GHWASIILDEANGA 2 - Bibliyeeda Ghaydit

Shiipka dagheerjeanduumeeda

¹ Orjeedeanyu, inyeesa gimwasi ng'asheesu, nea marooseey diigheanyeekeasu.

² Aleaydiit ak giyiinyi weaghuumeeda, ak gifursi gurooroadaang'u ghwanal.

³ Asaha inyeesa giguursi weaghuumeeda, ak giijuuri aba gasooda nalooda,

⁴ Ak gigasiidi weaghuumeeda lapiya, nea gigasiidi gisiitiiw funyaat.

⁵ Abeeda gaynala gheawalmeeda gheang'da NG'UTAMIIDA, ak abeeda gaynala ASEETA.

⁶ Aba gideaba NG'UTAMIIDA ghoadaw buuneeda weaghuumeeda. Nea ghuutaanyi gwanda fughareeda ea nalooda ng'asheega.

⁷ Inyeesa goodiiwsa weaghuumeeda hidaat fuga doobiiweadi, niny igeambooda gil aba heeda fuga doobiiweadi.

⁸ Ak gafur naweadinga fuga sina ng'asheega doobiiweadi, nea ghaghamwat naweadinga fugaaschi ghaydidi.

⁹ Inyas giileeysean iit, abeeda gaynala gea doobiiweadi, ea doobiiwnata, ea gheawalmeeda. Ak gaynala gichea sina.

¹⁰ Aba gideaba gaynyasa weaghuumeeda aba jeeda gurooroadaang'u ak fughareeda gayghoamiidu saseadaang'u.

¹¹ Bareaynata uhuuda gaygafurnyi, nea nalooda gayghoahaaghwaneey.

¹² Ak gayghwasajaneey naweeda muy, ea fuga ruku ng'asheega roodaweega.

¹³ Fuga abuut naweeda doabiiwaat, ak ghwaat naweeda gal jeeda misaneeda.

¹⁴ Ak gahoosan aba sinooda ng'asheega munyas, nea ghabwariiy ng'asheega munyas bea roodaweega.

¹⁵ Gea nirooda aba naweadinga nyaawa, ak ea hang'oonyi iheeni aba naweadinga nyaawa.

¹⁶ Ak ghaaghuuhaneey gatmooda hiseada, asaha, hiseadayda mearmearaniischi aba ng'asheagaaschi,

¹⁷ inyeesa ghwanung'wa heeda dea duupchi bea gheareemaneanduumeadaanyi, ak gwaroosa neajeeda ASEATAANYI.

¹⁸ Aba gideaba gheanyi gagal miyeeda, nea naweadaanyi gagal heeda fuga nimeewa.

¹⁹ Nea gilinyoo gawa heeda ea manda dea biigu eara akaleala, ak ea maygut gabiiksa naweeda eaweega.

²⁰ Ak guweesi naweeda fuga miyaas, nea giing'waanyi naweeda fuga doobiiweadi.

²¹ Aba gideaba fuga doobiiweadi gaygoobiida badayda ng'eanyiida, nea gea hideadi gaygoobiida jeadaanyi.

²² Ak fuga munyas gajeasaja badayda ng'eanyiida, nea gea sina milmilanda gajeegeanda.