GHWASIILDEANGA 9 - Bibliyeeda Ghaydit

Weaghuumeeda ea leendeeda

¹ Weaghuumeeda nideas gheanyi, gheeda gaba daranaji ispwa.

² Ak ea ninuus dugwa jea eayaak aba ghweelmeeda, nea googuuyi eara difaayeadaanyi nea ghang'aap eara heechea eeyeagiischeewa.

³ Hean goojeakta haweagaaschi bea gadiyeeda gaguursa buuneeda nea gwanda iheenga heayeeniga mujiini.

⁴ “Siida mwanala gil doani gah!” Nea gwayeesha eara siida mwanang' fughara.

⁵ “Beeni aga mukaateeydeanyu, nea gileahi difaayeeda eaguuyi.

⁶ Nung'waada leendeeda ak gajabiidana, aada geeshta naweeda fughareeda.”

⁷ Siida iyawoowsa fuga foola fih gajeapwaaspwaas, nea inyas giiwoowsi siida muy gajabita jeeda sawanadeeda.

⁸ Adiiwoowsi siida foola fih, aba gideaba gayghwasinyi, awoowsiina siida mideawa weaghuumeeda ak gayghabwariinyi.

⁹ Anaala siida mideawa weaghuumeeda ak gaygawa mwadi aba weaghuumeeda, anaala siida doabiiwaat ak gaygawa mwadi nea ghwanyas fughareeda

¹⁰ Gheawalmeeda NG'UTAMIIDA heeda ng'eada weaghuumeeda gil, nea nalooda diita ghaydidiin, ea nyasooda fughareeda gil.

¹¹ Aba gideaba aba weeteanyu gajeahaat eawoojigaagu, nea geahaat gweanyeeka eawoojigaagu.

¹² Indeawi weaghuumeeda, gindeawi weaghuumeeda aba saseadaang'u, nea ifooli buuneeda gayghwaaknyi lugooda.

¹³ Gatmooda dasha iissa goojuur muuchi, aadasha ak ea mabwaspwasa.

¹⁴ Inyeesa goobiita gidaghuuteaba gheanyi nea ghwayiin hoorgeadaanyi heetiyeada bea mujiini.

¹⁵ Ak gaguuriisa fuga ng'ata aba naweeda, fuga weay nea mayamna geat.

¹⁶ “Gilinyoo ea dasha dahina jeeni!” ak gwayeesha gilinyo ea sih dasha.

¹⁷ “Beega sijagwat ea inya muuchi, mukaateeyda siyaak aba makcheameeda aamiy.”

¹⁸ Ak nih ea mwanala gideaba muscheeka gwanda jeeni, ea gideaba rabastaanyi gwanda uuta ng'eanyiida gheeda maloonghajeega.