GHWASIILDEANGA 3 - Bibliyeeda Ghaydit

Geergweaksa gheareemanga

¹ Orjeedeanyu adagwarooseey giinealshoodeanyu, ak giing'waanyi diigheanyeekeasu aba jeeda gurooroadaang'u.

² Aba gideaba gaygooheaneey seang'ayda eawoojiga, ea gweanyeeka ea eaweega, ea hoyyoo.

³ Adiiheeleewi geaw baydeayda ea huumeanda, rasiina gheataang'u ak ging'oorsi badayda beehiida gurooroadaang'u.

⁴ Ak abeeda gajeamwasnyi, nea geegwarseey aba madeeda ASEETA ea madeeda siida.

⁵ Ghusa NG'UTAMIIDA aba gurooroadaang'u sean, ak ea adukghusi fughareadaang'u nea gibwaageaw.

⁶ Aba naweadingaagu sean mwasa niny, ak gayghoadoabiiw naweadingaagu.

⁷ Adideaksi geaw gideaba gindeawi weaghuumeeda, awala gheang'da NG'UTAMIIDA, ak ging'ami geaw ng'asheega munyas.

⁸ Nih gayghoah meajooda aba saseadaang'u, ak ghwanung' ghoah nagheeda nea ghahawda geakaagu.

⁹ Sisiina NG'UTAMIIDA mureeda aba haleanjeadaang'u, ea aba boagaagu sean bea madeeda.

¹⁰ Ak abeeda gajeanyiit gijigoongaagu muuchi, nea dahuundigaagu ghwanyiit difaayeeda heeseadi.

¹¹ Orjeedeanyu, adifooli ghoorjooda NG'UTAMIIDA, nea adinyareasi iyawoowseey niny.

¹² Aba gideaba NG'UTAMIIDA gaygoowoowsa siidida bwariiyiin, gawuurji gidawoowiisiinda ghweanda orjeedaanyi bwariiy.

¹³ Ghang'wana siidida ninyas weaghuumeedean, ea siidida nyas naloodean.

¹⁴ Aba gideaba weaghuumeeda ghang'al lapiya, ak nyageadaydaanyi ghang'al dahaabooda miyaas.

¹⁵ Fughareeda ghang'alda ea lagheanga haw sheayeat siguura marijaani, nea eara haleanjeeda ibwariinyi sean ea majeegala.

¹⁶ Gwandeawa eaweega saang'a aba geatindaanyi bea dugwa, meanang'oocheanduumeeda, ea mureeda gwanda geatindaanyi ghaadaam.

¹⁷ Naweadingaaschi aamiyaas muuchi, nea naweadingaaschi sean gaba hoyyoo.

¹⁸ Niny geeta eaweega gil aba fuga ang'waay niny muuchi, ghang'wana fuga ang'waay geat sea niny.

¹⁹ NG'UTAMIIDA gwasin sindeeta ng'eanyiida aba weaghuumeeda, ak aba fughareeda gwasin humng'eeda.

²⁰ Nea aba fughareadaanyi ghwanung' ghabwaasha bugusuunatka eeniga, nea shamooghuutka ghwanung' ghoaptu rahooda.

²¹ Orjeedeanyu, adaghang'amwaneey ng'asheesu, ang'waanya weaghuumeeda huumwa ea bareaynata uhuuda.

²² Ak gayghoah eaweega aba gurooroadaang'u, ea dagheerjeanduumeeda aba gheataang'u.

²³ Ak gajaada naweadaang'u nea gibea hoyyoo, nea eara geashtaang'u ea majeeruusa.

²⁴ Mayghang'unyi muuwda iindi ruweanga, asaha, gaylila ak ruweangaagu gajea miyaas.

²⁵ Adibeali iisishamnyi, ghana iihidu ng'asheega munyas bea fuga munyas.

²⁶ Aba gideaba NG'UTAMIIDA raroadaang'u gil, ak gaygafur geashtaang'u ea meaghasa.

²⁷ Siida iigasa weeta giidawi gidagasa, iimusi weada.

²⁸ Adiyeeshi gischeewoocheandaang'u, “Una ak gibiigu numuji; nea numuji gaydagu”–nea gidida gwachi jea adawaan ea neekeeweey.

²⁹ Adimwali sinooda ng'asheega munyas aba badayda gischeewoocheandaang'u, was dea mida murdeadaang'u nea ghaghay gideaba gaba seayu.

³⁰ Adijaluudayeewi siida iimanda gidoomeaji, iimiigwasawanyi aba gida was sean.

³¹ Adishisi ghaang', siida muy seara, nea adiyaadi geeshta sinaweagaaschi.

³² Aba gideaba fuga munyas ghwasit NG'UTAMIIDA, ak gwasin duupcheeda aba heeda fuga doobiiweadi.

³³ Mooshteayda NG'UTAMIIDA gwanda gealga fuga munyas seara, ak ghoadaw ghawooda gealga fuga doobiiweadi.

³⁴ Aba huumwa inyeesa gafool fuga foola fih, ak ghoadaw fuga eadageat ng'eanyi dagheerjeanduumeeda.

³⁵ Fuga weaghoodi gayghwanyas mureeda, nea fuga dasheahi gajeapwaaspwaas.