Biblia Todo Logo
Baibulo la pa intaneti

- Zotsatsa -

Filippi 4 - Bibliyeeda Ghaydit


Gichea eabeada

1 Asi, orjoogiyya, aabwariinyi nea geagasayi, was hooseaneegeasu ea shiipka amiinaada nea goomajeegiichi aba jeeda Ng'utamiideanyu, fugeasu aabwariinyi.

2 Geamuschi Eudiya ak geamuschi Sintike gideaba aduupcheena aba jeeda Ng'utamiida.

3 Ak geamuscheey eara ang'iing'i, siideanyu bea huumwa eaduupcheewi, eaniyean weada gadeemsu, aba gideaba gagadiiy sea aniini aba iita giijasta miy sea Glementi sea fugeasu mwaatkwa eaweecheewi, mida gheawunga nyaawa jeeda gitaabooda eaweega.

4 Ahoosana aba jeeda Ng'utamiida galeagasean; ak geabiikti dayi, Ahoosana.

5 Anung' ghwanal buuneeda sean milikghteaydeang'wa. Ng'utamiida nineekiit.

6 Adoodeawiichi geat aba ng'asheanda wassean, geaghus aba mooshta ASEETA nea ghoamwaschi ghawooda, nea ghoabwachi ASEETA ak ghwanal ASEETA gidoogasayi wassean.

7 Nea hoyyooyda ASEETA, adaraam fughareenga sean, gaygafur jeesingeagwa ea fughareengeagwa aba jeeda Gristo Yesu.

8 Asi orjoogiyya gidahuuydean jea ooteemsheesiina nih, ng'asheega sean was gea huumwa, ea gea mideawa mureeda, ea gea doobiiweadi, ea gea miyaas, ea gea sibwariiy, ea dagheerjeanduumeeda iimida miyinda wassean, ghana giigheambiita miy wassean, ooteemsheesiina ng'asheesu.

9 Ng'asheega ghayi sinaleagwa leabu heedeanyu ak ghoang'waanyi nea ghoayiinyi nea goodeaksi heedeanyu, asina suh, ak ASEETA mideawa hoyyoo gaygoobiida heedeang'wa.


Badiischooda aba haleanjeeda siitayda

10 Aniini neahoosanyi muuchi aba jeeda Ng'utamiida, aba gideaba huuydeanda iidu ea noobiikti ooteemsheesiina badaydeanyu, gawuurji gidaghayi ooteemsheesiindi gideawuurjeewi ak ea moanyasi gheata.

11 Ak ea mii gideaba gearugu ng'asheesu nea gwanda gideagasayi, aba gideaba aniini naanali aba damanyoojiga sean gideawuurjeewi ak ghoahiidan gideandeawi.

12 Ghaanali hiing'eanooda, ak ghaanali nyasooda haleanjeeda; aba gheatkweaka sean, siinaalan lang'uudadeeda ea jalooda, dandeawa haleanjeeda ghanea meandeawani.

13 Ghaamuuschi dasin haleanjeeda sean aba siidida goonan uurdean.

14 Ak ea noosinyi ng'asheanda miy aba damanda sindeayeesi jeeda sawanadeedeanyu.

15 Nea agooga fuga Filipi, ghoanali gideaba aba damandida bea giing'eeta Giijasta miyiin, damanda ealeapni Makedoniya, manda ganiiseeda eaweecheewi aba ng'asheanji bea giidaydeayda ea giing'ooydean geaghus agooga;

16 ak eara aba damanda eandeewi Desalonike iimiisean gooyeanean haleanjeeda eagasayi ak ea mabeachi eaweecheanjagi.

17 Mii gideaba geagasayi haleanjeeda jea agoonean gil; geagasayi haghweega jea ghoahaada aba mooneedeang'wa.

18 Ak ea naanyaschi haleanjeeda sean, ea ghwanaawda, aba seang'ayda; was gea ghayi eanean Epafroditoheeda leabu heedeang'wa, was haleanjeeda oogoonyi, was shearooda nagheeda ng'andit, ea haleanjeeda sisapa geadi bea ghadooweeda biissa ghabwariiy ASEETA.

19 Nea ASEETEANYU gaygagooneegwa haleanjeeda sean oogasayi aba dagheerjeanduumeadaanyi aba giigheambiita mida jeeda Gristo Yesu.

20 Asi eakghaambiida ASEETA was Ghweandeanya, ea ghoah damanda manda muudeanooda. Amin.


Giighacheeka huuydean

21 Oakghada fuga ghaydidi sean mida jeeda Gristo Yesu. Ghoaghadeagwa orjoogiyya eandeawi aba hiji.

22 Ghoaghadeagwa fuga ghaydidi sean, ghwaraanya gea abiita gheeh Gaysari.

23 Dagheerjeanduumeeda Ng'utamiida was Yesu Gristo gagasa goobiida jeeda gurooruunatkeagwa.

The Bible in Datooga © Bible Society of Tanzania, 2015.

Bible Society of Tanzania
Titsatireni:



Zotsatsa