GHWASIILDEANGA 5 - Bibliyeeda Ghaydit

Miinda gheang'da aba hiseadayeanduumeeda

¹ Orjeedeanyu iinya weaghuumeedeanyu, aleeysiiniit, ak giing'waanyi fughareedeanyu.

² Abeeda gajamuusa mideawana bareaynata uhuuda, nea goomajeek ghuutaang'u fughareeda.

³ Aba gideaba ng'asheega leabu ghuuta gatmooda hiseada ea inyeanda maleeda, ak ng'asheagaaschi ea bumbuni ea ghang'al nagheeda.

⁴ Ak huuydeandaanyi, gajea ng'waan ea ghang'al gidang'weanda, nea gwanda ghuuta ng'uta sishit meadajeega sean.

⁵ Geeshangaaschi gwararang'eesa jeeda miyeeda, nea heedala ghoang'waay geat sea gheeda maloonghajeega.

⁶ Ak ea mayghwadaah muuchi naweeda eaweega, nea naweadingaaschi gwaneaydooschi nea mwanala gil.

⁷ Asi orjoogeasu ooleeysean iit ghamneawa, ak ea adoanung'waadi ng'asheegeasu.

⁸ Saja naweadingaagu asheagiideewana niny, nea adineekiisi gidaghuuteaba gheanyi.

⁹ Adiidawi buuneesuurja mureedaang'u ea fuga munyas seara gweanyeakaagu.

¹⁰ Adagwalang'u rabasta aba uurdaang'u ak gisini gadiyoojigaagu aba jeeda gheeda rabasta.

¹¹ Ak giinyahuushi eaweagaagu huuydean, iisilas saseadaang'u ea sawanana.

¹² Ak gajeena, “Gida aasiti miinda gheang'da, nea gafool gurooroodeanyu gideaba gajeewoowsean.

¹³ Nea mealeeysiina iit ghuuta giinealshoodigeasu, nea mealeeysiina iit gea anaalanan.

¹⁴ Abeeda niriikghta dabita jeeda ng'asheega munyas sean, bugusta eemeeda ea gea bwatgeat.”

¹⁵ Leaha beega simeadaang'u ak ghwahit, beega rinna jeeda healadeedaang'u.

¹⁶ Heapi gheanyanga eenigaagu gayghwadarda gwasheagiidi? Ea eeniga mida beega gagal naweeda bareanda?

¹⁷ Gayghoah gaagu nea gibeacheewi, nea mii gea rabasta gil sea ang'iing'i.

¹⁸ Gagasa ghwanyas gheanyangaagu bea eenda ghawooda, ak gihoosani gatmoadaang'u bea gheareemaneanduumeeda.

¹⁹ Aamiy ea gawuurji ndoopkeeda, ak ea daamdaamwaat ea gawuurji mayeanda, mugeaydaanyi deahoosanyi galeaga sean, ak gageandaneey bariinyeagaaschi damanyoojiga sean.

²⁰ Orjeedeanyu, ghwasaan anda ging'weelayi aba badayda hiseadayda, ak gibwati daghata gatmooda hiseada?

²¹ Aba gideaba naweeda siida gwanda jeeda naweeda NG'UTAMIIDA nea gooteemsheesa searoojigaaschi sean.

²² Siida muy seara gajeang'waay aba munyindaanyi, nea gabwa geaw gayghoang'waay ghuduumbwaada aba jeeda riing'eadaanyi.

²³ Siisi gayghami aba gideaba miighwanyas miinda gheang'da, ak gayghwaroat aba seang'ayda leendeadaanyi.