Giidaheechta 10 - Bibliyeeda Ghaydit

Malaykajeanda ea gitaabooda mwanang'

¹ Ng'ata ghaadaayi malaykajeanda nuut mideawa uurda nea ghwararang'aana humng'eeda, nea siikwealsa shamooghooda, nea uhuudaanyi gwanda gidaghuweang'da sheagiitka, nea gheamamdaanyi ghawaar aseeta, nea geeshangaaschi gawuurji daranajeega beasta.

² Nea gwandeawa gitaabooda mwanang' giitineat aba geatindaanyi. Ak ghoalaabwa geeshtaanyi bea geatinda dugwa jeeda basooda, nea geeshtaanyi ghaadaam ghoalaabwa badayda ng'eanyiida.

³ Nea gooyeawda aba ghuuta haw, nea ghwanyaashta daghata dea ng'adiida; iidu nea gooyeawda, ghwanya ghuusigeaba giighweendanyeekiga asispwaan.

⁴ Ng'ata nyeashteaba giighweendanyeekiga asispwaan, abeeda ea neagasayi dang'waar, hean ghaayiinyi ghuuta leabu humng'eeda nea gwayi, “Aroora ng'asheesu rugu giighweendanyeekiga asispwaan, ak ea ading'waari.”

⁵ Nea malaykajeandida gwachi aadaayiin ghamiinaada aba jeeda basooda ea badayda ng'eanyiidean ghamiinda geatindaanyi bea dugwa googeal humng'eeda,

⁶ ghwaak habeawooda aba ninyeeda majeek ea ghoah damanda manda muudeanooda, ninyeeda bwat humng'eeda ea haleanjeeda mida jeeda, ea ng'eanyiida ea haleanjeeda mida jeeda, ea basooda ea haleanjeeda mida jeeda, ak ea maygudugwanda shing'deayda,

⁷ geaghus aba askwearjoojiga jea ghaghuuda durumbeati malaykajeandeaba ispwa, abeeda makcheameeda ASEETA aba heeda soomjoagaaschi was sibanga gaygamajeegiit.

⁸ Hean gabiikta goobaloolan ghuutida gwachi aayiinyi leabu humng'eedean nea gwayi, “Una, ak gigeandi gitaaboodida giitineat mida geatindeaba malaykajeandida miinaada aba badayda basooda ea badayda ng'eanyiidean.”

⁹ Geaweesi malaykajeandida ak geayeeshi goona gitaaboani mwanang'iin; ak gwayeeshiinean, “Geanda, ak giyaagi; ak gayghang'waaniit aba jeadaang'u, nea aba ghuutaang'u gajea inyeanda maleeda.”

¹⁰ Geageandi gitaabooda mwanang' aba geatinda malaykajeanda ak ghaayaaji; ak ea inyeanda maleeda aba ghuuteanyu, hean iyaahiichi agita ghang'waaniit aba jeedeanyu.

¹¹ Geeyeeshiinean, “Gamiiseey rukuta gicha ramooranga aba badayda fuga saang'a ea eemoojiga ea iita ea sugoodiga.”