GHWASIILDEANGA 7 - Bibliyeeda Ghaydit

¹ Orjeedeanyu ang'waanya ng'asheegeasu, ak giidiiwi diigheanyeekeasu.

² Ang'waanya diigheanyeekeasu ak gaynyasa giibinda, ea deaweedeedeanyu gawuurji lagheaneeda gheang'daang'u.

³ Rasiina badayda mooringaagu, ak ging'oorsi jeeda gurooroadaang'u.

⁴ Eeshiina weaghuumeeda, “Ang'iing'i guwoosi hudiyya.” Ak bareaynata uhuuda, guwoosi siida eaduupcheewi.

⁵ Ak gaygafurnyi aba gatmooda hiseada, nea ghwasajaneey ng'asheega munyas bea gatmooda was rabascheanda.

Gatmooda hiseada

⁶ Ghayi eaweecha geang'weersi jarooda, nea ghaang'weardaawi seawuutkeaba gheenyu.

⁷ Hean ghaadaayi gheareemanga saang'a dasheahi, nea aba jeenyaawa akaleala ea mandeawana fughareeda.

⁸ Abeeda gawa nea ghwaat naweedida, neekeewa heeda abiita gatmoodidean, hean ghwaat naweeda weah gheedeaba gatmoodida.

⁹ Abeeda damanda rakteayda aseeta gil, nea nimeaji gamisaniit.

¹⁰ Deagheata gwaroonyi gheareemaneedida sea gatmoodida, nea nishuup hang'weaka hiseadayeanduumeeda nea gagasiischi gurooroadaanyi.

¹¹ Gatmooni gwandeawa nyeashta nea hang'waay uuh, ak ea moapta ng'eanyi geeshangaaschi aba ghoah.

¹² Inyeesa gwanda jeeda naweeda bareanda, nea hich gwanda naadi, ea ghuusiga naweadinga, inyeesa geadaah nea gagwalgwaleesa.

¹³ Hean ghoang'waay gatmoodida gheareemaneedida ak ghwasam gheata, ak goobalool nea mabwaspwasa nea gwayeesha.

¹⁴ “Heedeanyu gwanda haleanjeeda sisapa geadi bea ghadooweeda bea hoyyoo, ak ghamneawa ea neageandi habeawajeegeasu.

¹⁵ Ak ghoah gidaahini dadeaptaawaneey, ak geagaseey muuchi, ak ea naadaayeey.

¹⁶ Naabwachi bulaliideanyu muuchi, aba hang'weaka bumbuni miyaasiin leabu ng'eanyiida Misri ak ea ng'ooreadi.

¹⁷ Naayeashi bulaliideanyu geediga ng'andidi, ea buureata, ea hideeda ng'andit ea gadaroonga ea mdalasiini.

¹⁸ Beeni eeluudayeena ea ghoah sakteayda, beeni eehoosana sasanuukaasa aba bariinyeega.

¹⁹ Siyeedeanyu manda ghoaw, nuwa bareanyeeka sheagi.

²⁰ Niyaat shageeda lapiya, maygabean gabiigu ghoaw.”

²¹ Ak ghaghurghur aba ng'asheagaaschi miyaasiin saang'a, nea ghwasapsap aba baloolda ghuutaanyi ea ghwajoar.

²² Hean ghwadoabiiw ghwaat geeshteaba gatmoodida, gawuurji deeda jea ealach gheata, ghana siitasha aat geaw ghealooniga.

²³ Eara eefut murdeeda aba geacheeda, gawuurji dariideanda lamwach gawa jeeda ghuduumbwaada, nea mwanala gideaba gwashageat eaweagaaschi.

²⁴ Asi orjoogeasu, ooleeysean iit ghamneawa, ak gooteemsheesi ng'asheega earukuneegwa.

²⁵ Adiigeali gurooroadaang'u naweadingaaschi, nea adiski jeeda naweadingaaschi.

²⁶ Aba gideaba niny nibwaay headiga saang'a, asaha niny nibwar lugooda saang'a.

²⁷ Gheanyi naweeda weah gheeda maloonghajeega gil gayghwararang'aada ea ghwahita jeeda ghoorajeega miyeeda.