GHWASIILDEANGA 10 - Bibliyeeda Ghaydit

Ghwasiildeanga Sulemani

¹ Orjeeda mideawa weaghuumeeda, gayghwanung' gahoosan ghwaan, nea orjeeda dasha gayghang'uda ghaamwat gurmeahiida.

² Baruureega sinyasa naweeda muy mwahida, nea doobiiwnata gaygwalealna siida jeeda miyeeda.

³ NG'UTAMIIDA mayghwanung'waada saseeda siida doabiiwaat ghabwar jalooda, nea ghoadeal geawunda gheang'da siida muy.

⁴ Ghaleehooda gaygweadu barbaranda, nea siida gadiiyi muuchi gayghwanyas meanang'oocheanduumeeda.

⁵ Orjeeda mideawa weaghuumeeda inyeesa ghoawaam damanda lajita booga, nea orjeeda rooji damanda lajita booga gayghwanyas baspaseega.

⁶ Siida mideawa doobiiwnata gayghwanyas ghawooda, nea ghuuta siida muy ea niing'eat ng'ooweata.

⁷ Fuga doobiiweadi gajeepkeadi aba ghawooda, nea gheawunga fuga munyas ea majeepkeadi earahay.

⁸ Siida mideawa weaghuumeeda aba guroorooda gayghamwas digheanyeeka, nea siitasha mideawa ng'asheega saang'a gajealas uhuuda.

⁹ Siida weah nea doabiiwaat gaygawa nea gaba seayu, nea siida huteawi naweadingaaschi gajeadaach.

¹⁰ Dea inyeesa gwanuuksa siida gheang'da, gayghwanyas sawanadeeda, nea siitasha mideawa ng'asheega saang'a gajealas uhuuda.

¹¹ Ghuuta siida doabiiwaat gheang'deenda eaweega gil, ak ghuuta siida muy gwadukuta ghwarjeeda.

¹² Sicheeda gaygweadu jaliida, ak bariinyeega gwadukuta giidiinyeanyeeka sean.

¹³ Weaghuumeeda gwanda ghuuta siida mideawa fughareeda, ak fuga mandeawana fughareeda gajeabwar badahuuka aba bileangida.

¹⁴ Fuga mideawa weaghuumeeda inyeesa goodiiw fughareeda, nea baloolda siitasha gaygabean gweadu lasooda uhuuda.

¹⁵ Haleanjeeda meanang'ocheanda mujiineadaanyi majeek gil, nea barbaranda siida bwarbwar gayghwalas uhuudaanyi.

¹⁶ Gadiyeeda siida doabiiwaat gagal heeda eaweega, booga fuga munyas gagal heeda riing'eeda.

¹⁷ Siida mwas giiwoowsiinda gwanda jeeda naweeda weah jeeda eaweega, nea daheawa giiwoowsiinda gwanda jeeda giidiinyeanda.

¹⁸ Siida fuy sicheeda ghuutaanyi gaba ng'uya, nea dea napiisa siida ng'uyeega aadasha.

¹⁹ Heeda mida ng'asheega saang'a gaygwanda giidiinyeanyeeka, nea siida nap ghuutaanyi gwandeawa weaghuumeeda.

²⁰ Ng'ushapta siida doabiiwaat gawuurji lapiyeeda hidaat, nea guroorooda siida muy marachi gil.

²¹ Ng'asheega siida doabiiwaat gayghaweat fuga saang'a, nea fuga dasheahi gaygameewa aba gideaba mandeawana fughareeda.

²² Ghawooda NG'UTAMIIDA gaygweadu baruureega, nea siida gadiiyi muuchi ea mayghoahaat giiseaneega.

²³ Aba heeda siitasha, sinooda ng'asheega munyas gawuurji deangheeda, nea fuga mideawa fughareeda gahoosan aba weaghuumeeda.

²⁴ Gidawal siida muy gichea ghwanyas gil, nea fuga doobiiweadi gayghwanyas gidagasa.

²⁵ Shaarara gayghang'ata ak siida muy gayghwaroat, ak siida doabiiwaat gajeemajeek damanda manda muudeanooda.

²⁶ Gawuurji gidang'weanda aba ghuuta, ghana aroosta iing'ut gheanyanga ea giduurji siida ghaleehooda gil aba heeda siidaanyi ajeakta.

²⁷ Gheawalmeeda NG'UTAMIIDA gayghoahaat eaweega siida, nea siida muy gaygabean ghami nea miighwahita damanda.

²⁸ Rarooda fuga doobiiweadi gayghoah hooseaneega, nea rarooda fuga munyas gayghwaroat.

²⁹ Naweeda NG'UTAMIIDA heeda jea gafachsa siida doabiiwaat gil, nea fuga sina ng'asheega munyas gayghwalas uhuuda.

³⁰ Siida doabiiwaat majeegeanda earahay, nea fuga munyas ea maygoobiida badayda ng'eanyiida.

³¹ Ghuuta siida doabiiwaat gwarituuna ng'asheega weaghuumeeda, nea ng'ushapta baloola ng'asheega munyas gajealach.

³² Ghuuta siida doabiiwaat ghwanal ng'asheega hidaat jea gwarugu, nea ghuuta siida muy gabaloola gea munyas.