurda ak ghwaramoar eawooji sagalam ea bughalaji iyeenya ea laadam, nea siikwealsa guniyajeega.”

⁴ Suh geedigiga asiyeenya siguura saytuunajeegean gil, ea hoorgajeegiga bea gheaboonyanga asiyeenya miinaada aba madeeda Ng'utamiida ng'eanyiidean.

⁵ Nea siida iigasa gwasawan saawa, gwarina beasta ghuusiga nyaawa ak ghwaak weajoodiga nyaawa. Ak ghoamu ghwayam beega ghoah foojeanda, nea iigasa gayghwalas ng'eanyiida aba giliwas lasita.

⁶ Saawa gwandeawa uurda jea ghwarada humng'eeda, ak ea maroabwana damanda ramoarana, ak gwandeawa uurda aba badayda beega ak ghwayam ghoah foojeanda, ak ghwalas ng'eanyiida aba giliwas dawni, aba gidagasiida.

⁷ Iidu nea niihiit muuwnooda nyaawa, gaygang'uchi diyeaydida leabu jeeda shoomanda mamuudeanean sea saawa, ak gayghwajoar ak gwanuus saawa,

⁸ nea muscheeka nyaawa gaygwalil aba ghuuta naweeda mujiineedida hawiin, nea geegala Sodoma ghana Misri, was heeda ghayi singoorsa Ng'utamiida nyaawa.

⁹ Aba eawooji samwagu ea gil gang'ula headiga buuneeda ea eemoojiga ea iita ea darooraka guumng'eega nyaawa ak ghaheawa gideaba gajeebuy.

¹⁰ Nea fuga mida badayda ng'eanyiida gaygahoosan aba badahuuka nyaawa nea gang'weela ak saawa gweatiisa geat haleanjeeda siipareanyi, aba gideaba sibang'su asiyeenyean gwasawan fugiga mida badayda ng'eanyiidean.

¹¹ Iing'ata eawooji samwagu ea gil hean ghwahidu giisiimeanda eaweega leabu heeda ASEETA ak gawa jeenyaawa, hean ghang'eatng'eat ghamiinaada aba geeshanga nyaawa, hean ghang'ut fugiga daahiin muuwda haw.

¹² Geeyiiy nyeashta haw leabu humng'eeda nea gwayeesha saawa, “Apkaani hiji!” Gwadiyeada humng'eeda nea ghabeawa jeeda shamooghooda, nea gang'ula weajoodiga nyaawa.

¹³ Nea aba damandida abeeda gwanda sawooda haw bea ng'eanyiida, ak ghoabeada meatkweanagi mwanang' bea mujiini; ak gameewa fih sagalamnyooji ispwa aba sawoodida bea ng'eanyiidean, ak ghang'ut muuwda gea siipuut, ak ghoaghaambiit ASEETA humng'eeda.

¹⁴ Ning'ata shageateaba iyeenya; ng'ula, niriikghta ghwahidu shageateaba samwagu.

Durumbeateedeaba ispwa

¹⁵ Ghaghuut durumbeateadaanyi malaykajeandeaba ispwa, ak ghwanya ghuusiga ajuur aba humng'eeda, nea geeyi, “Sugoocheanduumeeda ng'eanyiida goola ghoah sugoocheanduumeeda Ng'utamiideanya ea dea Gristoydaanyi, ak gaygoombaliischi ea ghoah damanda manda muudeanooda.”

¹⁶ Ak gweargiga atiktam ea ang'wan abiitpiida hoorgajeega nyaawa bea gheambalmeedean aba madeeda ASEETEAN goobeedeayi ak ghabwada jeesinga ng'eanyi nea ghamwaash ASEETA,

¹⁷ nea gwayeena, “Geebadiischooweey ang'iing'i, Ng'utamiida was ASEETA mideawa uurda, gindi nea gibean midana, aba gideaba nigeandi uurdaang'u haw ak giimbaliischi.

¹⁸ Ak gwanyareesi eemoojiga, ak ghwahidu nyarastaang'u, nea ghwahidu damanda jea eergweaksiina fuga nimeewa, nea geamwaar soomjoagaagu was sibanga ea gea ghaydidi, ea fugiga awali gheawungaaguun, was gea manang'i ea gea hees, ak geedatas suh datas ng'eanyiidean.”

¹⁹ Ng'ata geetin Gheeda sibata ASEETA mida humng'eeda, ak geadaah sandakwajeanda diigheanda aba jeedeaba gheanyi sibata ASEETA; abeeda gwanda dadamandeeda, ea nyeashta, ea gighweendandeeda humng'eeda, ea sawooda ng'eanyiida, ea roopta haw muuchi bea lagheanga.