GHWASIILDEANGA 4 - Bibliyeeda Ghaydit

Miyinda weaghuumeeda

¹ Ea orjoogeasu ooleeysiiniit ginyah ghweandeang'wa, ooleaydit ak gajanyasa fughareeda.

² Aba gideaba geagoonyi giinealshooda miy adoanung'waadi deaweedeedeanyu.

³ Abeeda geawooschi orjeeda aba heeda bwaabwa, ak geayeadayi geaw ng'eanyi, ak geabea geaw aba heeda iya.

⁴ Ak ghoanaalan nea gwayi, “Ang'waanya ng'asheegeasu aba jeeda gurooroadaang'u, ang'waanya diigheanyeekeasu, ak gaynyasa giibinda.

⁵ Adagwarooseey, nea ading'ami heeda ng'asheegeasu, nyasa weaghuumeeda ea nalooda.

⁶ Adinung'wi heeda ak gayghoahaaghwaneey bwariinya niny ak gaygafurnyi.

⁷ Ghang'wana weaghuumeeda, asi nyasa weaghuumeeda, asaha nyasa haleanjeadaang'u sean ak ginyasi fughareeda.

⁸ Aghaambiida niny, ak gayghwanung' nyasa hawunda, gaygagu mureeda inyas giing'waanyi niny.

⁹ Gaygwarasa uhuudaang'u weasta miy, nea gagoonyi shiipka miyaas.”

¹⁰ Orjeedeanyu aleaydiit ak giing'waanyi ng'asheegeasu, ak gayghwasaang'ayiit gweanyeakaagu.

¹¹ Naanaaleey naweeda weaghuumeeda, ak ea naanung' siga naweeda doabiiwaat.

¹² Inyas guwi ea manda gichea ghoadealnyi nea iifwaji ea manda gichea gwaruuseey.

¹³ Ang'waanya muuchi fughareeda nea adisiksi gawa, ang'waanya, aba gideaba niny eaweagaagu gil.

¹⁴ Adiyaadi naweeda fuga munyas nea adineayeewi jeeda naweeda fuga munyas.

¹⁵ Mulsiina, adiski eara murdeeda mulsiina ak guwi heechea una.

¹⁶ Fuga munyas may gaweay ruweanga iimiigwasin Ng'asheega munyas, mayghoang'waay ruweanga iimiigwaruusa siida.

¹⁷ Aba gideaba ng'asheega munyas hamita nyaawa gil, nea ng'weanjuumeeda ea difaayeeda nyaawa.

¹⁸ Ak naweadinga fuga doobiiweadi gawuurji weeshinda abwaay muuchi askwearda sean.

¹⁹ Naweeda fuga munyas gawuurji misaneeda ng'waan, ea mwanala gidaruusa saawa.

²⁰ Orjeedeanyu iinya ng'asheegeasu aleaydiit, aleeysiiniit ak giing'waanyi gideargu.

²¹ Adaghang'amwa headaang'u, ak giyiini jeeda gurooroadaang'u.

²² Aba gideaba eaweega gil aba heedeaba fugiga nyasiin, ea meajooda sasanuuka nyaawa sean.

²³ Fura gurooroadaang'u muuchi, ea ghang'al haleanjeeda sean ifurayi aba gideaba heeda rituuna gheang'deenda mideawa eaweega gil.

²⁴ Sajana geaw hang'ooynata uhuuda, nea adagwarugu ghuutaang'u ng'asheega ng'uyeega.

²⁵ Gheanyangaagu nung' gang'ula mwadi, nea jiiweega gheanyangaagu ginung' gang'ula mwadi muuchi.

²⁶ Ateemsheesiina muuchi gichea sina, ak abeeda gichea sina gayghoadoabiiw.

²⁷ Adisachsi geaw gala geatinda dugwa, ghana geatinda ghaadaam, nea aduwi jeeda ng'asheega munyas.